Kalunga Oye ohotengulu yetu ya pama
Eimbilo lOvakora, la pewa enyakwa lolwiimbo mondaka yotete.
1 Kalunga Oye ehondamo letu neenghono detu,
nekwafo linene li shii kulineekelwa momaudjuu.
2 Hano itatu tila, nande edu nali linyenge,
neemhunda nande nadi ngumukile momeva efuta,
3 nande omakufikufi naa lundumuke pombada,
notaa tutuma onhutu,
neemhunda nande nadi kakamifwe kendundumo lao. Sela
4 Ope nomulonga: eenghungulukilo dao
tadi hafifa oshilando shaKalunga,
oukalelo uyapuki waau wOkombadambada.
5 Kalunga omo e li musho, onghee itashi tengauka,
Kalunga ote ke shi kwafa metendo leluwa.
6 Oiwana yovapaani oya lundakana,
nomauhamba avo a teyaulwa po;
Oye okwa ndwandwamifa ondaka yaye,
nedu tali kakama.
7 Omwene weengudu dovakwaita oku li pamwe nafye,
Kalunga kaJakob Oye ohotemanya yetu ya pama. Sela
8 Ileni, mu tale oilonga yOmwene,
ou ta longo oitilifalonga kombada yedu.
9 Ou ta xulifa po oita fiyo okeengaba dedu,
ndele ta teyaula omauta nomaonga,
nomatemba oita te a xwike po nomundilo.
10 Ota ti: “Ngungumaneni, nye dimbulukweni,
nokutya Aame andike Kalunga,
nda tumbala mokati koiwana yoilongo,
nda tumbala kombada yedu.”
11 Omwene weengudu dovakwaita oku li pamwe nafye,
Kalunga kaJakob Oye ohotemanya yetu ya pama. Sela
© Oshikwanyama Bible Revised © Bible Society of Namibia, 2008, 2012.
