Gog ta xulifwa po
1 Ndele oove, kaana komunhu, xunganekela Gog u tye: “Omwene Kalunga ota ti ngaha: ‘Tala, Ame ohandi ku vele eembedi, akutu, oove Gog, omupangeli waRos, Mesek naTubal. 2 Ndele Ame ohandi ke ku heka ndele handi ku endifa ndele handi ku fikamifa koxulo yokoumbangalanhu ndele handi ku itavelele okuuya keemhunda daIsrael. 3 Ndelenee Ame ohandi ka denga outa woye meke loye lokolumosho, noikuti yoye yomeke loye lokolulyo ohandi i wilifa poshi. 4 Keemhunda daIsrael ove oto ka wila po, oove nomatanga oye aeshe noiwana ei i li pamwe naave. Ame nde ku yandja eendja keenhwa, oikwamavava i lili nai lili nokoilyani yomomufitu. 5 Moluhaela longaho oto ka fila mo. Osheshi Ame nde shi tya, Omwene Kalunga ta ti. 6 Ndele Ame ohandi ka ekela Magog omundilo nomokati kaava hava kala vehe na mbudi moilongo yopomunghulo wefuta, ndele vo otava ka shiiva nokutya, Aame Omwene.’ 7 Nedina lange liyapuki ohandi ke li shiivifila mokati koshiwana shange Israel nedina lange liyapuki itandi li dinififa vali. Noiwana tai ka shiiva nokutya, Aame Omwene nOmuyapuki muIsrael.”
8 Tala, tai uya ndele tai ka wanifwa, Omwene Kalunga ta ti. “Olo tuu efiku nde li tongele. 9 Ndele oonakukala moilando yomuIsrael otava di mo ndele tava tema omundilo ndele tava xwike po oilwifo, oikelelifo inini noinene, omauta noikuti, needibo nomaonga. Ndele oilwifo ei oikuni yavo momido heyali, 10 vo itava ka tyava oikuni moixwa ile okuka momufitu, ndelenee oilwifo oyo oikuni yavo. Ndele vo otava tinhi venya ve va tinhile, ndele tava hakana oihakanwa yaava ve va hakana oihakanwa, Omwene Kalunga ta ti.
11 “Mefiku tuu olo Ame ohandi ka pa Gog onhele yombila muIsrael, Efilu Lovaendaendi kombinga youshilo wefuta; yo otai ka fitika po ondjila kovaendaendi, ndele oko tava ka paka Gog neemhunga daye adishe; ndele tai ka lukwa: Efilu Leemhunga daGog. 12 Neumbo laIsrael otali ke va paka mo eehani heyali, oshilongo opo shi yapulwe. 13 Novanhu aveshe vomoshilongo otava ka paka ndele tashi va ningile etumbalo nefiku olo Ame ohandi ke lifimanekifa, Omwene Kalunga ta ti. 14 Ovalumenhu otave va hoolola yo va taulule oshilongo ndele tava pake ovaendaendi ava va fyaala po moshilongo, ve shi yapule. Pexulilo leehani heyali otave li konakona, 15 nongeenge umwe womuvo ta hange omakipa omunhu, ota dikile po oshiti, fiyo ovapaki tave a pake mefilu leemhunga daGog. 16 Nedina loshilando yo shimwe otali ka lukwa Hamona. Osho hano tava ka yapula oshilongo.”
17 Ndele oove, kaana komunhu, Omwene Kalunga ta ti ngaha: “Lombwela eedila noikwamavava i lili nai lili noilyani aishe yomomufitu: Ongaleni, ileni oku, ongaleni keembinga adishe, ileni ketomenoyambo lange, nde li mu longekidila, etomenoyambo linene keemhunda daIsrael! Lyeni ombelela! Nweni ohonde! 18 Nye otamu ka lya ombelela yovaladi ndele tamu ka nwa ohonde yovapangeli vedu, nohonde eedi neemhedi noudjona, oikombo neemhedi, eengobe noimuna ya ondolwa muBasan. 19 Nye otamu ka lya omaadi fiyo mwa kuta nokunwa ohonde fiyo mwa kolwa, oketomenoyambo lange, nde li mu tomenena, 20 noposhililo shange nye otamu ka kutifwa keenghambe novalondi vado kovaladi novakwaita ve lili nave lili, Omwene Kalunga ta ti.
21 “Ndele Ame ohandi ka dikila mokati koiwana efimano lange, noiwana aishe tai ka mona ehandukilotokolo lange eli nde li wanifa, neke lange nde li nana kuyo. 22 Neumbo laIsrael tali ka shiiva nokutya, Aame Omwene Kalunga kavo okefiku tuu olo nokomesho. 23 Noiwana tai ka shiiva nokutya, eumbo laIsrael la twalwa moupika omolwoulunde walo, shaashi ve liteeka nge, ndele Ame nda holeka oshipala shange kuvo ndele nde va yandja momake ovatondi vavo, opo vo aveshe va fya keongamukonda. 24 Panyata yavo nopamatauluko avo Ame nde va ningila nonde va holekela oshipala shange.”
Israel ta xupifwa
25 Onghee hano Omwene Kalunga ta ti ngaha: “Paife eshi Ame ohandi ka lundulula okukala kwaJakob nokufila eumbo alishe laIsrael onghenda nokupopila nouladi edina lange liyapuki, 26 ndele vo otava ka dimbwa okushekwa kwavo neliteeko alishe lavo eshi ve liteeka nge, ngeenge tava ka kala vehe nambudi medu lavo, nokape na ou te va halukifa. 27 Ame ngeenge ohandi va kufa mo moiwana noku va ongela moilongo yovatondi vavo, Ame ohandi ke ve lihololela ngaashi Omuyapuki moipafi yoiwana ihapu. 28 Ndele vo otava ka shiiva nokutya, Aame Omwene Kalunga kavo, nda li nde va tuma moupika koiwana, ndelenee nde va ongela vali moshilongo shavo ndele inapa fyaala nande umwe womuvo. 29 Ndele Ame ihandi ke va holeka vali oshipala shange, osheshi Ame nda tilila kombada yeumbo laIsrael Omhepo yange, Omwene Kalunga ta ti.”
© Oshikwanyama Bible Revised © Bible Society of Namibia, 2008, 2012.
