OVATOKOLIPANGELI 4 - Oshikwanyama Bible (OKYB)

Debora naBarak tava xupifa Israel mepangelo lOvakaanan

1 Ndelenee konima yefyo laEhud ovana vaIsrael va ninga eshi shii momesho Omwene. 2 Onghee hano Omwene e va landifa po momake aJabin, ohamba yOvakaanan, ya pangela muHasor. Nondjai yayo oya li Sisera onakukalamo muHaroset shovapaani. 3 Novana vaIsrael va kuwa kOmwene. Osheshi venya va li ve nomatemba oivela omilongo omugoi ndele va hepeka Ovaisraeli omido omilongo mbali. 4 Ndele mefimbo linya Debora, omuxunganeki omukainhu, omwalikadi waLappidot okwa li omutokolipangeli muIsrael. 5 Ndele ye okwa li omutumba pomulunga Debora, pokati kaRama naBetel, keemhunda daEfraim, novana vaIsrael ve uya kuye okulihokololifa. 6 Opo nee ye okwa ifana Barak yaAbinoam wokuKedes muNaftali ndele ta ti kuye: “Omwene Kalunga kaIsrael ota ti ngaha: ‘Fikama, inda komhunda yaTabor, ndele kufa ovalumenhu omayovi omulongo movana vaNaftali nomovana vaSebulon pamwe naave. 7 Opo nee Ame ohandi ku etele Sisera, ondjai yaJabin, pamwe nomatemba aye oita nomatanga aye ovakwaita kokamulonga Kison, ndele Ame ohandi ke mu yandja momake oye.’ ” 8 Ndelenee Barak okwe mu lombwela: “Ove ngeenge to i, naame ohandi i. Ndelenee ove ngeenge ito i, naame itandi i.” 9 Opo nee ye ta ti: “Oshili, ame ohandi ka ya naave, ndelenee efimano itali ka ninga loye mondjila oyo to ende nayo. Osheshi Omwene ota ka landifa po Sisera meke lomwalikadi.” Ndele Debora okwa fikama nokwa ya pamwe naBarak kuKedes. 10 Opo nee Barak okwa shiva Sebulon naNaftali kuKedes, novalumenhu omayovi omulongo ove mu shikula. Ndele Debora okwa ya pamwe naye.

11 Ndele Eber, Omukeni, okwe li tongola mo mOvakeni, movana vaHobab, haukwe yaMoses, ndele okwa dika omatwali aye fiyo okomwandi wokuSaananim popepi naKedes.

12 Ndele vo eshi va shiivifila Sisera nokutya, Barak yaAbinoam okwa londa komhunda yaTabor, 13 Sisera okwa shiva omatemba aye aeshe oita, omatemba omilongo omugoi oivela nomatanga aeshe ovakwaita ava va li puye muHaroset shovapaani kokamulonga kaKison. 14 Opo nee Debora ta ti kuBarak: “Lilongekida, osheshi efiku tuu eli Omwene ta yandje Sisera meke loye.” Omwene te ku kwatele komesho! Opo nee Barak okwa londoloka komhunda yaTabor, novalumenhu omayovi omulongo ve mu shikula. 15 NOmwene okwa dongakanifa Sisera nomatemba aye aeshe nomatanga aeshe ovakwaita keongamukonda komesho yaBarak, ndele Sisera okwa londoloka kokatemba kaye nokwa ya onhapo. 16 Ndelenee Barak okwa shikula omatemba nomatanga fiyo okuHaroset shovapaani, nomatanga aeshe ovakwaita vaSisera okwa dipawa keongamukonda. Inapa xupa nande umwe.

Sisera ta dipawa kuFael

17 Opo nee Sisera okwa ya onhapo kolupadi ketwali laJael, omwalikadi waEber, Omukeni. Osheshi opa li ombili pokati kaJabin, ohamba yaHasor neumbo laEber, Omukeni. 18 Ndele Jael okwa ka shakeneka Sisera ndele ta ti kuye: “Omwene wange, tengunuka, tengunukila kwaame!” Ino tila! Ndele ye okwa tengunukila kuye metwali, ndele ye okwe mu tuvika nekumbafa. 19 Opo nee ye ta ti kuye: “Pe nge omeva manini ndi nwe, osheshi nda fyenota!” Opo nee ye okwa tuula olwiyo lomashini, ndele te mu pe a nwe ndele e mu tuvika vali.

20 Ndele ye ta ti kuye: “Inda u ka kale ofika poshivelo shetwali,” nongeenge umwe te uya ndele ta pula: “Omu na tuu omunhu omu?” Nyamukula: “Ahowe!” 21 Opo nee Jael, omwalikadi waEber, okwa kufa ombosha ile, ndele ta kufa ohamala meke laye ndele te mu hondjaunine ndele ta valele ombosha pombadu yomutwe waye, ndele tai tyuuka tai i medu. Osheshi ye okwa li a loloka nokwa kofa nokukofelela. Osho ngaha hano ye okwa fya. 22 Ndele tala fimbo Barak ta shikula Sisera, Jael okwa ya te mu shakeneke ndele ta ti kuye: “Ila, opo handi ku ulikile omulumenhu ou to kongo.” Ndele ye eshi e uya mo, okwa hanga Sisera a kangavala a fya nale, nombosha ya tyuulwa mombadu yomutwe waye! 23 Osho ngaha hano Kalunga okwa ninipika Jabin, ohamba yaKaanan, komesho yovana vaIsrael mefiku tuu olo. 24 Ndele eke lovana vaIsrael la ninga lidjuu la fininika Jabin ohamba yaKaanan, fiyo va hanauna po Jabin, ohamba yaKaanan.