Paulus ta i kuTirus
1 Ndele opa ningwa, fye eshi twa tukauka navo notwa ya moskepa, otwa yaukila konhunhu yaKos, nefiku la shikula okuRodos, ndele eshi twa dja ko, otwe uya kuPatara. 2 Ndele eshi twa hanga ko oskepa tai i kuFoinikia, otwa londa mo ndele twa ya. 3 Ndele mokweenda kwetu Kipro eshi ya monika, notwe i ameka kolumosho, otwa ya twa yukilila kuSiria ndele twa londoloka muTirus, osheshi oskepa oya li i nokuhelula ofulaxa yayo kwinya. 4 Ndele eshi twa mona ovalongwa, otwa kala ko omafiku aheyali, ndele vo ova lombwela Paulus ngaashi va li va pewa kOmhepo Iyapuki, aha ye kuJerusalem. 5 Ndelenee eshi twa menekela ko omafiku oo, otwa fikama, ndele hatu i, vo aveshe ove tu findikila pamwe novakainhu nounona fiyo twa dja moshilando, ndele komunghulo wefuta otwa twa eengolo ndele hatu ilikana. 6 Ndele fye eshi twa lekelafana notwa ya moskepa, venya ova shuna komaumbo avo.
MuPtolemais nomuKesarea
7 Ndelenee mokudja muTirus otwe uya kuPtolemais, oku twa xulifa okweenda kwetu moskepa, ndele twa kunda ovamwatate, ndele twa kala puvo efiku limwe. 8 Ndele mefiku la shikula fye ava twa enda naPaulus, otwa fikama twe uya kuKesarea, ndele twa ya meumbo lomuevaengeliste Filippus, ou a li umwe waava vaheyali, ndele twa kala puye. 9 Ndele ou okwa li e novana oukadona vane, ava va li ve noshali yokuxunganeka. 10 Ndele fimbo twa menekela mo omafiku mahapu, pe uya omuxunganeki womuJudea, edina laye Agabus. 11 Ndele eshi e uya oku tu talela po, okwa kufa ekwamo laPaulus, ndele e li limangifa komaulu nokomaoko aye ndele ta ti: “Omhepo Iyapuki otai ti ngaha: ‘Mwene wekwamo eli osho ngaha Ovajuda tave ke mu manga muJerusalem ndele tave mu yandje momake ovapaani.’ ” 12 Ndele eshi twe shi uda, ofye novadalelwamo, otwe mu indila shili aha ye kuJerusalem. 13 Ndelenee Paulus a nyamukula ta ti: “Nye otamu ningi ngahelipi, eshi tamu kwena ndele tamu teyaula omutima wange, osheshi ame onde lilongekida, hakokumangwa akuke, ndelenee okufila yo edina lOmwene Jesus muJerusalem.” 14 Opo nee, ye eshi ine tu itavela, otwa mwena ndele hatu ti: “Ehalo lOmwene nali longwe.”
Paulus ta talele po Jakob
15 Ndele omafiku enya eshi a pita, otwe lilongekida notwa ya kuJerusalem. 16 Ndele ovalongwa vamwe vomuKesarea ove uya pamwe nafye, nove tu twala meumbo laMnason, Omukipro, omulongwa mukulu, fye tu ka menekele meumbo laye.
17 Ndele eshi twe uya muJerusalem, ovamwatate ove tu tambula nehafo. 18 Nefiku la shikula Paulus okwa ya pamwe nafye kuJakob. Ovakulunhu aveshe va ongalela mo. 19 Ndele Paulus eshi e va kunda, okwe va hepaululila aishe ei Kalunga e i longa mokati kovapaani mokulonga kwaye ovanhu. 20 Ndele eshi ve di uda ova hambelela Omwene ndele tava ti kuye: “Omumwatate, ove owe shi mona, Ovajuda omayovi mahapu nhumbi va ninga ovaitaveli, ndele ovo ovadiinini vakukutu vomhango. 21 Ndele vo ove ku kundana, vati oove to longo Ovajuda aveshe venya ve li mokati kovapaani okweefa Moses, ndele to va lombwele vaha pitife vali ovana vavo etanda novaha ende vali paenghedi da ufwa. 22 Ohatu ningi ngahelipi hano? Ou wete kutya otapa ongala ongudu inene, shimha tuu tave ku udu we uya. 23 Hano ninga osho hatu shi ku lombwele paife. Omu otu novalumenhu vane, ve na eano oku li wanifa. 24 Tambula hano ava, ove u liyelife pamwe navo, ove u va futile yo ve likululife eexwiki davo dokomutwe, opo nee vo aveshe otave shi mono, aishe ei to i popilwa kai nomutwe noxulo, osheshi naave yo oho kala momhango, ndele to i diinine. 25 Ndele mokupopya ovapaani ovo va itavela, ofye twe va pangelela omhangela ndele twe va shangela, ovo ve nokulidilika eembelela domayambo nohonde nombelela ya pondwa, vo ve likelele ohole yoipala.” 26 Opo nee Paulus okwa tambula ovalumenhu venya ndele e liyelifa mefiku la shikula pamwe navo, nokwa ya motembeli ndele ta holola efimbo lokuxulifa omafiku omayelifo avo, opo eyandjelo lakeshe ou li etwe mo, efimbo olo manga inali xula po.
Paulus ta kwatwa
27 Ndelenee omafiku enya aheyali eshi e li pokuxula po, Ovajuda vomuAsia ove mu mona motembeli, va piyaaneka ongudu aishe yovanhu ndele ve mu kwata, 28 ndele tava popi pombada: “Ovalumenhu nye Ovaisraeli, tu kwafeni! Omunhu oye tuu ou ha longo akushe ovanhu aveshe noku va twifa ondubo noshiwana eshi nomhango nonhele ei, oye okwa etele mo Ovagreka motembeli omu, ndele okwa nyatekifa onhele ei iyapuki.” 29 Osheshi ova mona Trofimus, Omuefeso, oo a li pamwe naye moshilando, ndele va li ve shii, Paulus e mu eta motembeli. 30 Oshilando ashishe osha hovela okukulukuta, ovanhu ova tondokela ko ndele va kwata Paulus, ndele tave mu kokolola mo motembeli, opo nee oivelo oya idilwa po. 31 Ndele eshi va hetekela oku mu dipaa, omuneyovi okwa uda kutya Jerusalem ashishe osha dundakana. 32 Ndele ye okwa kufa diva ovakwaita novanefele, ndele okwa tondokela ko kuvo. Opo nee vo eshi va mona omuneyovi novakwaita, ova efa okudenga Paulus. 33 Omuneyovi okwe uya po ndele te mu kwatifa, ndele ta yandje elombwelo a mangwe nomalyenge avali, ndee ta pula kutya oye olyelye nokwa ninga shike. 34 Ndele mongudu yovanhu vamwe ova ingida onhumba, navakwao ongadi, naye eshi a nyengwa oku di shiiva mokati komapopyaano, okwa pula a twalwe kongulu youkwaita. 35 Ndele eshi e uya poilyatelelo, ovakwaita ova li ve noku mu humbata, ovanhu vaha dule oku mu nhukila. 36 Osheshi ongudu inene oya shikula mo ndele tai ingida: “Mu kufa po!”
37 Ndele eshi va li va hala ve mu twale meni longulu, Paulus okwa tya komuneyovi: “Otashi dulika tuu mbela tu likunde po?” Winya ta ti: “Ou shii tuu Oshigreka? 38 Hamba haave Omuegipiti ou a twifa ondubo momafiku opaife, ovakolokoshi venya omayovi ane nokwe va twala mombuwa?” 39 Ndele Paulus okwa nyamukula: “Aame Omujuda womuTarso, omunhu womoshilando shinya sha fimana shomuKilikia, ohandi ku indile, kwafe nge ndi popye novanhu ava.” 40 Ndele ye eshi e mu itavelela, Paulus okwa kala ofika koilyatelelo ndele ta yelulile ovanhu eke. Vo eshi va mwena, okwe va popifa mOshiheberi, ndele ta ti:
© Oshikwanyama Bible Revised © Bible Society of Namibia, 2008, 2012.
