Odjuulufi yokongulu yaKalunga
Epsalome lOvakora, la pewa enyakwa lolwiimbo nokaxumbafeta Gittit.
1 Eumbo loye oliwa shi fike peni,
akutu Omwene weengudu dovakwaita!
2 Omwenyo wange tau djuulukwa,
ndele tau lilile omikala dOmwene;
omutima wange nolutu lange
otali nyakukilwa Kalunga omunamwenyo;
3 osheshi namusheshe okwa mona ko eumbo,
noxwilowi ya mona oshihadi,
omu ya nangeka oudilona vayo,
okutya, eealtari doye,
Omwene weengudu dovakwaita,
ohamba yange naKalunga kange.
4 Ovanelao ovo tava kala meumbo loye,
have ku hambelele alushe. Sela
5 Ovanelao ovava ve neenghono davo mwoove
mokulilongekidila oyeendo iyapuki.
6 Mokweenda molufilu lomahodi
otave li shitukifa eefifiya,
nodula yonhemuna
otai li yadifa omanangeko noupuna.
7 Otava ende alushe meenghono dipe,
fiyo tava fiki koshipala shaKalunga muSion.
8 Omwene, Kalunga keengudu dovakwaita,
pwilikina eindilo lange,
li uda, Kalunga kaJakob. Sela
9 Akutu Kalunga, Oove oshikelelifo shetu,
tala u tale oshipala shomuvaekwa woye.
10 Osheshi efiku limwe alike momikala doye
li dule omafiku eyovi pamwe pe lili.
Okukala konhu yeumbo laKalunga kange
oku dulile nge okukala meenduda dovalunde.
11 Osheshi Kalunga Omwene,
Oye etango noshikelelifo;
Omwene oha yandje ouwanghenda nefimano;
ava tava ende moshili,
ite va kelele nande osha shiwa.
12 Omunelao omunhu ou te ku lineekele,
Oove Omwene weengudu dovakwaita!
© Oshikwanyama Bible Revised © Bible Society of Namibia, 2008, 2012.
