HESEKIEL 20 - Oshikwanyama Bible (OKYB)

Okuhadulika kwaIsrael

1 Ndele momudo omutiheyali mohani onhinhano, etimulongo lohani, ovalumenhu vomovakulunhu vomuIsrael ve uya okupula ounongo kOmwene, ndele vo va kala omutumba koshipala shange. 2 Opo nee ondjovo yOmwene ye uya kwaame, ndele tai ti: 3 “Kaana komunhu, lombwela ovakulunhu vomuIsrael u tye kuvo: Omwene Kalunga osho ta ti: nye omwe uya okupula nge ounongo? Oshili, ngaashi Ame ndi nomwenyo, oshilielela, Ame ihandi pulwa ounongo kunye, Omwene Kalunga ta ti.

4 “Kaana komunhu, ino hala oku va tokola, oku va tokola? Va hololela hano oixuna yooxe 5 u tye kuvo: Omwene Kalunga osho ta ti: Mefiku linya Ame nda hoolola Israel, onda yelulilile oludalo leumbo laJakob eke lange, ndele Ame nde liholola kuvo medu laEgipiti. Heeno, nde va yelulilile eke lange, ndele handi ti: Aame Omwene Kalunga keni. 6 Mefiku tuu linya Ame nde va yelulila eke lange, ndi va pitife mo muEgipiti noku va twala koshilongo, nde shi va kongela, oshilongo shi yadi omashini nomaadi eenyiki, osho efimano mokati koilongo aishe. 7 Ndele Ame onde va lombwela: Ekeleishi, keshe umwe, oififahoni momesho eni, ndele inamu linyateka noikalunga yomuEgipiti: Aame Omwene Kalunga keni.

8 “Ndelenee vo inava dulika kwaame ndele inava hala okupwilikina nge. Nande umwe ina ekelashi oififahoni momesho aye ile ine liteeka oikalunga yomuEgipiti. Opo nee Ame nda tya, Ame ohandi ka tilashi oupyuhandu wange kombada yavo, opo ehandu lange li wanifilwe muvo medu laEgipiti. 9 Ndelenee, Ame onde shi ningile molwedina lange, opo liha dinwe momesho oiwana yovapaani mokati kavo ova kala, nomoipafi yayo Ame nde i lishiivifila moku va pitifa medu laEgipiti. 10 Ndele Ame nde va pitifa mo medu laEgipiti nonde va eta mombuwa. 11 Ndele Ame nde va pa eenghedimhango dange, ndele nde va shiivifila omalombwelo ange, omunhu ou te a diinine, ta kala e nomwenyo molwao. 12 Nomashabata ange, Ame nde e va pa, a ninge edidiliko pokati ketu navo, opo va shiive nokutya, Aame Omwene ohandi va yapula. 13 Ndelenee eumbo laIsrael la li li nondubo naame mombuwa. Vo inava shikula eenghedimhango dange, ndele va ekelashi omalombwelo ange, oo e nokudiininwa komunhu, ye opo a kale e nomwenyo. Nomashabata ange ove a xutulifa unene. Opo nee nda tile nokutya, ohandi ka tilila kombada yavo oupyuhandu wange mombuwa, ndi va mane po. 14 Ndelenee Ame nde shi ninga molwedina lange, opo liha dinwe momesho oiwana yovapaani, moipafi yavo Ame nde mu pitifa mo.

15 “Onghee hano Ame nde va yelulilile yo eke lange mombuwa, opo Ame ndihe va twale moshilongo osho shi yadi omashini nomaadi eenyiki, osho efimano mokati koilongo aishe. 16 Osheshi va ekelashi omalombwelo ange ndele inava shikula eenghedimhango dange nova xutulifa omashabata ange. Osheshi omitima davo da shikula oikalunga yavo. 17 Ndelenee eisho lange le va tala nolukeno, onghee inandi va komba po noinandi va mana po sheke mombuwa. 18 Ndelenee nda lombwela oludalo lavo mombuwa handi ti: Inamu kala nokweenda meenghedimhango dooxo, ndele inamu kala nokudiinina omalombwelo avo, ndele inamu linyateka noikalunga yavo. 19 Aame Omwene Kalunga keni. Shikuleni eenghedimhango dange diinineni omalombwelo ange noku a wanifa, 20 ndele yapuleni omashabata ange. Ndele oo taa ka ninga edidiliko pokati ketu nanye, opo mu shiive nokutya, Aame Omwene Kalunga keni.

21 “Ndelenee oludalo la li li nondubo naame. Vo inava shikula eenghedimhango dange, inava diinina omalombwelo ange, aa e nokudiininwa komunhu, opo ye a kale e nomwenyo molwao. Vo ova xutulifa omashabata ange. Opo nee Ame nda tile nokutya, ohandi ka tilashi oupyuhandu wange kombada yavo, opo ehandu lange li wanifwe muvo mombuwa. 22 Ndelenee Ame nda alula eke lange ndele nde shi ninga molwedina lange, opo liha dinwe momesho oiwana yovapaani, moipafi yavo Ame nde va pitifa mo. 23 Ndele Ame onde va yelulilile eke lange mombuwa, opo Ame ohandi ke va undwila mokati koiwana ndele vo otave ke lihanena moilongo. 24 Osheshi vo inava diinina omalombwelo ange, ndelenee va ekelashi eenghedimhango dange, ndele va xutulifa omashabata ange ndele omesho avo a taalela oikalunga yooxe. 25 Osho hano naame yo nde va pa eenghedimhango kada li diwa nomalombwelo muwo vo itava mono omwenyo. 26 Ndele Ame onde va nyatekifa molwomayambo avo, osheshi vo va yambela omundilo oiveli aishe ei tai yeulula oshidalelo shaina, opo Ame ndi shiive oku va nyona po, vo va shiive nokutya, Aame Omwene.

27 “Onghee hano kaana komunhu, lombwela eumbo laIsrael u tye kuvo: Omwene Kalunga ta ti ngaha: ooxo ova sheka nge vali eshi ve liteeka nge. 28 Ame eshi nde va eta moshilongo, molwaasho Ame nda yelulile eke lange ndi shi va pe, vo ova taalela koikulundudu aishe ile nokomiti adishe ditalala, oko va tomena omayambo avo ndele va yamba omayambo a nyonyodolifa ndele oko va eta edimba liwa lomatwimino noko va tilashi oikunwayambo. 29 Opo nee Ame nde va lombwela: Oshikulundudu osho oshashike oko tamu i? Ndele vo ove i luka oikulundu yokuyambela fiyo onena eli.”

Etokolo neudaneko

30 “Onghee hano lombwela eumbo laIsrael u tye: Omwene Kalunga ota ti ngaha: Oshike? Nye otamu linyateke mondjila yooxo ndele mokuliteeka otamu shikula oififahoni yavo. 31 Heeno, nye omwe linyateka noikalunga yeni aishe fiyo onena eli, eshi tamu eta omayambo eni notamu yambele omundilo ovana veni ovamati: Ame ndi itavele ngeno ndi pulwe ounongo kunye, eumbo laIsrael? Oshili, ngaashi ndi nomwenyo, Omwene Kalunga ta ti, Ame ihandi shi itavele nye mu pule nge ounongo. 32 Ndele osho she uya momhepo yeni, oshili, itashi ka ningwa, osho eshi tamu ti: fye otwa hala tu kale ngaashi oiwana, ngaashi omaludi makwao, tu fimaneke oshiti nemanya. 33 Oshili ngaashi ndi nomwenyo, Omwene Kalunga ta ti, oshilielela, Ame ohandi ke mu pangela neke li neenghono nokwooko kwa nanwa noupyuhandu wa tilwashi. 34 Ndele Ame ohandi ke mu pitifa mo moiwana nohandi mu kongolola moilongo mwa halakanifilwa mo, Ame ohandi ke shi ninga neke li neenghono nokwooko kwa nanwa noupyuhandu wa tilwashi. 35 Ndele Ame ohandi ke mu eta mombuwa yoiwana, ndele oko Ame ohandi ke mu tokolela koshipala noshipala. 36 Ngaashi nda tokolele ooxo mombuwa yedu laEgipiti, nosho yo Ame ohandi ke mu tokolela, Omwene Kalunga ta ti.”

37 “Ndele Ame ohandi ke mu endifila koshi yodibo yomufita ndele handi mu eta mofipa yehangano. 38 Ndele Ame ohandi ka tongola mo mokati keni ovo ve nondubo ndele ve liteeka nge. Ame ohandi ke va pitifa mo moshilongo omo va kala ovanailongo, ndelenee vo itave ke uya medu laIsrael. Ndele vo otava ka shiiva nokutya, Aame Omwene.”

39 Ndelenee akutu, oove eumbo laIsrael! Omwene Kalunga ta ti ngaha: “Indeni mu ka fimaneke oikalunga yeni, keshe umwe. Ndelenee mefimbo tali uya, oshilielela, nye otamu ka pwilikina nge, ndele itamu dini vali edina lange liyapuki nomayambo eni noikalunga yeni. 40 Osheshi Omwene Kalunga ta ti: Komhunda yange iyapuki, komhunda ile yaIsrael, oko eumbo alishe laIsrael, vo aveshe, otava ka fimaneka nge moshilongo shavo. Oko Ame ohandi ke va hokwa, oko Ame ohandi kala nokuhala omayambo eni noipeyambo neeshali adishe deni diyapuki. 41 Ngaashi edimba liwa ohandi mu tambula, ngeenge handi mu pitifa mo moiwana ndele handi mu kongolola moilongo omo mwa halakanifilwa mo, ndele Ame ohandi ke mu lishiivifila, ngaashi Omuyapuki moipafi yoiwana.

42 “Ndele nye otamu ka shiiva nokutya, Aame Omwene, ngeenge Ame handi ke mu eta medu laIsrael, moshilongo nde shi udanekela ooxo neke la yeluka ndi shi va pe. 43 Oko nye otamu ka dimbulukwa eendjila deni noilonga yeni aishe nayo mwe linyateka, ndele nye otamu ke linyonyodola nye vene molwoinima aishe ii mwe i longa. 44 Ndele nye otamu ka shiiva nokutya, Aame Omwene, ngeenge Ame eshi nde shi ningila onde shi ninga omolwedina lange, hamolweendjila deni dii ile omolwoilonga yeni ii, akutu, oove eumbo laIsrael, Omwene Kalunga ta ti.”

45 Ondjovo yOmwene ye uya kwaame ndele tai ti: 46 “Kaana komunhu, taalelifa oshipala shoye koumbuwanhu neendjovo doye nadi kolokele ombuwanhu ndele xunganeka okuvela ombedi omufitu, nokutya, oshilongo shaumbuwanhu 47 u tye komufitu womoshilongo shaumbuwanhu: Pwilikina ondjovo yOmwene: Omwene Kalunga ta ti ngaha: Tala, ame ohandi tema mwoove omundilo, tau ka lungwinifa po keshe omuti mutalala nokeshe omuti mukukutu. Elaka lomundilo wa xwama itali ka dima po, noipala aishe tai ka lungwinifwa po kulo okudja koshilongo shoumbuwanhu fiyo okoumbangalanhu. 48 Nombelela aishe tai ka mona nokutya, Aame Omwene, nde u tema. Woo itau ka dima po.” 49 Opo nee ame nda tile: “Akutu, Omwene Kalunga, vo otava lombwele nge: ‘ou ota popi hamba alushe momakumbiko.’ ”