Oupristeli waMelkisedek nhumbi wa tya
1 Osheshi Melkisedek ou, ohamba yaSalem, omupristeli waKalunga wOkombadambada, ou a shakeneka Abraham ndele te mu nangeke noupuna, Abraham eshi a finda eehamba, 2 ou Abraham e mu pa oshitimulongo moinima yaye aishe, oye tuu ou, ngaashi edina laye yo tali ti, tete “ohamba youyuki,” navali “ohamba yaSalem” nokutya, ohamba yombili; 3 ou ehe na nande xe ile ina ile epata, ke nexulilo lokukala kwaye ile ehovelo lomafiku aye, ndele e shii okuyelekwa nOmona waKalunga, Oye ta kala omupristeli alushelushe.
4 Taleni hano ye apa e fike, ou natatekulu Abraham mwene e mu pa oshitimulongo moihakanwa yaye. 5 Paife ovana vaLevi, ava va pewa oupristeli, ove noshipango va tambule pomhango oshitimulongo kovanhu, nokutya, kovamwaxe, nande ova dja moshinena shaAbraham. 6 Ndelenee ou nande ke fi omukwapata lavo, okwa tambula kuAbraham oshitimulongo nokwa nangeka noupuna ou kwa li e nomaudaneko. 7 Opo kape na nande eemhata nokutya, omunini ota nangekwa noupuna komukulunhu. 8 Ndelenee apa, ovanhu ovo ve nokufya, tava tambula oshitimulongo, ndele kwinya ou ta hepaululwa oku nomwenyo. 9 Ndele handi ti, naLevi yo, ou ha tambula oshitimulongo, okwa yandjela muAbraham oshitimulongo, 10 osheshi ye okwa li moshinena shaxekulu, Melkisedek eshi e mu shakeneka.
Oupristeli waKristus wa kandula po winya wOvalevi
11 Hano ewaneneno ngeno la fikifwa koupristeli wOvalevi, osheshi molwao oshiwana sha pewa omhango, oshike hano kwa li ku nokuholoka omupristeli umwe e lili panghedi yaMelkisedek ndele hapanghedi yaAron? 12 Osheshi apa pe nelunduluko loupristeli, nomhango yo oi nokulunduluka; 13 osheshi ou te shi tongelwa, ye owomapata e lili, omu kwa li inamu dja nande oumwe a yakula moaltari. 14 Eshi sha shiivika vali okutya, Omwene wetu a dja mepata laJuda, olo Moses kwa li ine li lombwela sha kombinga youpristeli.
15 Ndele eshi tashi monika unene nawa shi dule penya, eshi tapa holoka omupristeli e lili a fa Melkisedek, 16 umwe ou ina ninga omupristeli palombwelo lomhango yopambelela, ndelenee okeenghono domwenyo itau nyonwa po. 17 Osheshi oye ta hepaululwa:
“Oove omupristeli fiyo alushe
opanghedi yaMelkisedek.”
18 Ndele osho ngaha onghedi ikulu tai dimwa po, osheshi oya li ihe neenghono noihe noshilonga, 19 ngaashi omhango inai dula okufikifa sha kewano; ndelenee ponhele yayo tapa tulwa eteelelo liwa li dule linya, mulo hatu ehene kuKalunga.
20 Ndele ngaashi eshi inashi ningwa pehe neano, osheshi venya va ninga ovapristeli paha li eano, 21 ndelenee ou e shi ningilwa neano, okwa nangekwa mo kwaau a tya kuye:
“Omwene okwa ana, ndele ite lialuluka:
‘Oove omupristeli fiyo alushe.’ ”
22 Osho ngaha Jesus a ninga omupameki wehangano liwa li dule linya.
23 Ndele venya va li vahapu va kala ovapristeli, shaashi va nyengwa okukala po omolwefyo, 24 ndelenee Oye shaashi ta kala po alushe, e noupristeli tau kalelele. 25 Onghee hano ota dulu yo okuxupifa shili ava tava ehene kuKalunga mokweendela muye, shaashi oku nomwenyo alushe, e va ilikanene.
Omuyapuki okwe liyandja ponhele yovalunde
26 Heeno, omupristeli omukulunhu a tya ngaha okwe tu wapalela yo, omuyapuki ehe nomatimba, ke na nande oshipo, a yoololwa movalunde, nokwa ningwa munene a yelwa pombada yomaulu. 27 Ou ita pumbwa ngaashi ovapristeli ovakulunhu, okuyamba keshe efiku, tete omolwomatimba aye mwene, opo nee a yambe omolwomatimba oshiwana. Osheshi Oye e shi ninga lumwe aluke, eshi e liyandja Ye mwene eyambo. 28 Osheshi omhango otai nangeke moupristeli ovakulunhu, ovanhu va nyika oungone, ndelenee ondjovo ei yeano, oyo ya shikula omhango, otai nangeke Omona ou a ningwa a wana a pwa fiyo alushe.
© Oshikwanyama Bible Revised © Bible Society of Namibia, 2008, 2012.
