Messias nouhamba waye wombili
1 Ndelenee oshitutumine otashi tutuma moshifidi shaIsai, noshitai omomudi waye, ndele tashi imi oiimati; 2 nOmhepo otai ka kala nokutulumukwa kombada yaye, Omhepo yeendunge noyounongo, Omhepo yomayele noyeenghono, Omhepo yeshiivo noyokutila Omwene. 3 Ndele Oye oku na ohokwe yokutila Omwene; ndele ita tokola ngaashi omesho taa tale noita yukifa ngaashi omatwi aye aa udu; 4 ndelenee eehepele ote di tokolele pauyuki, novananheni vomoshilongo ote va yukifile ouyuki, edu ote li denge nodibo yomokanya kaye, novadinikalunga ote va dipaa nomufudo wokomilungu daye. 5 Ndele ouyuki tau ka kala ekwamo lomoshiya shaye noshili omwiya womeenho daye. 6 Opo nee embungu otali li pamwe nodi, nongwe otai nangala pamwe noukombwena; nokatana nonghoshi yonyasha nohove otadi lile mumwe, ndee tadi lifwa kokamati kanini. 7 Ongobe yodidi nemwangha otadi lile mumwe, outana nounghoshona otava nangala pamwe, nonghoshi otai li omwiidi ngaashi ongobe. 8 Ndele okaana kokomavele otaka danaukile pokwena kweuta, nokaana ka tova otaka twala eenyala dako komukwena wandevadele. 9 Ndele vo itava ka ninga owii ile okunyona sha komhunda yange aishe iyapuki; osheshi edu alishe otali ka kala li yadi eshiivo lokushiiva Omwene, ngaashi omeva a tuvikila efuta.
Ekombelelo loonakulihana vomuIsrael
10 Ndelenee mefiku tuu olo oiwana otai ka pula oshitutumine shomomudi waIsai, sha dikilwa oiwana aishe ngaashi epandela, monhele yetulumuko laye otai ka kala i yadi oshinge. 11 Nomefiku tuu olo Omwene ota ka twalulula eke laye lutivali a kulile ovanhu vaye ovo va fyaala muAsiria nomuEgipiti nomuPatros nomuEtiopia nomuElam nomuSinear nomuHamat nomeenhunhu adishe defuta. 12 Ndele ta ka dikila oiwana epandela, ndele ta ongele Ovaisraeli ava va li va twalwatwalwa, novahalakanifwa vomuJuda ote va kongolola kominghulo nhee dedu. 13 Opo nee efupa laEfraim otali ka xula po, nomahandu aJuda otaa xulifwa po; Efraim ita ka fila vali Juda efupa naJuda ita fininika vali Efraim. 14 Ndelenee vo otava ka tuka nokuwila komapepe Ovafilisti, ve li kouninginino naaveshe kumwe otava ka nyeka ovana vomoushilo. Edom naMoab otava ka wila komake avo, novana vaAmmoni otava ka dulika kuvo. 15 Ndele Omwene ota ka hanauna po oshikololo shefuta laEgipiti, neke laye ote li yedele Eufrat oku u denga nomhepo yaye ipyu, ndele te u tukaula u ninge omilonga heyali, opo u kale tau endwa neenghaku itadi tutu. 16 Ndele otau ka kala oshitauwa shinene shokweendwa koonakuxupa vaye, ava va xupa muAsiria, ngaashi kuIsrael mefiku tuu linya a dja muEgipiti.
© Oshikwanyama Bible Revised © Bible Society of Namibia, 2008, 2012.
