Etokolo tali ke uya
1 Akutu, nye ovana vaIsrael, udeni ondjovo ei Omwene e i mu lombwela nokupopya epata alishe, Ame nde li kufa mo medu laEgipiti: 2 “Onye amuke Ame nde mu hoolola momapata aeshe edu. Onghee hano Ame ohandi ke mu handukila molwowii weni aushe.” 3 Vavali otava kala tuu nokweenda pamwe, fimbo inava udafana tete? 4 Onghoshi otai ndunduma tuu momufitu, ngeenge inai mona oshihakanwa? Onghoshi onyasha otai yelula tuu ondaka yayo, ngeenge inai kwata sha? 5 Odila otai kwatwa tuu kelulo kombada yedu, ngeenge inai telwa omwiyo? Elulo otali xwanuka tuu pedu li kwate, ngeenge inali kumwa kusha? 6 Enghuma otali shikwa tuu moshilando noonakukalamo inava haluka? Omupya otau uya tuu moshilando, ngeenge Omwene ine u tuma. 7 Osheshi Omwene Kalunga ita ningi sha fimbo ina hololela ovapiya vaye ovaxunganeki omhangela yaye. 8 Onghoshi oya kumba, olyelye ngeno ita tila? Omwene Kalunga okwa popya, olyelye ita xunganeke?
9 Shi ingidileni eengulu doupuna domuAsdod neengulu doupuna domedu laEgipiti ndele mu tye: “Ongaleni komhunda yaSamaria, ndele taleni ekolokosho pokati koshilando nefininiko eli li li musho.”
10 Omwene ta ti: “Heeno, vo inava shiiva okulonga ouyuki, vo ava hava ndubile oupwidi nefininiko meengulu davo doupuna. 11 Onghee hano, osho Omwene ta ti: Omutondadi ta dingilile oshilongo! Ndele ye ota ka hanauna po ohotengulu yeni neengulu deni doupuna otadi ka tikishwa.”
12 Omwene osho ta ti: “Ngaashi omufita ta dulu ngeno okuxupifa mo omipindi mbali nokapambu kokutwi mokanya konghoshi, osho yo ovana vaIsrael otava xupifwa, ava ve li muSamaria nokukala omutumba mokolonela yombete ile kombada yoshiyata shadamas eshi sha yalwa koshipundi shile shetulumukilo. 13 Uda ndele londwela eumbo laJakob, Omwene Kalunga ta ti, Kalunga komatanga ovakwaita, 14 nokutya, Ame mefiku olo handi handukile omatauluko aIsrael, ohandi handukile yo eealtari domuBetel, opo eembinga doaltari tadi ka teywa po ndele tadi wile poshi. 15 Opo nee Ame handi ngumauna po ongulu yopokufu nongulu yopokulombo, ndele handi hanauna po eengulu domayoo eendjaba, ndele eengulu dihapu tadi kombwa po, Omwene ta ti.”
© Oshikwanyama Bible Revised © Bible Society of Namibia, 2008, 2012.
