1 SAMUEL 27 - Oshikwanyama Bible (OKYB)

David e li moshilongo shOvafilisti

1 Ndele David e lipopila momwenyo waye ndele ta ti: “Efiku limwe eke laSaul tali ka dipaa nge. Kashi na eshi tashi kwafa nge, okuninga handi lixupifa moshilongo shOvafilisti. Opo nee Saul ta efa okukonga nge vali moshilongo ashishe shaIsrael, naame ohandi ke lixupifa mo meke laye.” 2 Opo nee David a fikama novalumenhu omafele ahamano pamwe naye ava va li puye va ya kuAkis yaMaok, ohamba yomuGat. 3 Ndele David a kala puAkis muGat, ye mwene novalumenhu vaye, keshe umwe neumbo laye: David pamwe novalikadi vaye vavali, Ahinoam wokuJisreel naAbigail, omwalikadi waNabal, Omukarmel. 4 Saul eshi a kundana nokutya, David okwa ya onhapo kuGat, ye ine mu konga vali. 5 Ndele David okwa lombwela Akis ndele ta ti: “Ame ngeenge nda filwa onghenda momesho oye, nandi pewe onhele moshilando shimwe shomedu la lalakana, ndi shiive okukala mo. Omolwashike omupiya woye a kale pwoove moshilando shepangelo? 6 Opo nee Akis e mu pa efiku tuu olo Siklag. Onghee hano Siklag osha ninga sheehamba daJuda fiyo onena eli.”

7 Ndele David a kala moshilongo shOvafilisti omudo umwe neehani nhee. 8 Ndele David okwa fikama novalumenhu vaye ndele va homona Ovagesuri nOvagirsi nOvaamaleki, osheshi vo ova li nale oonakukalamo voshikandjo langhele kwinya yaSur fiyo okedu laEgipiti. 9 Ndele alushe David ngeenge a homona oshilongo, ye ina efa nande omulumenhu umwe ile omukainhu umwe a kale nomwenyo, ndele okwa kufa oimuna neengobe neendongi neengamelo noikutu; ndele ye eshi a aluka nokwe uya kuAkis, 10 Akis ta pula: “Nena omwa ka homonene peni?” Opo nee David ta ti: Omoshilongo shokoumbuwanhu waJuda ile: moshilongo shokoumbuwanhu wOvajerahmeel ile moshilongo shokoumbangalanhu wOvakeni. 11 Ndelenee ina efa nande omulumenhu umwe ile omukainhu umwe a kale nomwenyo e va twale kuGat, osheshi a diladila: Vo tave ke va hepaululila osho David a ninga. Nonghedi yaye oyo tuu oyo omafiku aeshe eshi a kala moshilongo shOvafilisti. 12 Ndele Akis okwe lineekela David ndele ta ti: “Ye okwe litondifa moshiwana shaye Israel, ndele ta ka kala alushe omupangelwa wange.”