ESRA 9 - Oshikwanyama Bible (OKYB)

Ekemo laEsra molweehombo dOvaisraeli novapaani neilikano laye

1 Eshi va mana ashishe osho, ovakulunhu ve uya kwaame ndele tava ti: “Ovanhu Ovaisraeli novapristeli nOvalevi inave litukula noiwana yomoilongo nomoilonga yavo ii, mOvakaanan, mOvaheti, mOvaperesi, mOvajebusi, mOvaammoni, mOvamoab, mOvaegipiti nomOvaamori. 2 Osheshi va kufa mo movana vavo oukadona, va ninga ovalikadi vavo novovana vavo ovamati, onghee hano oludi liyapuki la lumbakanifwa kumwe novanhu vomoilongo. Novakulunhu novakomesho va tetekela meliteeko olo.” 3 Ndele eshi nde shi uda nda pombaula oshikutu shange nelwakani lange, ndele nde liduda eexwiki komutwe wange neendjedi dange, ndele nda kala omutumba nda nyika oluhodi. 4 Ndele ava va kakama molweendjovo daKalunga kaIsrael omolweliteeko leenghwate, ove uya aveshe kwaame. Ndele ame nda li omutumba nda nyika oluhodi fiyo okeyambo longuloshi.

5 Ndelenee pefimbo leyambo longuloshi ame nda penduka mokunyika oluhodi lange. Ndele fimbo handi pombaula oshikutu shange nelwakani lange, ame nda twa eengolo nokulinyongamena ndele nda yelula omaoko ange kOmwene Kalunga kange, 6 ndele handi ti: “Kalunga kange, ondi udite nda fya ohoni ndele ihandi dulu okuyelula oshipala shange kwoove, Kalunga kange, osheshi oulunde wetu wa lunda omitwe detu, nokuvelwa kwetu ombedi taku hange keulu. 7 Okudja komafiku ootate fiyo onena eli fye tu nombedi inene, nomolwowii wetu fye neehamba detu novapristeli vetu va yandjwa momake eehamba doilongo, nokeongamukonda nomoukwatwa nomokutikishwa po nomokufifwa ohoni, ngaashi shi li nena eli. 8 Ndele paife twa mona onghenda kOmwene Kalunga ketu okafimbo kanini, osheshi Ye e shi itavela ovamangululwa vomufye va xupa po, nokwe tu pa onhele moshiyapuki shaye, opo Kalunga ketu a yelife omesho etu tu fude po kanini moupika wetu. 9 Osheshi fye ovapika. Ndelenee moupika wetu Kalunga ketu ine tu ekelashi, ndele okwe tu fila onghenda koshipala sheehamba daPersia, onghee hano ode tu pa okafudo tu tungulule ongulu yaKalunga ketu nomakulukuma ayo tu a longolole, nokwe tu pa ohotekuma muJuda nomuJerusalem. 10 Ndele paife Kalunga ketu hatu ti shike omolwoinima ei? Osheshi twa efa oipango yoye, 11 we i lombwela ovapiya voye ovaxunganeki, eshi wa tile: ‘Oshilongo osho tamu i mo mu ke shi nangale, osho oshilongo sha nyata, omolweenyata doiwana yomoilongo molwoilonga yavo ii, va yadifa nayo oshilongo okudja kongaba imwe fiyo okongaba ikwao neenyata davo. 12 Paife inamu yandja ovana veni oukadona kovana vavo ovamati, ndele inamu kufa ovana vavo oukadona va ninge ovalikadi vovana veni ovamati, ndele inamu konga nande oukaume nelao lavo fiyo alushe, opo nye mu kale mwa pama nokulya ouwa woshilongo, ndele mu shi yandje kovana veni oshitukulwa fiyo alushe.’ 13 Ndele konima yoinima aishe oyo ye uya kombada yetu molwoilonga yetu ii nomolwombedi yetu inene, osheshi Ove Kalunga ketu ino tu valela pawii wetu twe u lilongela, ndele we tu pa natango ovamangululwa vahapu ve fike opo. 14 Tu tauluke vali ngeno oipango yoye ndele tu ninge haukwe noiwana oyo tai longo oixuna? Ehandu loye itali ka kala ngeno kombada yetu fiyo twa kombwa po, ndele itapa fyaala nande oshixupe ile ovamangululwa? 15 Omwene Kalunga kaIsrael, Oove omuyapuki. Osheshi ofye atuke tu li efiku lonena ovamangululwa, twa xupa. Fye otu li po apa tu nombedi koshipala shoye, ndelenee omolwoinima ya tya ngaha kape na ou ta dulu okukala po koshipala shoye.”