Eyambo loiveli noshitimulongo shomido nhatu
1 “Ndelenee ove ngeenge to uya moshilongo Omwene Kalunga koye te ke shi ku pa efyuululo, ndele ove to shi nangala nokukala musho, 2 opo nee ove u nokukufa moiimati aishe yotete yomomapya oye to i toola moshilongo eshi Omwene Kalunga koye te ke shi ku pa, ndele u noku i tula moshimbale, ndele ove u nokuya konhele oyo tai ka hoololwa kOmwene Kalunga koye, opo edina laye li kale mo, 3 ndele to i komupristeli ou e li po pefimbo olo, ndele u noku mu lombwela, to ti: ‘Onena eli ame ohandi hepaululile Omwene Kalunga nokutya, ame nde uya moshilongo osho Omwene e shi udanekela ootate nokwaana, e shi tu pe.’ 4 Nomupristeli e nokukufa oshimbale momake oye, ndele ye e noku shi tula komesho yoaltari yOmwene Kalunga koye. 5 Opo nee ove u nokuhepaulula moipafi yOmwene Kalunga koye, ndele to ti: ‘Tate okwa li Omuaram omuelaeli, ndele okwa ya kuEgipiti noko a kala novanhu vanini ngaashi omunailongo. Ndelenee oko ye a ninga oshiwana shinene shi neenghono novanhu vahapu. 6 Ndelenee Ovaegipiti ve tu hepeka ndele ve tu fininika, ndele ve tu twika oshilonga shidjuu. 7 Opo nee fye twa kuwa kOmwene Kalunga kootate, nOmwene okwe tu uda nokwa tala oluhepo letu noupyakadi wetu nokufininikwa kwetu; 8 nOmwene okwe tu pitifa mo muEgipiti neke li neenghono nokwooko kwa yeluka noilonga inene tai tilifa nomadidiliko noikumwifa. 9 Ndele Ye okwe tu eta monhele tuu ei, ndele e tu pa oshilongo eshi, edu tali tondoka omashini nomaadi eenyiki. 10 Apa onda eta hano paife oiimati yotete yomoshilongo, osho Ove Omwene we shi pa nge.’ Opo nee to i tula poshi koshipala shOmwene Kalunga koye, ndele ove u nokulinyongamena koshipala shOmwene Kalunga koye. 11 Ndele ove u nokunyakukilwa oinima aishe iwa Omwene Kalunga koye a yandja kwoove nokeumbo loye, oove nOmulevi nomunailongo, ou e li pwoove.
12 “Hano momudo omutitatu nokutya, momudo woshitimulongo, ngeenge wa yandja oitimulongo aishe, opo nee u nokupa Omulevi nomunailongo nofiye nomufiyekadi, opo va shiive okulya peenhu doye nokukuta. 13 Ndele ove u nokutya koshipala shOmwene Kalunga koye: ‘Oinima iyapuki onde i kufa meumbo, ndele nde i yandja yo kOmulevi nokomunailongo nokofiye nokomufiyekadi, oyo aishe pashipango shoye, ove we shi lombwela nge. Ame inandi tauluka noinandi dimbwa oshipango shoye nande shimwe. 14 Moluhodi lange inandi lya sha shomuyo, ndele inandi kufa mo sha fimbo nda li inandi yela, ndele inandi yandja sha komufi. Ame onda uda ondaka yOmwene Kalunga kange. Ame nda ninga ngaashi Ove wa lombwela nge. 15 Tala, hano apa poshi meumbo loye liyapuki meulu, ndele nangeka noupuna ovanhu voye Ovaisraeli noshilongo osho we shi tu pa, ngaashi wa udanekela ootate nokwaana, oshilongo tashi tondoka omashini nomaadi eenyiki.’
Ekumaido okuwanifa oipango
16 “Onena eli Omwene Kalunga koye te ku lombwele okushikula eenghedimhango edi nomalombwelo aa. Hano a diinina noku a wanifa nomutima woye aushe nomwenyo woye aushe. 17 Onena eli ove wa uda Omwene Kalunga koye te ku udifile nokutya, Ye a hala okukala Kalunga koye, ndele ove u nokweenda nomalila aye nokudiinina eenghedimhango daye noipango yaye nomalombwelo aye nokupwilikina ondaka yaye. 18 Ndele nena eli Omwene okwa shiivifa nokutya, ove oto ka kala oshiwana shaye mwene, ngaashi Ye e ku udanekela ndele ove to ka diinina oipango yaye aishe, 19 ndele Ye ote ke ku tula po kombada yoiwana aishe ei Ye e i shita, u mu pe ehambelelo nepandulo nefimano, ndele ove u ninge oshiwana shiyapuki kOmwene Kalunga koye, Ye ngaashi a udaneka.”
© Oshikwanyama Bible Revised © Bible Society of Namibia, 2008, 2012.
