David ta xupifa omwenyo waSaul
1 Ndele Saul eshi a aluka kokushikula Ovafilisti, ye a hepaululilwa nokutya David oku li mombuwa yaEngedi. 2 Opo nee Saul a kufa ovakwaita ovahoololwa omayovi atatu muIsrael ashishe nokwa ya a ka konge David novalumenhu vaye langhele kwinya yOmamanya eemenye. 3 Ye eshi e uya koyuunda yeedi pondjila apa pa kala ekololo lomhunda, Saul okwa ya mo a ye koixwa, fimbo David novanhu vaye va li omutumba kofindo yekololo. 4 Novalumenhu vaDavid tava ti kuye: “Tala, efiku eli olo tuu olo Omwene te ku lombwele: ‘Paife Ame ohandi yandje omutondadi woye meke loye, ndele mu ningila ngaashi she ku wapalela.’ ” Opo nee David ta fikama ndee ta ende ta hondjaunine ndee ta tete okavando komunghulo woshikutu shaSaul. 5 Ndelenee eliudo laDavid le mu vela ombedi ye eshi a teta okavando komunghulo woshikutu shaSaul, 6 ndele ye okwa lombwela ovalumenhu: “Omwene na amene nge, ndiha ningile sha omuvaekwa wOmwene wange, ndi mu kume neke lange. Osheshi ye omuvaekwa wOmwene.” 7 Ndele David okwa ilikana ovalumenhu vaha nhukile Saul. Ndele Saul a dja mo mekololo nokwa ya nondjila yaye. 8 Opo nee naDavid yo okwa fikama, a dja mo mekololo nokwa ingida Saul ndee ta ti: “Ohamba, omwene wange! Saul eshi ta keuka konima yaye, David te linyongamene oshipala shaye pedu ndee ta wile eombe.” 9 Ndele David ta ti kuSaul: “Omolwashike to pwilikine eendjovo dovanhu hava ti: ‘Tala, David te ku kongele omupya?’ 10 Tala, nena eli omesho oye mwene taa mono nokutya, nena eli Omwene e ku yandja meke lange mekololo lomhunda. Ndele ovanhu vange vamwe va lombwela nge ndi ku dipae, ndele ame nde ku xupifa ndee handi ti: ‘Eke lange itali ka kuma omwene wange, osheshi oye omuvaekwa wOmwene.’ 11 Ndele tala, tate, heeno, tala okavando komunghulo woshikutu shoye meke lange! Osheshi ame eshi nda teta okavando komunghulo woshikutu shoye, ame inandi ku dipaa. Kala hano u shi shii nokutya, mwaame kamu na owii ile etauluko ndele inandi nyona kwoove, nande ove ho holamene nge u shiive okudipaa nge. 12 Omwene na tokole pokati ketu naave, nOmwene ne ku handukile omolwange. Ndelenee eke lange itali ke ku kuma. 13 Ngaashi eyeletumbulo lootatekulu tali ti: ‘Ouhenakalunga tau di movahenakalunga.’ Ndelenee eke lange itali ke ku kuma. 14 Ohamba yaIsrael tai shikula lyelye? Ove to taataele lyelye? Omutunhu wombwa ile ona imwe!” 15 Ndelenee Omwene na kale omutokoli, Ye na tokole pokati ketu. Heeno, Ye na tale nokuyukifa oshinima shange. Ye na xupife nge meke loye.
16 David eshi a mana okupopya kuSaul eendjovo odo Saul ta ti: “Ondaka oyoye tuu, omumwange David?” Saul okwa yelula ondaka yaye ndee ta lili. 17 Ndele ta ti kuDavid: “Ove u dule nge ouyuki, osheshi ove wa ningila nge ouwa, fimbo nde ku ninga nai. 18 Ndele nena eli we shi ulikila nge, shaashi wa ningila nge ouwa, osheshi Omwene a yandja nge meke loye, ndelenee ove ino dipaa nge. 19 Osheshi umwe ngeenge te litu omutondadi waye, ote mu efa tuu a ye nondjila iwa? Ndelenee Omwene ote ke ku alulila ouwa ou we u ningila nge nena. 20 Ndele paife tala, ondi shi shii shili nokutya, ove oto ka ninga ohamba, nouhamba waIsrael otau ka kala wa pama meke loye. 21 Anene nge hano paife kOmwene nokutya, ito ka komba po epata lange konima yefyo lange, ndele ito dimi po edina lange filufilu.” 22 Opo nee David okwa anena Saul. Ndele Saul okwa ya keumbo, ndelenee David novalumenhu vaye va ya kohotengulu yokeemhunda.
© Oshikwanyama Bible Revised © Bible Society of Namibia, 2008, 2012.
