Mordekai ta lengwa
1 Mefiku tuu olo ohamba Ahasveros ya yandja kuEster eumbo laHaman, omutondadi wOvajuda. Ndele Mordekai okwe uya koshipala shohamba, osheshi Ester a hepaulula oye olyelye, nokutya omukwao. 2 Nohamba ya xukula mo okalinga kayo kokuhakifa aka ye ka kufa kuHaman, ndele ye ka pa Mordekai. Ndele Ester okwa tula po Mordekai a pangele eumbo laHaman.
3 Ndele Ester okwa popya vali koshipala shohamba ndele a wila eombe keemhadi dayo ndele ta lili noku i indila, nokutya a alule owii waHaman, Omuagag, nomhangela e i pangelele okuhanauna po Ovajuda, 4 Nohamba ya nanena Ester epangelodibo loshingoldo, naEster okwa penduka po ndele a kala ofika koshipala shohamba 5 ndele ta ti: “Ngeenge tashi wapalele ohamba ndele nda filwa onghenda kuyo ndele ohamba tai tale osho osha yuka ndele nda hokiwa kuyo, nai shangife oshipango shokwaalula omhangela yaHaman yaHammedata womepata laAgag neenhumwafo odo da shangwa kuye, a hanaune Ovajuda aveshe ve li moitukulwalongo aishe yohamba. 6 Osheshi ohandi dulu ngahelipi okutala omupya ou tau ka hanga oshiwana shange? Ndele handi dulu ngahelipi okutala ehanauno loludi letu?” 7 Opo nee ohamba Ahasveros tai ti komumbada Ester nokOmujuda Mordekai: “Tala, eumbo laHaman nde li yandja kuEster, ndele a endjelelifwa komuti wokumangeleka mo, shaashi a nanena eke laye okukwata Ovajuda. 8 Ndelenee shangeni medina lohamba oshipango tashi popile Ovajuda, ngaashi mwe shi tala tashi mu wapalele, ndele shi hakifeni nokalinga kohamba. Osheshi eshango olo la shangwa medina lohamba ndele la hakifwa nokalinga kohamba, itali lundululwa.”
9 Opo nee mefimbo tuu olo ovashangi vohamba va ifanwa, mohani onhinhatu, nokutya mohani Sivan, mefiku etimilongo mbali netitatu lomuyo. Ndele va shanga ngaashi Mordekai e va lombwela kOvajuda nomalenga nokovapangeli voitukulwalongo yo i li po okudja kuIndia fiyo okuEtiopia, oitukulwalongo efele nomilongo mbali naiheyali, kukeshe oshitukulwalongo panghedi yasho okushanga nokukeshe oshiwana melaka lasho, nokOvajuda panghedi yavo okushanga nomelaka lavo. 10 Nokwa shanga medina lohamba Ahasveros nokwe li hakifa nokalinga kohamba kokuhakifa. Nokwa tuma eenhumwafo novalondi veenghambe da dja moyuunda yeenghambe da deulwa dokufiyafana po; 11 nokutya ohamba otai shi itavelele Ovajuda moshilando keshe omo ve li va ongale kumwe va popile eemwenyo davo nokuhanauna po nokudipaa nokukomba po ovanhu aveshe vomoitukulwalongo, ovo ve noiti tave va fininike, nounona yo novalikadi nokukufa omamona avo ngaashi oixuulwa, 12 mefiku limwe alike moitukulwalongo aishe yohamba Ahasveros, mefiku etimulongo netitatu lohani onhimulongo nonhivali nokutya, mohani Adar. 13 Eshangululo leshango li nokushiivifilwa ovanhu aveshe vomoshitukulwalongo keshe, kutya olo omhango, opo Ovajuda va kale ve lilongekidila okuhandukila ovatondadi vavo. 14 Eenhondoki da londa eenghambe dohamba di nonhapo oda fikama kelombwelo lohamba ndele va endelela divadiva. Nomhango ya shangwa mohotengulu yaSusa.
15 Ndele Mordekai okwa pita mo mongulu yohamba a djala oshikutu shopauhamba shitoka shi nomavala, noshishani shinene shoshingoldo nelwakani loshiyata sholiina noshapurpuri, fimbo oshilando shaSusa sha hafa nokukuwilila. 16 Ovajuda va mona elao nehafo nekuwililo nefimano, 17 nomoitukulwalongo aishe nomoilando aishe omo oshipango shohamba nomhango yayo ya fika, omwa li ehafo nelao mokati kOvajuda, noitelekela nefiku loshivilo. Ndele vahapu vomovanhu va ninga Ovajuda, osheshi ehaluko molwOvajuda ve uya kombada yavo.
© Oshikwanyama Bible Revised © Bible Society of Namibia, 2008, 2012.
