Rehabeam ta kelelwa okulwa nOvaisraeli
1 Ndele Rehabeam eshi e uya kuJerusalem, okwa shiva epata laJuda nolaBenjamin, ovalumenhu ovanyasha va wana okulwa, ve fike pomayovi efele nomilongo hetatu, va ka homone Israel, va alulile Rehabeam ouhamba. 2 Ndelenee ondjovo yaKalunga ye uya kuShemaia, omulumenhu waKalunga ndele tai ti: 3 “Lombwela Rehabeam yaSalomo, novanhu aveshe moilando yaJuda naBenjamin, u tye: 4 ‘Inamu dengafana nOvaisraeli shaashi nye vamwe aveke. Shuneni amushe komaumbo, osheshi eshi sha ningwa kehalo lange.’ ” Vo aveshe va dulika keendjovo dOmwene ndele va shuna komaumbo. Inava homona Jerobeam.
Rehabeam ta pameke oshilongo shaye
5 Ndele Rehabeam okwa kala muJerusalem nokwa pameka oilando yomuJuda neehotekuma. 6 Osheshi a tunga eehotekuma kuBetlehem nokuEtam nokuTekoa, 7 nokuBet-Sur nokuSoko nokuAdullam, 8 nokuGat nokuMaresa nokuSif, 9 nokuAdoraim nokuLakis nokuAseka, 10 nokuSorea nokuAijalon nokuHebron. Oyo oilando i neehotekuma muJuda nomuBenjamin. 11 Nokwa pameka oilando i neehotekuma ndele ta tula mo ovakulunhu vovakwaita ve noituvikilwa yeendja nomaadi nomaviinyu, 12 nomoshilando keshe oikelelifo inene nomaonga. Nokwe i pameka shili unene. Ndele Juda naBenjamin ya kala mepangelo laye.
13 Novapristeli nOvalevi ovo va li muIsrael ashishe va dja moshilongo ashishe, ve uya kuye. 14 Osheshi Ovalevi va fiya po omaulifilo noitukulwafyuululo yavo, ndele ve uya kuJuda nokuJerusalem. Shaashi Jerobeam novana vaye ovalumenhu ve va ta mo, vo inava itavelwa vali okukala ovapristeli vOmwene. 15 Ndele ye okwe likongela ovapristeli va kalela oikulundu neendemoni domofuka neenhana deemhedi, e di ningifa. 16 Ndele venya va shikulwa kuvo va dja momapata aeshe aIsrael, nokutya ovo va yukifa omitima davo okukonga Omwene Kalunga kaIsrael, ve uya kuJerusalem va ka yambele Omwene Kalunga kooxe. 17 Ndele osho va pameka ouhamba waJuda ndele va yambidida Rehabeam yaSalomo omido nhatu, osheshi va enda nondjila yaDavid noyaSalomo omido nhatu.
Ovalikadi vaRehabeam novana vaye
18 Ndele Rehabeam okwa hombola Mahalat, omona okakadona kaJerimot yaDavid nokaAbigail, omona okakadona kaEliab yaIsai. 19 Nokwe mu dalela ovana ovamati: Jehus naShemaria naSaham. 20 Ndele konima yaasho okwa hombola Maaka, omona waAbsalom, ndele ye okwe mu dalela Abia naAttai naSisa naSelomit. 21 Ndele Rehabeam okwa li e hole Maaka, omona waAbsalom, komesho yovalikadi vaye novalikadi vaye vopomunghulo. Osheshi okwa konga ovalikadi omulongo navahetatu novalikadi vopomunghulo omilongo hamano. Nokwa ninga xe yovana omilongo mbali navahetatu ovalumenhu novana oukadona omilongo hamano. 22 Ndele Rehabeam okwa lenga Abia, omona waMaaka, a ninga omukulunhu mokati kovamwaxe aveshe, shaashi okwa li a hala oku mu ninga ohamba. 23 Nokwa enda neendunge ndele ta tukulile ovana vaye ovalumenhu aveshe oilongo noilando aishe i neehotekuma yomuJuda noyomuBenjamin, nokwe va pa eendja dihapu ndele te va kongele ovalikadi vahapu.
© Oshikwanyama Bible Revised © Bible Society of Namibia, 2008, 2012.
