Omwene ta pangele
1 Paife Omwene Oye ohamba.
Edu nali shi nyakukilwe,
eengudu deenhunhu domomeva nadi shi hafele.
2 Oilemo nomilaulu otai mu dingilile,
ouyuki noshili, oyo efina lolukalwa laye.
3 Omundilo otau tetekelele oshipala shaye,
ndele tau lungwinifa po ovatondi vaye
keembinga adishe.
4 Omaluvadi aye otaa minikile ongonga yedu,
edu otali a mono, ndele tali kakama.
5 Koshipala shOmwene eemhunda otadi diluka
ngaashi edi leenyiki,
koshipala shOmupangeli wedu alishe.
6 Omaulu otaa udifa ouyuki waye,
noiwana yoilongo aishe otai mono efimano laye.
7 Ovafimaneki aveshe voihongwafano,
ava tave litadele oikalunga, ove li po va fifwa ohoni;
oifimanekwa aishe otai wile po eombe koshipala shaye.
8 Sion, eshi she shi uda, osha hafa,
noukadona vaJuda ohava kuwililile
omatokolo oye, Omwene.
9 Osheshi Omwene, Oove omunenenene
kombada yedu alishe,
wa tumbala unene komesho yookalunga aveshe.
10 Akutu onye ava, mu hole Omwene, tondeni owii!
Eemwenyo dovakoshoki vaye, ote di amene,
ote di xupifa momake ovadinikalunga.
11 Ouyelele wa kuminwa komuyuki,
nehafo okovanamadiladilo a yuka.
12 Ovayuki nye, hafeleni mOmwene,
nye hambeleleni edina laye liyapuki.
© Oshikwanyama Bible Revised © Bible Society of Namibia, 2008, 2012.
