Moses ta londo vali komhunda
1 Opo nee Omwene okwa lombwela Moses ndele ta ti: “Honga vali oipelende yomamanya ivali, ngaashi inya yotete, opo Ame ohandi ka shangela moipelende eendjovo dinya da li moipelende yotete, ei ove we i tatula. 2 Ove kala we lilongekida ongula, ndele ongula londa komhunda yaSinai u kale ofika pwaame konhele yomhunda. 3 Ndelenee paha kale nande umwe ta londo pamwe naave; komhunda aishe paha monike nande umwe, paha monike oimuna neengobe tadi li pomhunda ei.” 4 Opo nee ye okwa honga oipelende yomamanya ivali ngaashi inya yotete, ndele Moses okwe lilongekida ongula inene ndele okwa londa komhunda yaSinai, ngaashi Omwene e mu lombwela, ndele okwa kufa oipelende ivali meke laye.
Omwene ta holoka kuMoses
5 Ndele Omwene okwa holoka moshilemo nokwa kala puye ofika. Ndele ye okwa ifana edina lOmwene. 6 Ndele Omwene eshi a enda puye okwa ingida ta ti: “Omwene Kalunga omunefilonghenda, Kalunga omunanghenda, omunanheni, nomunene mouwanghenda nomoudiinini, 7 nouwanghenda waye te u diinine kovanhu omayovi, ou ta dimi po omanyonauno nomatauluko nomatimba, ndelenee Ye ita efa okuhandukila nokukongolola omanyonauno ooxe kovana nokovatekulu fiyo okepupi etitatu netine.” 8 Opo nee Moses okwe linyongamena diva poshi nokwa wila eombe 9 ndele ta ti: “Omwene, ngeenge nda filwa onghenda koshipala shoye, Omwene na ende pamwe nafye, osheshi ovanhu ava ve neefingo da kukuta. Ndelenee dima po omanyonauno etu nomatimba etu, ndele tu tambula ngaashi oshifyuululwa shoye.”
Ovaisraeli tava peululwa omhango
10 Opo Ye okwa nyamukula ta ti: “Tala, Ame ohandi ningi ehangano nanye; Ame ohandi ka ninga moipafi yovanhu voye aveshe oikumwifa yo inai ningwa kombada yedu alishe nomokati koiwana aishe, opo oshiwana ashishe mokati kasho omo u li, tashi ka shiiva okumona oilonga yOmwene. Osheshi oitilifalonga ohandi ke i ku ningila. 11 Diinina odo Ame nde di ku lombwela nena eli. Tala, Ame ohandi ku tele po Ovaamori nOvakaanan nOvaheti nOvaperesi nOvahevi nOvajebusi. 12 Lungama uha ninge ehangano noonakukala medu to i mulo, vo vehe ku tele omwiyo, 13 ndelenee eealtari davo mu noku di ngumauna po, neengudi davo domamanya mu noku di tatula, nomiti davo domalupwelele daAsera u noku di ka po. 14 Osheshi ino linyongamena koshipala shakalunga kamwe. Osheshi edina lOmwene olo ‘Nandubo’ nokutya, Ye Kalunga e nondubo. 15 Ino ninga ehangano noonakukala medu linya! Vo eshi tava shikula oikalunga yavo moluhaelo ndele tava yambele oikalunga yavo vo otave ku ifana ndele to li komayambo avo, 16 novana voye oukadona novamati tava ka kala nokuhombolofana novana vavo oukadona tava ka longela oikalunga yavo moluhaelo novana voye ovamati tave va hongaula okulongela oikalunga yavo moluhaelo.
17 “Ino liningila oikalunga ya telekwa monhelekelo.
18 “Diinina oshivilo shomungome uhe nonhafi. Momafiku aheyali ove u nokulya omungome uhe nonhafi nongaashi nde ku lombwela mefimbo la nuninwa mohani yaAbib. Osheshi mohani yaAbib nye mwa dja mo muEgipiti.
19 “Oiveli aishe tai yeulula oshidalelo shaina oyange. Nosho yo oimuna aishe oindume nokutya, oiveli yeengobe noyeedi. 20 Ndelenee oshiveli shondongi u noku shi kulilifa nodjona. Ndelenee ngeenge ito shi kulile, shi teya ofingo yasho. Oiveli yoye aishe u noku i kulila, nokoshipala shange itaku holokwa nomake ahamakasha.
21 “Omafiku ahamano u nokulonga oilonga yoye, ndelenee mefiku etiheyali u nokutulumukwa. Mefimbo lokulima nomefimbo leteyo u nokutulumukwa. 22 Oshivilo shoivike u noku shi diinina yo, oshivilo shoshipe sheteyo loilya noshivilo shetuvikilo pexulilo lomudo. 23 Ovalumenhu aveshe vomokati keni ve nokuholoka lutatu momudo keshe koshipala shOmwene Kalunga, Kalunga kaIsrael. 24 Osheshi Ame ohandi ka taataa oiwana koshipala shoye nokumbwalangadjifa edu loshilongo shoye. Itapa kala nande umwe e nolwisho lokuhala oshilongo shoye, fimbo ove to i u ka holoke koshipala shOmwene Kalunga koye lutatu keshe omudo.
25 “Ino yamba ohonde yeyambo lange pamwe nomungome u nonhafi, neyambo lomoshivilo shaPaasa shiha tuvikililwe kefiku lomongula.
26 “Eshi shiwelela shomoiimati yomepya loye u noku shi etela kongulu yOmwene, Kalunga koye.
“Ino teleka okakombwena momashini aina yako.”
27 Omwene okwa lombwela vali Moses ndele ta ti: “Eendjovo edi di shangela mo, osheshi paendjovo edi Ame nda ninga ehangano nanye nOvaisraeli.” 28 Ndele ye okwa kala pOmwene omafiku omilongo ine, omutenya noufiku. Ye ina lya omungome noina nwa omeva. Ndele ye okwa shangela mo moipelende eendjovo dehangano, oipango oyo omulongo.
Oshipala shaMoses sha vema
29 Ndele Moses eshi a londoloka komhunda yaSinai, oipelende ivali youndobwedi oya li meke laye; eshi a londoloka komhunda, okwa li ina shiiva nokutya, oshipa shoshipala shaye otashi vema, eshi a popya naKalunga. 30 Ndele Aron novana aveshe vaIsrael, eshi va mona Moses, noshipa shoshipala shaye sha vema, vo ova tila okweehena puye. 31 Ndelenee Moses okwe va ifana, naAron novakulunhu aveshe voshiwana va shuna kuye. Ndele Moses okwa popya navo. 32 Opo nee ovana aveshe vaIsrael va ehena popepi, ndele ye okwe va lombwela ashishe eshi Kalunga e mu lombwela komhunda yaSinai. 33 Moses eshi a mana okupopya navo, ye okwa uvika oshipala shaye noshiuviko.
34 Ndelenee Moses ngeenge e uya koshipala shOmwene a popya naye, ye okwa kufa ko oshiuviko, fiyo ye a pita mo vali. Ye ngeenge a pita mo ndele ta shiivifile Ovaisraeli eshi a lombwelwa, 35 ovana vaIsrael va mona oshipala shaMoses nokutya, oshipa shoshipala shaMoses tashi vema. Opo nee Moses okwa uvika vali oshipala shaye noshiuviko, fiyo ta i a ka popye vali naKalunga.
© Oshikwanyama Bible Revised © Bible Society of Namibia, 2008, 2012.
