Eimbilo lefindano laJuda
1 Mefiku tuu olo medu laJuda otamu imbwa eimbilo eli: “Fye otu na oshilando sha pama, exupifo ote li ningi ngaashi omakuma noluumbo nomamanya. 2 Yeululeni oivelo, oshiwana shiyuki opo shi shiive okuya mo, eshi sha kala oshidiinini. 3 Ou e neendunge da pama mwoove, Ove to mu diinine mombili, heeno, ombili, osheshi okwe ku lineekela. 4 Lineekeleni Omwene alushe, osheshi Omwene Kalunga Oye emanya laalushe. 5 Osheshi Ye okwa xutula poshi oonakukala pombada, noshilando she litumba pombada, Ye e shi finda poshi noye eshi ngumauna poshi fiyo mondwi. 6 Omhadi otai shi lyataula, eemhadi deehepele nomanha ovaxupi. 7 Elila lomuyuki ola yuka, elila lomuyuki, Ove to li yelakanifa. 8 Heeno, otwe ku teelela yo mondjila yomatokolo oye. Akutu Omwene, omwenyo wetu tau djuulukwa edina loye noku li dimbulukwa. 9 Omwenyo wange ohau ku djuulukwa oufiku, heeno, nomhepo yange meni lange otai ku kongo, osheshi omatokolo oye, ngeenge taa hange edu, ovakwaunyuni otave lilongo ouyuki. 10 Ou ehe na Kalunga nande na filwe onghenda, ite lilongo okushiiva ouyuki, medu louyuki oha kolokosha, ndele iha mono oshinge shOmwene.”
11 Omwene, eke loye ola yeluka, vo kave li wete. Ndelenee ouladi woye molwoshiwana nave ke u mone nokufifwa ohoni, nomundilo wa xwamena ovatondi voye nau ke va lafe po yo. 12 Omwene, Ove to tu pe ombili, osheshi oilonga yetu aishe yo Ove we i longa. 13 Omwene, Kalunga ketu, ope na oovene vamwe ve tu pangela, haave, ndelenee Oove auke hatu fimaneke, heeno, edina loye. 14 Ovo ova fya, itava ningi ovanamwenyo, ovo nomididimbe itava nyumuka. Ove we va handukila, we va hanauna po, ndele wa dima po edimbuluko lavo. 15 Akutu Omwene, Ove wa hapupalifa oshiwana, oshiwana we shi hapupalifa, ndele wa holola oshinge shoye, ndele wa tandavelifa eengaba doshilongo. 16 Omwene moudjuu otave ku kongo, omailikano avo ove a tilashi, outekuhandu woye eshi we va hanga. 17 Ngaashi edalo lomufimba la fika, ta fetwa, ndele ta ulu kokuyehama kwaye, osho fye tu li koshipala shoye, akutu Omwene. 18 Otwa li ovafimba, twa fetwa, ndele otwa fa twa dala omhepo; oshilongo inatu shi xupifa, oonakukala kombada yedu inava dalwa. 19 Ovafi voye otava ka ninga ovanamwenyo, oimhu yange otai ka nyumuka. Dudulukeni, nye mu nyakukwe, onye amushe ava mwa nangala mondwi, osheshi omume yoye oyo omume youyelele, nedu otali ka eta mo ovafi. 20 Hano oove, oshiwana shange, liidilila monduda yoye, u ka hondame okafimbo kanini, fimbo oupyuhandu tau pitilile po. 21 Osheshi tala, Omwene ta ka fikama a dje monhele yaye nonghone, a ka pule oilonga ii yoonakukala kombada yedu, nedu eli la pona ohonde otali i holola, ndele itali tuvike vali oonakudipawa valo.
© Oshikwanyama Bible Revised © Bible Society of Namibia, 2008, 2012.
