Elidilululo ile efyo
1 Ndele pefimbo olo opa hangika vamwe ve mu hepaululila Ovagalilea ovo Pilatus a lumbakanifa ohonde yavo mumwe nomaxwikiloyambo avo. 2 Ndele Jesus okwe va nyamukula ta ti: “Omu shii Ovagalilea venya va hepekwa ngahenya ova li ovalunde ve dule Ovagalilea vakwao? 3 Ahowe, ndele ngeenge itamu lidilulula, osho nanye yo tamu ka nyonauka po amushe. 4 Ile mu shii omulongo navahetatu venya va fya, eshi va wilwa koshungo yomuSiloa ova li ovalunde ve dule Ovajerusalem vakwao aveshe? 5 Ahowe, ndele nanye yo, ngeenge itamu lidilulula, osho tuu tamu ka nyonauka po amushe.”
Omukwiyu inau ima
6 Ndele Ye okwe va lombwela efaneko eli: “Okwa li ku na omunhu e na omukwiyu wa twikwa mepya laye lomiviinyu, ndele ye okwe uya okukonga mo oiimati muwo, ye ine i mona mo. 7 Ndele a lombwela omulongi wepya lomiviinyu: ‘Tala, omido nhatu nda ile okukonga oiimati momukwiyu ou, ame inandi mona mo sha. U ka po. Oshike tau kufa ashike edu eenghono?’ 8 Ndelenee winya okwe mu nyamukula ta ti: ‘Omwene, u efa manga neudo, fimbo handi u helele vali, ndele handi u tutile oushosho. 9 Kashiimba tau imi tuu omudo ou tau uya, ndele ngeenge itau imi, opo nee nau kewe po.’ ”
Omukainhu ta velulwa
10 Ndele Ye okwa hangika ta longo moshinagoga mefiku lEshabata. 11 Ndele tala, omo omwa hangikile omukainhu e nomhepo youngone ya kala muye omido Omulongo nahetatu, ndele ye okwa enda omwoodimba, ina shiiva nande okuyukilila. 12 Ndele Jesus eshi e mu mona, okwe mu ifana ndele ta ti kuye: “Omukainhu, wa veluka koudu woye,” 13 opo Ye okwe mu tenheka omake aye, nopo tuu opo ye okwa yukilila ndele okwa hambelela Kalunga. 14 Ndelenee mwene woshinagoga okwa umana, Jesus eshi a velula mEshabata, okwa hovela okupopya ndele ta lombwele ovanhu: “Oku na omafiku ahamano oilonga, ileni hano momafiku oo mu velulwe, ndele hamEshabata.” 15 Ndele Omwene okwe mu nyamukula, ta ti: “Omunaihelele ove, nanye yo ihamu pitifa mo ongobe ile okambulu keni moshuunda mEshabata, nye mu ke ka xwiile? 16 Ndelenee omukainhu ou, omona waAbraham, Satana e mu kwatelela meemhango, tala, omido omulongo nahetatu nokuli, aha mangululwe hamba meemhango edi mefiku lEshabata?” 17 Ndele eshi a popya odo, ovatondi vaye aveshe ova fya ohoni, nongudu aishe ya nyakukilwa oilonga yaye inene iwa.
Ombuto yoshinapi nonhafi
18 Ndele Ye okwa tya: “Ouhamba waKalunga owa fa shike, ndele handi u faneke nashike? 19 Oo wa fa ombuto yoshinapi, omunhu e i kufa ndele okwe i kuna moshikunino shaye, oya mena ndele ya kula ndee tai ningi omuti, needila dokeulu oda tunga oihadi yado moitai yao.”
20 Ndele okwa tya vali: “Ouhamba waKalunga nandi u faneke nashike? 21 Oo owa fa onhafi, omukainhu e i kufa ndele okwe i pilulila moufila weelita omilongo nhee fiyo aushe wa pya.”
Oshivelo sha finana
22 Ndele Ye okwa endaenda koshilando noshilando, komukunda nomukunda, a longa ovanhu nokwa ya kuJerusalem. 23 Umwe okwe mu pula: “Omwene, ava tava xupifwa ovanini hamba?” Ye okwe va lombwela: 24 “Kondjeni mu ye mo moshivelo sha finana, osheshi handi mu lombwele, vahapu tava kendabala okuya mo, ndele tava ka nyengwa.
25 “Mwene weumbo ngeenge a fikama ndele ta pate po omuvelo, nye otamu hovele okukala ofika pondje nokukonghola pomuvelo nokwiifana: ‘Omwene, tu yeulula,’ Ye ote mu nyamukula ta ti: ‘Ame nghi mu shii, ndele nghi shii apa mwa dja.’ 26 Nye otamu hovele okupopya: ‘Hafye tuu ovo twa lile ndele twa nwine moipafi yoye, ndele Ove wa longa momapandavanda etu?’ 27 Ndele Ye ota ti: ‘Ohandi mu lombwele, Ame nghi mu shii apa mwa dja; djeni po pwaame, nye amushe ovalongi vowii.’ 28 Ndele oko tapa ka kala omalilaano nelikweshelo lomayoo, nge tamu mono Abraham naIsak naJakob novaxunganeki aveshe mouhamba waKalunga, ndelenee nye mwa undulilwa pondje. 29 Ndele ovanhu otava ka dja koushilo nokouninginino nokoumbangalanhu nokoumbuwanhu, tave uya ndele otava kala omutumba poshililo mouhamba waKalunga. 30 Ndele tala, oku na vaxuuninwa tava ningi votete, ndele ku na votete tava ningi vaxuuninwa.”
Jesus ta londolwa
31 Ndele pefimbo tuu olo Ovafarisai vamwe ve uya po ndele ve mu lombwela: “Fikama Ove u dje po apa, osheshi Herodes a hala oku ku dipaa.” 32 Ndele Ye okwa tya kuvo: “Indeni mu ka lombwele okavandje oko, mu tye: ‘Tala, onena nomongula handi te mo eendemoni nohandi velula, ndele efiku etitatu ohandi ka hanga efikilo.’ 33 Ndelenee ondi nokweendaenda nena nomongula nomongheleinya, osheshi itashi ningwa omuxunganeki a file pamwe pe lili, muJerusalem omo tuu.
Ekweno laJesus molwaJerusalem
34 “Jerusalem, Jerusalem, ove ou ho dipaa ovaxunganeki noho dipaa nomamanya ovo we va tuminwa, lungapi nda li nda hala okwoongela ovamwoye, ngaashi oxuxwa hai ongele ouxuxwena momavava ayo, ndele nye inamu hala. 35 Tala, ongulu yeni otai kala ongaho, ndele handi mu lombwele: itamu mono nge vali fiyo efimbo olo tali uya, fiku tamu ti: ‘Na nangekwe noupuna, ou te uya medina lOmwene.’ ”
© Oshikwanyama Bible Revised © Bible Society of Namibia, 2008, 2012.
