Efininiko laJerusalem
1 Ndele momafiku aAhas yaJotam yaUssia, ohamba yaJuda, Resin, ohamba yaAram naPeka yaRemalja, ohamba yaIsrael, oda shingila oita kuJerusalem, ndele ova tewa. 2 Eshi va tuma elaka keumbo laDavid, ndele tava ti: Aram osha onga eenhanda kuEfraim, omutima wohamba nomitima dovanhu vaye oda kakama ngaashi omiti domomufitu tadi kakama komhepo. 3 NOmwene okwa lombwela Jesaja, ndele ta ti: “Fikama nomumwoye Sear Jasub u shakeneke Ahas, apa pa hovela omunino womeva tau di metale lokombada, omondjila yOkaalanga yomushiki woikafa, 4 u mu lombwele u tye: Lilongelela wa mwena, ino tila, nomutima woye inau fya ounye nokutila oitetela ivali yoikuni tai twimina omwifi, oupyuhandu waResin nOvaaramea, nowa ou, omona waRemalja. 5 Osheshi Aram naEfraim nomona waRemalja ove ku pangelela omhangela ii, tava ti: 6 Tu yeni, tu ka lwife Juda, tu mu etele oumbada, fye tu shi finde, tu nangeke mo omona waTabeal, a ninge ohamba yasho. 7 Onghee hano Omwene Kalunga ota popi ngaha:
Itashi ka fikama noitashi ka ningwa.
8 Osheshi Damaskus osho omutwe waAram,
nomutwe waDamaskus oResin,
nongeenge pa pita omido omilongo hamano nanhano,
Efraim otashi teka po, noshihe fi vali oshiwana;
9 ndele omutwe waEfraim oSamaria,
nomutwe waSamaria oye omona waRemalja.
Ngeenge itamu itavele, itamu kala po.”
Immanuel ta udanekwa
10 Ndele Omwene okwa popya vali naAhas, ndele ta ti: 11 “Indila kOmwene Kalunga koye edidiliko; otashi dulika li dje moukandoli, moshovafi, ile moulifele meulu.” 12 Ndelenee Ahas okwa nyamukula: “Ame itandi ka indila, itandi ka shinda Omwene.” 13 Ndele ye okwa tya: “Pwilikineni, nye eumbo laDavid! Inashi wana, eshi nye hamu lolokifa ovanhu, mwa hala yo okulolokifa Kalunga? 14 Onghee hano Omwene ote mu pe edidiliko: Tala, okakadona otaka ka ninga kafimba, ndele taka dala omona okamati, ndele te ka luku Immanuel. 15 Omaadi eengobe nomaadi eenyiki ota ka lya fiyo a ninga eendunge okweefa owii nokuhoolola ouwa. 16 Osheshi omumati ou fimbo ina shiiva okweefa owii nokuhoolola ouwa, edu olo leehamba odo mbali we di tila, otali ningi omaputu.
Okuhanaunwa po kwaJuda
17 “Ndelenee Omwene ota dimine kombada yoye nokombada yoshiwana shoye nokombada yeumbo laxo omafiku oo a li inae uya fimbo Efraim ina efa Juda e uye. Ta dimine ohamba yaAsiria e uye.”
18 Ndele mefiku tuu olo Omwene ota ka ifana nomwilwa eedi odo di li kokule okeexulo domilonga daEgipiti, neenyiki dinya di li medu laAsiria, 19 ndele odo tadi ke uya, ndele odo adishe tadi wile momafilu nomomakololo eemhunda nomamanya nomo lixwa aishe nomomatambi. 20 Mefiku tuu olo Omwene ota kululifa oshimbi sha futwa sha kala kombada yomulonga waEufrat, ohamba yaAsiria, omutwe nomalududi opokati komaulu, ndele tashi kulula ko yo eendjedi. 21 Nomefiku tuu olo omunhu ota kala e na ongobe yondjelipa needi mbali 22 ndele ta kande omashini mahapu unene, ndele ta li omaadi eengobe; osheshi aveshe ava va xupa moshilongo ohava li omaadi eengobe nomaadi eenyiki. 23 Ndele mefiku tuu olo monhele keshe mu nomiviinyu eyovi limwe da landwa noimaliwa yeesekeli doshisiliveli eyovi limwe, otamu ka kala omano neeshosholo. 24 Ndele otamu iwa nouta noikuti, osheshi edu alishe otali ka yada omano neeshosholo. 25 Ndele keemhunda odo adishe tadi limwa paife netemo, itaku ka iwa vali omolwokutila omano neeshosholo; ndele otadi ningi oulifilo weengobe notadi lyataulwa koimuna.
© Oshikwanyama Bible Revised © Bible Society of Namibia, 2008, 2012.
