Okungongota kwovanhu
1 Opo nee eongalo alishe la hovela okupopyaana nokukema novanhu va lila oufiku aushe. 2 Novana aveshe Ovaisraeli va ngongotela Moses naAron, neongalo alishe le va lombwela: “Akutu, ngeno twa filile medu laEgipiti! Ile ngeno twa lilile mombuwa ei! 3 Omolwashike Omwene te tu twala kedu linya tu dipawe keongamukonda? Ovalikadi vetu novana vetu tava ka ninga oshihakanwa shovatondadi. Ngeno shi dule fye tu shune kuEgipiti.” 4 Ndele vo ova kundafana tava ti: “Tu lihoololeleni omukulunhu, ndele tu shuneni kuEgipiti.”
5 Opo nee Moses naAron va wila eombe moipafi yeongalo alishe lovana vaIsrael. 6 Ndele Josua yaNun naKaleb yaJefunne, vavali ava va ile okulava edu, ova pombaula oikutu yavo, 7 ndele va lombwela eongalo alishe lovana vaIsrael, ndee tava ti: “Edu linya twe li lava nokweendaenda mulo, edu oliwa unene. 8 Omwene ngeenge e tu hokwa, Ye ote ke tu twala ko medu olo ndee te li tu pe, edu li yadi omashini nomaadi eenyiki. 9 Hano inamu twa ondubo nOmwene ndele inamu kala nokutila ovanhu vomoshilongo shinya, osheshi vo ohatu ke va pona po. Omupopili wavo e va efa, ndelenee Omwene e li pamwe nafye. Inamu va tila!” 10 Opo nee eongalo alishe la hala oku va dipaa nomamanya. Ndelenee oshinge shOmwene osha holoka metwali leongalo moipafi yovana aveshe vaIsrael.
11 Omwene okwa lombwela Moses ndee ta ti: “Oshiwana eshi otashi ka dina nge fiyo onaini? Ndele fiyo onaini hava kala ihava itavele nge, Ame nande nda ninga omadidiliko aa aeshe mokati kavo? 12 Ame ohandi ke va tumina oudu wolutapo noku va dima po. Ndele Ame ohandi ku ningi oshiwana shinene noshi neenghono shi va dule.” 13 Opo nee Moses a lombwela Omwene ndee ta ti: “Ndelenee Ovaegipiti ova uda ko kutya, Ove, meenghono doye wa pitifa mo muvo oshiwana eshi, 14 ndele ve shi tongela oonakukalamo moshilongo eshi. Venya ova uda nokutya, Ove Omwene u li mokati koshiwana eshi, osheshi Ove Omwene we liholola moipafi yavo. Noshilemo shoye tashi kala kombada yavo, ndele Ove ho va kwatele komesho moluudi loshilemo momutenya nomoluudi lomundilo oufiku. 15 Ovanhu ava ngeenge to va kombo po ngaashi omunhu umwe, opo nee oiwana, eshi tai udu eenghundana tadi ku tongo, otai ka tya: 16 ‘Omwene eshi a nyengwa okutwala ovanhu ava medu linya, Ye e li va udanekela nokwaana, Ye okwe va komba po mombuwa.’
17 “Eenghono doye, Omwene, nadi liholole hano ngaashi we di tile nokutya: 18 ‘Omwene Ye omutalanheni, omunene mouwanghenda, ou ta dimi po oilonga ii nomatauluko, ndele ita efa ina handukila, Ye ou ta kongolola po omanyonauno ooxe fiyo oludalo olutitatu nolutine.’ 19 Dima po omanyonauno ovanhu ava voye omolwounene wouwanghenda woye ngaashi Ove wa dima po shito omanyonauno ovanhu ava okudja muEgipiti fiyo opapa.”
20 Opo nee Omwene ta ti: “Ame ohandi dimi po omanyonauno omolwondjovo yoye. 21 Ndelenee oshili ngaashi Ame ndi nomwenyo nongaashi edu alishe tali ka kala li yadi oshinge shange, 22 ovalumenhu aveshe venya va mona oshinge shange nomadidiliko ange oo, nde a ninga muEgipiti nomombuwa, ndelenee paife vo va shinda nge efimbo alishe, ndele inava pwilikina ondaka yange, 23 venya itava ka mona edu linya nde li udanekela ooxe nokwaana, heeno, aveshe ava va handukifa nge, itave ke li mona. 24 Ndelenee omupiya wange Kaleb, osheshi muye omwa li omhepo imwe ndele ye a shikula nge nomwenyo aushe, ye ohandi ke mu twala medu linya, a ile mo noludalo laye tali ke li nangala. 25 Ndelenee Ovaamaleki nOvakaanan eshi hava kala momalufilulongo, nye pilukeni mongula mu shune kombuwa nondjila yEfuta Litilyana.”
26 Opo nee Omwene okwa popya naMoses naAron ndee ta ti: 27 “Oshiwana eshi shii shi nondubo tashi ngongotele nge fiyo onaini? Ame nda uda omangongoto ovana vaIsrael, vo eshi va kala nokungongotela nge, 28 va lombwela: ‘Oshili, ngaashi Ame ndi nomwenyo, Omwene ta ti, oshili ngaashi va popya momatwi ange, osho handi ke va ningila. 29 Oimhu yeni tai ka nangala mombuwa ei nokutya, aveshe ava va valwa, pamuvalo wavo, ava va wanifa omido omilongo mbali naava va koya po, ava va nongotela nge. 30 Oshili, nye itamu ka ya medu olo nde li mu udanekela nokwaana nye mu li nangale, Kaleb yaJefunne oye aeke naJosua yaNun. 31 Ndelenee ovana veni ava mwa tonga: otava ka ninga oihakanwa, ohandi ke va twala mo ndele tava ka shiiva oshilongo shinya, nye mwe shi dina. 32 Ndelenee oimhu yeni tai ka nangala mombuwa ei. 33 Novana veni tava ka elaela ngaashi ovafita voimuna mombuwa omido omilongo nhee, osho ngaha hava humbata oudjuu omolwokuhadulika kweni, omido omilongo nhee, osho ngaha hava humbata oudjuu omolwokuhadulika kweni, fiyo oimhu yeni ya olela mo mombuwa. 34 Pamuvalo womafiku enya mwa li okulava edu, omafiku omilongo nhee, efiku limwe tali yeleke omudo umwe, nye mu nokuhumbata okuhadulika kweni, omido omilongo nhee nokushiiva eshi oshike Ame ngeenge nde likufa po punye. 35 Ame, Omwene, onde shi popya. Oshili eshi ohandi ke shi ningila oiwana aishe ei ii, yo ya hovela okutwila nge ondubo. Vo otava ka xula po mombuwa ei nokufila mo muyo.’ ” 36 Novalumenhu ava va tuminwe kuMoses okulava edu ndele mokwaaluka kwavo va xwameka eongalo alishe oku mu ngongotela molwokutandavelifa eendjovo doipupulu da tongelwa edu linya, 37 ovalumenhu tuu ovo va tandavelifa eendjovo dii dedu linya, ova fila moshiponga koshipala shOmwene. 38 Ndelenee movalumenhu ava va lavele edu, omwa xupa ve nomwenyo Josua yaNun naKaleb yaJefunne.
39 Ndele Moses eshi a lombwela ovana vaIsrael eendjovo edi adishe, ovanhu va nyika oluhodi unene, 40 ndele ongula inene ove lilongekida va londe konhele yomhunda ndee tava ti: “Fye twe lilongekida okuya oko, Omwene e tu lombwela, osheshi fye otwa nyona.” 41 Ndele Moses e va lombwela: “Omolwashike tamu tauluka vali elombwelo lOmwene, osheshi nye itamu ka dula? 42 Inamu ya ko, osheshi Omwene ke mo mokati keni, inamu ya ko, otamu ka tewa kovatondadi veni. 43 Osheshi Ovaamaleki nOvakaanan oko ve li komesho yeni ndele nye otamu ka dipawa keongamukonda, shaashi mwe liteeka kOmwene. Onghee hano Omwene ita ka kala pamwe nanye.” 44 Ndelenee ohaluka va ya mondubo yavo va ka londa komhunda. Ndelenee oshikefa shehangano naMoses inava dja monhanda. 45 Opo nee Ovaamaleki nOvakaanan ava va kala keemhunda ove uya ndele ve va taataa ndele ve va halakanifa fiyo okuHorma.
© Oshikwanyama Bible Revised © Bible Society of Namibia, 2008, 2012.
