Ehanauko laBabilon
1 Londoloka, u kale omutumba mondwi yedu, oove okakadona, omona okakadona Babilon. Kala omutumba pedu longaho, uhe na olukalwapangelo, oove omona okakadona kaKaldea, osheshi ito ifanwa vali omundebauki nomupu. 2 Kufa omushi u ka twe oufila; uvukulula oshipala shoye, tonya ominghulo doshikutu shoye, uvukulula omipindi doye, tauluka omilonga. 3 Uvukulula ohoni yoye, heeno, noukainhu woye tau ka monika. Ame ohandi ka xwenena, ndele ihandi ka fila nande omunhu onghenda. 4 Edina lOmukulili wetu olo Omwene womatanga ovakwaita, Omuyapuki waIsrael.
5 Kala omutumba wa mwena filu, inda momilaulu, oove omona okakadona kaKaldea; osheshi ito ifanwa vali omupangeli woilongo. 6 Ame onda handukila ovanhu vange, nda fifa ohoni efyuululo lange, nonde va yandja momake oye, ove ino va fila onghenda, ndele wa twika omushamane ondjoko yoye idjuu unene; 7 ndele wa tya: Ame ohandi ka kala alushe omupangeli, nongaashi ino i lipulapula momutima woye, noino diladila exulilo loye. 8 Hano paife pwilikina, ove ou u hole mouwa, wa kala omutumba kolukalwapangelo, uhe na oshisho wa diladila komutima woye: aame andike, kape na vali umwe. Ame itandi ka ninga omufiyekadi ile ndi kale ongadji. 9 Ndelenee oinima ei ivali otai ke ku hanga shimwe mefiku limwe, to kala uhe na oludalo ndele to ningi omufiyekadi wa papala ye ku hanga, nande ou nongudu yovanyanekeli nomuvalu weemhule muhapu. 10 Owa kala wa pamenena mowii woye, ove owa tile: Kape na ou ta mono nge. Eendunge doye nomayele oye okwe ku pukifa, nongaashi wa diladila komutima woye: “Aame andike, kape na vali umwe.” 11 Opo nee omupya otau ku hange, ito shiiva oku u ta po nounongo woulodi woye; ehanauno otali ku hange, ndele ito dulu oku li ta po, okuteka po kwoye taku uya divadiva fimbo ino shi shiiva. 12 Holoka noupule woye pamwe nongudu yeedudu doye we lihepeka nado okounyasha woye, pamwe to dulu sha, pamwe to tilifa sha. 13 Ove we lilolokifa, eshi to diladila eshi naashinya. Nava holoke ve ku xupife, ovo tuu ovo hava koneke eulu nohava tale eenyofi, ovo tave ku lombwele keshe ohani, eshi tashi ku hange. 14 Tala, ovo va fa olungu, nomundilo otau va lungwinifa po, ndele vo itave lixupifa mo meenghono domundilo. Kau fi omundilo womakala wokuxuxumukwa, kau fi omundilo wokukalwa puwo omutumba. 15 Hano osho ove to ka ningwa kuvenya we ve lihepekela okounyasha woye; ovo tuu ovo mwa landafana navo, ova pepuka po, va xwateka, va ya, kape na ou te ku xupifa.
© Oshikwanyama Bible Revised © Bible Society of Namibia, 2008, 2012.
