Elongo tali di koshilonga shomuhongi woiyuma
1 Ondjovo yOmwene ei ya hanga Jeremia, otai ti: 2 “Fikama u ka kulukile mondjibololo yomuhongi woitoo. Omo to ka uda eendjovo dange.”Ondjovo yOmwene ei ya hanga Jeremia, otai ti: “Fikama u ka kulukile mondjibololo yomuhongi woitoo.” 3 Opo nee ame onda ya ko ndele nda kulukila mo mondjibololo yomuhongi woitoo, ndele tala, okwa longa poshihongelo shaye. 4 Ndele oshitoo osho e shi honga, ngeenge sha nyonauka, ngaashi oshitoo tashi dulu okunyonauka momake omuhongi, ye okwe shi hongulula oshitoo shikwao, omuhongi woitoo ngaashi a tala osha wapala. 5 Opo nee ondjovo ei yOmwene oya hanga nge tai ti: 6 “Ame yo itandi dulu ngeno oku mu ninga ngaashi omuhongi woitoo ta ningi nelova, onye eumbo laIsrael, Omwene ta ti? Tala, ngaashi elova li li meke lomuhongi woitoo, osho nanye yo eumbo laIsrael mu li meke lange. 7 Ohaluka ohandi popi nehandu nda hala okududa mo nokuteya po nokuhanauna po oshiwana noshilongo. 8 Ndelenee oshiwana eshi ngeenge tashi lidilulula kowii washo nde shi u lombwela, ndi shi handukile, opo ame handi efa okuwanifa ehandu nda li nde shi li diladilila. 9 Mefimbo limwe ohandi udanekele okutunga nokutwika oshiwana noshilongo, 10 ndelenee ngeenge otashi ningi osho showii momesho ange ndele itashi dulika kondaka yange, opo nee Ame ohandi lialuluka ouwa ou nde shi u udanekela. 11 Hano paife lombwela ovalumenhu vomuJuda noonakukalamo muJerusalem u tye: Omwene ota ti ngaha: ‘Oshili, Ame ohandi ke mu tumina oshiponga nohandi mu diladilile owii. Alukeni keshe umwe kondjila yaye ii, wapalekeni eendjila deni noilonga yeni!’ 12 Ndelenee vo otava ti: ‘Eshi oshongaho! Osheshi fye otwa hala okushikula omadiladilo etu vene, nakeshe umwe womufye ota ka ninga paukukutu womutima waye mwii.’ ” 13 Onghee hano Omwene ota ti ngaha: “Puleni mokati koiwana, olyelye a uda sha tya ngaha? Okakadona Israel oka longa shili oshilonga shoixuna. 14 Eandu lokuLibanon otali fii po tuu eemhunda di yela? Ile omeva matalala haa kunguluka taa di kokule otaa pwinine tuu? 15 Ndele oshiwana shange osha dimbwa nge. Tashi xwikile oikalunga yongaho omayambo. Yo ye shi pundula meendjila dasho, momalila onale, osho ngaha sha puka, hashi ende neendjila dopomunghulo, neendjila inadi kokolwa; 16 osho edu lasho otashi li ningi oixuna, la ninga loiyolifa yongaho fiyo alushe, opo keshe ou ta pitilile po ota kumwa ndele ta pukapuka komutwe. 17 Ngaashi omhepo yokoushilo otai va halakanifa po moipafi yovatondadi vavo mefiku lenyonauko lavo, ohandi va talifa ekofi lange, hashipala shange.”
Ekemo neilikano laJeremia
18 Ndelenee vo ova tya: “Ileni tu ka hangakeneni Jeremia. Osheshi elongo itali xulu komupristeli nomayele kovanaendunge nondjovo kovaxunganeki. Ileni tu ke mu denge nelaka, fye tuha pwilikine vali eendjovo daye.”
19 Omwene, pwilikine nge, Ove u ude odo tadi popiwa kovatondi vange! 20 Ouwa ou nokwaalulilwa owii? Osheshi ova fela nge elambo. Kala ho dimbulukwa nhumbi ame nda kala ofika koshipala shoye, ndi va popile nondjovo iwa opo ndi kandule kuvo oupyuhandu woye. 21 Onghee hano ovana vavo va yandja kondjala, ove u va yandje keongamukonda, ovakainhu vavo va ninga ovafiyekadi, vehe noludalo, ovalumenhu vavo nava fye koudu wolutapo novamati vavo nava file moita okeongamukonda. 22 Momaumbo avo namu udike onghuwo, nge to va undulile ohaluka ongudu yovakolokoshi, osheshi ova fela nge elambo ndele meholeko va tela eemhadi dange omwiyo. 23 Ndelenee Omwene, oto shiiva omadiladilo avo, va dipae nge. Enyono lavo ino li kufa po netimba lavo ino li dima po koshipala shoye, nava wile po koshipala shoye. Va twifa eemhata mefimbo lehandu loye.
© Oshikwanyama Bible Revised © Bible Society of Namibia, 2008, 2012.
