Oshipaxu noluteni
1 Ondjovo yOmwene ye uya kuJoel yaPetuel ei: 2 Shi udeni, onye ovakulunhu! Shi pwilikineni, onye oonakukalamo moshilongo! Oshinima sha tya ngaha osha ningwa tuu mbela momafiku eni ile momafiku ooxokulu? 3 Shi hepaululileni ovana veni, novana veni ve shi hepaululile ovana vavo, novana vavo ve shi lombwele oludalo lavo. 4 Eshi sha xupa koshenye, tashi lika komakamuti. Naashi sha efiwa komakamuti otashi lika koshipaxu shanakapipi. Naashi sha efiwa koshipaxu shanakapipi otashi lika kokapuka taka kunya. 5 Pendukeni, nye eengholwe, nye mu lile. Ndele nyikeni oluhodi, onye amushe oonakunwa omaviinyu omolwomaviinyu inaa pya, osheshi a kufwa mo momakanya eni. 6 Osheshi oshiwana sheenghono shihe shii kuvalwa sha pumina moshilongo shange, omayoo asho e li ngaashi onghoshi, noluhamama li li ngaashi longhoshi yonghadi. 7 Osho sha hanauna po omiviinyu dange, osho sha kunya omikwiyu dange, she di kunya omapeta noku a ekelashi, oitai yado ya kukuta.
8 Kema ngaashi okakadona ka djala oshako molwomumati womounyasha waye. 9 Eendjayambo noikunwayambo oya xulifwa mo mongulu yOmwene. Ovapristeli, ovapiya vOmwene ohava nyika oufiye. 10 Omapya a ninga omaputu, edu la nyika oufiye, osheshi oilya ya hanaunwa po. Omaviinyu a kuka, omaadi kae po vali. 11 Ovanamapya va fifwa ohoni, ovanamiviinyu hava kemene oilyavala nomahangu, osheshi oilya yomomapya kai po. 12 Omuviinyu wa kukuta, omukwiyu wa fya, omugranati nomulunga nomuti womuapula omiti adishe domoshilongo oda kukuta. Osheshi ehafo la fifwa ohoni, ola dja po kovana vovanhu.
Ekemo neilikano
13 Djaleni, ndelenee kemeni, nye ovapristeli! Kuweni, nye ovayakuli vopomayambelo! Ileni, nye ovapiya vaKalunga mu nangale oufiku mwa djala eeshako. Osheshi eendjayambo noikunwayambo ya xula mo mongulu yaKalunga keni. 14 Yapuleni efiku lelidiliko. Shiveni oshiongalele. Ongeleni mongulu yOmwene Kalunga keni ovakulunhu noonakukalamo aveshe vomoshilongo, ndele kuweni kOmwene. 15 Woo, efiku olo! Osheshi efiku lOmwene li li popepi, ndele tali uya ngaashi ehanauno hali di kOmunaenghono adishe. 16 Eendja inadi kufwa tuu moipafi yetu nehafo nekuwililo mongulu yaKalunga ketu? 17 Eembuto da hekeshwa. Oipale ya kunghala nomaanda a tekauka po, osheshi oilya oya feta. 18 Woo, oimuna nhumbi tai keme. Noufita weengobe tau endaenda, osheshi kai na apa tai li. Noufita weedi noikombo yo tau fi ondjala. 19 Kwoove, Omwene, handi kuu, osheshi epeya la xwika po oulifilo womofuka; nelaka lomundilo la xwika omiti adishe domoixwa. 20 Noifitukuti yoovene yomoixwa otai kuu kwoove. Osheshi eemholongela domeva da pwinina nepeya la xwika po oulifilo womoixwa.
© Oshikwanyama Bible Revised © Bible Society of Namibia, 2008, 2012.
