Simson ta pombaula onghoshi
1 Simson eshi a ya kuTimna, okwa mona ko omukainhu umwe womovana oukadona Ovafilisti, 2 ndele ye okwa fikama ndele te shi lombwele xe naina, ndele ta ti: “Ame nda mona omukainhu umwe womovana oukadona Ovafilisti muTimna, mu pei nge paife a ninge omwalikadi wange.” 3 Ndelenee xe naina tava ti kuye: “Movana oukadona ovakweni nomokati koshiwana ashishe eshi shetu kamu nomukainhu hamba, eshi wa hala okuya kOvafilisti, ava inava pita etanda, oko u ka kufe omukainhu?” Ndele Simson ta ti kuxe: “Pe nge winya, osheshi ye a wapalela nge.” 4 Ndelenee xe naina inava shiiva nokutya, osho sha dja kOmwene, osheshi ye okwa konga omhito okutwila Ovafilisti ondubo. Mefimbo linya Ovaisraeli va pangelwa kOvafilisti.
5 Ndele Simson okwa ya pamwe naxe naina kuTimna. Ndele vo eshi ve uya koikokola yomiviinyu yaTimna, onghoshi yonyasha ya kumba ye mu nhukila. 6 Ndelenee Omhepo yOmwene ye mu uya, nokwe i pombaula, ngaashi omunhu ta pombaula okakombwena, ye okwa li hamakasha. Ndelenee ye ina hepaululila xe naina, osho ye e shi ninga. 7 Opo nee ye a ya ko nokwa popya nomukainhu; ndele ye okwa wapalela Simson. 8 Ndele efimbo limwe eshi la pita, ye okwa shuna ko e ke mu tale. Ndele ye eshi a yapuka mondjila a ka tale onghoshi ya fya, momutunhu wonghoshi mwa li eenyiki nomaadi eenyiki. 9 Ndele ye okwe a kufa mo noku a shambekela momake aye nokwa lya mokweenda kwaye. Ndele okwa ya kuxe naina ndele te va pe. Ndele vo ova lya, ndelenee ye ine va hepaululila nokutya, omaadi eenyiki okwe a kufa momutunhu wonghoshi.
Ehombolo laSimson notumbutumbu yaye
10 Opo nee xe okwa ya komukainhu, ndele Simson okwa teleka oshitelekela. Osheshi ovalumenhu ovanyasha osho va ika okuninga. 11 Ndele vo eshi ve mu mona, va hoolola ookaume ovamati omilongo nhatu va kale pamwe naye. 12 Ndele Simson ta ti kuvo: “Ame ohandi mu tele otumbutumbu. Nye ngeenge tamu i fatululile nge momafiku aheyali aa oshitelekela ndele tamu eta po eendunge dayo, ame ohandi ke mu pa eehema omilongo nhatu noikutu omilongo nhatu yoshivilo. 13 Ndelenee nye ngeenge tamu nyengwa oku i fatululila nge, nye mu nokupa nge eehema omilongo nhatu noikutu omilongo nhatu yoshivilo.” Opo nee venya ve mu lombwela, tava ti: “Tu tela hano otumbutumbu yoye, tu i ude!” 14 Ndele ye ta ti kuvo:
“Eendja da dja momufukedi,
nounyenye okomunaenghono.”
Ndele momafiku atatu vo va nyengwa okufatulula otumbutumbu.
15 Ndele mefiku etine vo ova tya komwalikadi waSimson: “Heka omulumenhu woye, tu pewe efatululo kuye. Ndele ngeenge wa anye, ohatu ku xwike po pamwe neumbo laxo nomundilo. Nye omwe tu ifana apa, mu tu nyeke hamba ile ongahelipi?” 16 Opo nee omwalikadi waSimson okwa kwena puye ndele ta ti: “Ove ho tondo nge ashike, ndelenee ku hole nge nande. Ove wa tela ovakwetu otumbutumbu, ndelenee ino i fatululila nge.” Ndele ye okwe mu nyamukula: “Tala, inandi i fatululila tate na meme, ondi noku i ku fatululila ngahelipi?” 17 Ndelenee ye okwe mu fininika nokulila kwaye omafiku aheyali oshitelekela shavo. Ndele mefiku etiheyali ye okwe i mu fatululila. Osheshi omukainhu okwe mu fininika ndele winya okwa fatululila ovakwao otumbutumbu. 18 Opo nee ovalumenhu vomoshilando ve mu lombwela mefiku etiheyali fimbo etango inali ningina mo, tava ti:
“Oshike ngeno shi dule ounyenye womaadi eenyiki?
Ndele oshike shi dule eenghono donghoshi?”
Ndele ye okwe va nyamukula ta ti:
“Nye ngeno inamu pululifa onhana yange,
ngeno mwa nyengwa okufatulula otumbutumbu yange.”
19 NOmhepo yOmwene ye uya muye nokwa ya kuAskelon, ndele ta dipaa ovalumenhu omilongo nhatu vomuvo nokwa kufa oikutu yavo ndele ta pe ava va fatulula otumbutumbu oikutu yoshivilo. Ndele ye okwa handuka ndele ta i keumbo laxe. 20 Ndelenee omukainhu waSimson a ninga wakaume kaye, ou a li ongoleka yaye.
© Oshikwanyama Bible Revised © Bible Society of Namibia, 2008, 2012.
