NUMERI 19 - Oshikwanyama Bible (OKYB)

Omalifetifomeva omute wondema itilyana

1 Omwene okwa popya vali naMoses naAron ndee ta ti:

2 “Onghedimhango oyo tuu ei Omwene e i tongele ta ti: Lombweleni ovana vaIsrael, nave ku etele ondema itilyana ihe noshipo ndee molutu kamu noipo, ndele inai kala natango koshi yondjoko. 3 Ndele nye mu noku i yandja komupristeli Eliaser, ndele venya ve noku i twala pondje yonhanda ndee tave i tomene koshipala shaye. 4 Nomupristeli Eliaser e nokukufa mohonde yayo nomunwe waye, ndele ye e nokushamina ohonde yayo luheyali langhele kombinga yokomesho yetwali leongalo. 5 Opo nee ve nokuxwika po ondema komesho yaye. Vo ve nokuxwika po ekungha layo, ombelela yayo nohonde yayo pamwe noshandja shayo. 6 Nomupristeli e nokukufa oshiti shomuti womusederi naisopi nongodi itilyana noku i ekela meni lomundilo omo ondema tai xwikwa mo. 7 Opo nee omupristeli ta kosho oikutu yaye nolutu laye momeva. Opo nee ye ta dulu okuuya monhanda. Nomupristeli ta kala ina yela fiyo onguloshi. 8 Nosho winya a xwika po ondema, e nokukosha oikutu yaye momeva nokukosha olutu laye momeva. Ndele ye ota kala ina yela fiyo onguloshi. 9 Nomulumenhu a yela na ongele omute wondema, ndee ne u twale konhele ya yela pondje kombada yonhanda. Nomute ou u nokutuvikililwa eongalo lovana vaIsrael omolwomafetifomeva: oo omalifetifomanyonauno. 10 Ndele ou ta ongele omute wondema e nokukosha oikutu ndee ta kala ina yela fiyo onguloshi. Oyo onghedimhango yaalushe kovana vaIsrael nokomunailongo ou ta kala mokati kavo.

11 “Ou ta kumu oshimhu shomunhu, keshe shimwe, ye e nokukala ina yela omafiku aheyali. 12 Ye e nokulifetifa nomeva tuu aa mefiku etitatu nomefiku etiheyali, opo nee ye ta ka kala a yela, ndele ngeenge ine liyeleka nomeva aa mefiku etitatu netiheyali, ye ota kala ina koshoka. 13 Keshe umwe ta kumu omufi nokutya, oshimhu shomunhu, ndele ite lifetifa, ye ota nyateke etwali lOmwene, ndele ye na dimwe mo muIsrael, osheshi ina shaminwa nomalifetifomeva. Ye ina yela, nonyata yaye tai ka kala muye.

14 “Umwe ngeenge ta file metwali, keshe umwe ou ta i mo metwali naaishe ei i li metwali otai kala inai yela momafiku aheyali. 15 Nosho yo oshiyuma keshe inashi tuvikwa, inashi yela. 16 Ndele keshe umwe ta kumu onakudipawa keongamukonda poluhaela ile oipongolo yanakufya ile ombila ye e nokukala ina yela momafiku aheyali.

17 “Ou ina yela, na kufilwe mo momute wetimbayambo la xwikwa po nokutila moshiyuma omeva mayela. 18 Nomulumenhu a yela e nokukufa isopi noku i yaveka momeva nokushamina etwali noinima aishe novanhu aveshe ava va kala po ile ou a kuma oipongolo yanakufya ile ou a dipawa ile omufi ile ombila. 19 Ndele ou a yela e nokushamina ou ina yela mefiku etitatu nomefiku etiheyali, ye e nokulifetifa. Opo nee ye ta kosho oikutu yaye ndee te likosho momeva ndee ta ka kala a yela onguloshi. 20 Ndelenee umwe ngeenge te linyateke, ndele ite lifetifa, opo nee omwenyo ou u nokudimwa mo meongalo, osheshi ye okwa nyateka etwali liyapuki lOmwene. Omalifetifomeva inae mu tililwa, onghee hano ye ina yela. 21 Oyo onghedimhango yaalushe kunye. Ndele ou ta shamine omashaminomeva, ye e nokukosha oikutu yaye. Ndele ou ta kumu omalifetifomeva, e nokukala ina yela fiyo onguloshi. 22 Heeno, ashishe eshi tashi kumwa kwaau ina yela, otashi kala sha nyata. Nomunhu ou te mu kumu, ota ka kala ina yela fiyo onguloshi.”