Ekemo mefimbo lomaudjuu manene
Epsalome laAsaf.
1 Akutu Kalunga, ovapaani ova pumina moinima yoye,
va nyateka otembeli yoye iyapuki,
Jerusalem ove shi ninga eputu loikulukuma.
2 Oimhu yovapiya voye ove i yandja
keedila dokeulu, di i lye po,
nomalutu ovakoshoki voye okoilyani yedu.
3 Ohonde yavo ove i tilashi ngaashi omeva
mominghulo adishe daJerusalem,
kapa li ou te va pake.
4 Otwa ninga oiyolifa yovashiinda vetu,
otwa ninga ovashekwa, hatu tukaelwa koilongo,
ei ya shaama nafye.
5 Omwene, fiyo onaini hano to kala wa handuka?
Nonya yoye fiyo onaini
tai kala ya xwama ngaashi omundilo?
6 Ehandu loye li tilila kombada yovapaani
ava inave ku shiiva,
nokombada yoilongo ei tai dini okwiifana edina loye.
7 Osheshi ova mana po Jakob,
ndele va hanauna po etungilo laye.
8 Ino tu kwatela onghone molwowii wootatekulu,
endelela u tu shakeneke nefilonghenda loye,
osheshi fye twa tyololoka shili.
9 Kalunga kexupifo letu,
tu kwafa, molwefimano ledina loye,
tu xupifa, Ove tu dimina po omatimba etu
molwedina loye!
10 Ongahelipi mbela ovapaani va pewe va tye:
“Kalunga kavo paife oku li nee peni?”
Koipala yetu natu talifwe ehandukilo lovapaani
molwohonde yovapiya voye, ei va tilashi.
11 Okunyemata kweenghwate naku udike kwoove,
nokwooko kwoye kweenghono
xupifa eemwenyo daava va tokolelwa okufya.
12 Ovashiinda vetu, esheko lavo,
eli ve ku sheka nalo Omwene,
li va shunifila meenhulo davo luheyali.
13 Ndelenee fye, ovanhu voye needi doufita woye,
otwa hala tu ku hambelele fiyo alushe;
nomapupi okomesho ohatu a udifile efimano loye.
© Oshikwanyama Bible Revised © Bible Society of Namibia, 2008, 2012.
