Ava inava yela ve nokupitifwa mo monhanda
1 NOmwene okwa popya naMoses ndee ta ti: 2 “Lombwela ovana vaIsrael nokutya, nava pitife mo monhanda ovanhu aveshe ve noudu woshilundu naaveshe ava ve netiko lomaxu naaveshe ava ve linyateka koshimhu. 3 Mu nokupitifa mo omulumenhu nomukainhu. Mu noku va pitifa mo pondje kombada yonhanda, vaha nyateke onhanda yavo, muyo Ame handi kala mokati kavo.” 4 Ndele ovana vaIsrael osho va ninga ndele ve va pitifa mo pondje kombada yonhanda. Ngaashi Omwene a lombwela Moses osho ovana vaIsrael va ninga.
Efutilo loukolokoshi
5 Omwene okwa popya vali naMoses, 6 a lombwele ovana vaIsrael a tye kuvo: “Ngeenge omulumenhu ile omukainhu ta nyono, ngaashi ovanhu hava nyono mokuhadiinina Omwene, nomwenyo otau pewa oushima, 7 Opo ye e nokuhepaulula etimba laye e li ninga. Opo nee ta alula oikolo yaye noku i wanifa nokuweda po oshititano shayo, ndele ye e noku i pa ou, ye e noikolo naye. 8 Ndelenee winya ngeenge ke nomunhu oku mu kulila, ou ta dulu okwaalula oikolo, opo oikolo nai alulilwe Omwene nokutya, omupristeli, ndee ta weda po odi yomhedi yekwatakanifo, opo winya a kwatakanifwe nayo.
9 “Neyambo keshe lomeeshaliyambo diyapuki dovana vaIsrael tave di eta komupristeli, li nokuninga laye. 10 Neeshaliyambo diyapuki dakeshe umwe, di nokuninga daye. Eshi tashi yandjwa komupristeli, shi nokuninga shaye.”
Eendjayambo doukodi momeva okutulomutima
11 Omwene okwa popya vali naMoses, 12 a lombwele ovana vaIsrael a tye kuvo: “Ngeenge pe na ou omwalikadi waye ta nyono kuye ndee ta teya po ohombo naye 13 nomulumenhu umwe ta nangala naye, ndelenee eshi sha kala sha holekwa momesho omulumenhu waye, ndele ye ine shi shiiva, nande omukainhu e linyateka, fimbo inapa kala nande ondobwedi ndele ina kwatelwa moshilonga shaye; 14 ndele omhepo youkodi ya hanga omulumenhu, onghee ta file omwalikadi waye, ou e linyateka, oukodi ile omhepo youkodi ya hanga omulumenhu ndee ta file omwalikadi waye oukodi, ou nande ine linyateka; 15 Opo nee omulumenhu na ete omwalikadi waye komupristeli noku mu yandjela eyambo: oufila woilya okilograma imwe, ndelenee kombada yao aha tile ko omaadi ndee aha wede ko oitwiminifo, shaashi olo eendjayambo doukodi, edimbulukifoyambo, tali dimbulukifa owii. 16 Nomupristeli na ehenife omwalikadi noku mu kalekela koshipala shOmwene. 17 Nomupristeli na tile moshiyuma shedu omeva mayapuki ndee na kufe mondwi ei i li poshi yetwali liyapuki ndee e i tule momeva. 18 Opo nee omupristeli e nokukaleka omukainhu koshipala shOmwene, ye na pandulule eexwiki dokomutwe womukainhu, ndee na tule edimbulukifoyambo momake aye, olo eendjayambo doukodi. Ndele meke lomupristeli mu nokukala omeva ouyehame mulula, oo taa eta etulomutima.
19 Nomupristeli e noku mu anifa nokulombwela omukainhu: “Omulumenhu nande umwe ngeenge ina nangala naave ndele ino nyona komulumenhu woye mokulinyateka, hano omeva aa ouyehame mulula, aa taa eta etulomutima itae ku ningi sha. 20 Ndelenee ove, ngeenge wa nyona komulumenhu woye, ndele we linyateka mokunangala nomulumenhu umwe ehe fi woye mwene, 21 opo nee omupristeli e nokwaanifa omukainhu neano lefingo, nomupristeli e nokulombwela omukainhu: Omwene ne ku ninge efingo netukano mokati koshiwana sheni, Omwene eshi ta fipatelifa oiya yoye ndee ta dindike edimo loye; 22 Omeva aa efingo naa ye momandjadja oye, opo oshiya shoye shi fipatele nedimo loye li dinde.” Nomukainhu na tye: “Amen, Amen.” 23 Opo nee eendjovo edi omupristeli ne di shangele mokafo, ye ne ka fetifile momeva efingo. 24 Opo nee omeva aa efingo ne a nwefe omukainhu, omeva aa taa eta etulomutima, opo omeva aa taa eta etulomutima a shiive okuya meni laye a ninge ouyehame mulula. 25 Nomupristeli na tambule meke lomukainhu eendjayambo doukodi, neendjayambo te di dungadungifa koshipala shOmwene ndee te di twala koaltari. 26 Omupristeli e nokukufa yo meendjayambo eke li yadi ngaashi edimbulukifoyambo noku di xwika po koaltari. Opo nee ta nwefa omukainhu omeva. 27 Ye eshi a nwefa omukainhu omeva, opo nee ye, ngeenge e linyateka nokunyona komulumenhu waye mokuhaelwa, omeva aa taa eta etulomutima taa i meni laye ngaashi ouyehame mulula nedimo laye tali ka dinda noshiya shaye tashi ka fipatela. Nomukainhu ou ta ka ninga omufingwa mokati koshiwana shavo. 28 Ndelenee omukainhu ngeenge ine linyateka, ndelenee a yela ita mono oshiponga ndee ta kala e noludalo.
29 “Omhango youkodi oyei: Omwalikadi ngeenge ta nangala naumwe fimbo e nomulumenhu waye, ote linyateke 30 ile omhepo youkodi ngeenge tai hange omulumenhu ndee ta file omwalikadi waye oukodi, opo ye e nokutwala omwalikadi waye koshipala shOmwene, nomupristeli e noku mu ningila pamhango tuu ei. 31 Nomulumenhu ota ka kala nowino, ndelenee omwalikadi ou e nokuhumbata etimba laye.”
© Oshikwanyama Bible Revised © Bible Society of Namibia, 2008, 2012.
