Eimbilohambelelo kuKalunga Omunaenghono
1 Hambeleleni Omwene!
Osheshi okwiimbila Kalunga ketu, osho oshiwa,
noku mu imbila omahambelelo
osha wapala nosha yuka.
2 Omwene ota tungulula Jerusalem,
Ye ota ongele ava, va halakanifwa vovana vaIsrael.
3 Oha twamifa ava ve nomutima wa tekauka,
ndele ta mange oipute yavo tai yehama.
4 Oye ha pangelele eenyofi omuvalu apa u fike,
ndele te di tu adishe komadina.
5 Omwene wetu, Oye omunene
nomunaenghono unene.
Omayele aye kae na oshiyelekifo.
6 Ovakwanaluhepo, Omwene ote va pamekele ofika,
ndelenee eembudi ote di pundulile poshi.
7 Hoveleni okwiimbila po Omwene olwiimbo lolupandu,
shikileni Kalunga ketu okaxumbafeta!
8 Oye tuu ou, ta eta keulu oilemo,
ndele ta lokifile edu,
ota twiyukifa omwiidi keemhunda,
9 ndele ta pe oinamwenyo eendja,
nomakolwena tae mu kwenene.
10 Ye iha hokwa eenghono deenghambe,
ile omaulu omulumenhu.
11 Omwene oha hokwa ava, have mu tila,
ovava hava tula elineekelo lavo mouwanghenda waye.
12 Akutu Jerusalem, fimaneka Omwene!
Sion, hambelela Kalunga koye!
13 Osheshi Ye okwa pameka oiidilifo yoivelo yoye,
nounona vomwoove e va nangeka noupuna.
14 Ombili ote i yandje meengaba doye,
ote ku palula noilya inyenye.
15 Ondaka yaye ote i tumine kedu:
oshipango shaye otashi tondoka oshidudu shinene.
16 Ota yaumuna oshihemime
ngaashi omundele tau tokaulwa,
noshitwime ote shi undile poshi ngaashi omute;
17 eemhawe ote di kupula pedu da fa outandu.
Olyelye te lididimikile meandu laye?
18 Ota tumu ondjovo yaye,
ndele oyo tai hekulula oihekele,
ota pepifa omhepo yaye,
nomeva opo taa tondoka.
19 Ye okwa udifila Jakob eendjovo daye,
naIsrael eemhango daye nomapangelo aye.
20 Kape na nande oiwana yoilongo a ningila ngaha,
onghee hano omapangelo aye inaa shiivika kuvo.
Halleluya!
© Oshikwanyama Bible Revised © Bible Society of Namibia, 2008, 2012.
