Jakob ta i kuBetel
1 Opo nee Kalunga okwa lombwela Jakob ta ti: “Lilongekida, inda kuBetel u kale oko. Dikila ko Kalunga oaltari, Kalunga ou e liholola kwoove eshi wa ya onhapo mumwanyoko Esau.” 2 Jakob okwa lombwela eumbo laye naaveshe ava va li pamwe naye ndele ta ti: “Ekeleishi oihongwakalunga yokoilongo, ei mu kwete mokati keni, lifeteni nye mu djale oikutu imwe. 3 Tu lilongekideni okuya kuBetel. Ame ohandi ka tungila ko Kalunga oaltari, Kalunga ou a nyamukula nge mefiku loudjuu wange nokwa kala pwaame mondjila ei nda enda.” 4 Opo nee va yandja kuJakob oikalunga yavo yokoilongo ve i kwete, neelinga domomatwi avo, ndele Jakob e i paka medu momwandi u li muSekem. 5 Ndele vo eshi va fikama, Kalunga okwa tumina oilando ye va dingilila ehaluko, opo venya vaha shikule ovana vaJakob. 6 Osho ngaha Jakob a fika kuLus shomuKaanan nokutya, Betel, ye mwene novanhu aveshe ava va li puye. 7 Ndele oko a tunga oaltari nokwa ifana onhele oyo El Betel, osheshi oko Kalunga e mu lihololelele eshi ye a ile onhapo yamumwaina Esau. 8 Ndele Debora, omuyakuli waRebeka, okwa fya, ndele ye okwa pakwa momwandi popepi naBetel. Ndele omuti ou ve u luka: “Omwandi wokulilila eefya.”
Kalunga te lihololele Jakob e mu nangeke noupuna
9 Opo nee Kalunga okwe lihololela vali Jakob, ye eshi a alukila kuPaddan-Aram, ndele okwe mu nangeka noupuna. 10 Ndele Kalunga okwe mu lombwela ta ti: “Edina loye oJakob, ndele ito ifanwa vali Jakob, ndelenee Israel.” Ndele ye okwe mu luka Israel. 11 Kalunga okwe mu lombwela vali ta ti: “Aame Kalunga Omunaenghono adishe. Kala u na oludalo u hapupale. Oshiwana, heeno, oiwana tai ka dja mwoove neehamba tadi ka dja momatundji oye. 12 Nedu olo nde li pele Abraham naIsak, ohandi ke li ku pa, noludalo loye tali ku shikula Ame ohandi ke li li pa.” 13 Opo nee Kalunga okwa ya pombada nokwe mu fiya po monhele tuu ei Ye a popya naye. 14 Ndele Jakob okwa dikila monhele oyo Ye a popya naye edimbulukifomanya, nokombada yalo okwa tila ko oikunwayambo nokwa tila ko omaadi. 15 Ndele Jakob okwa luka onhele oyo apa Kalunga a popya naye Betel.
Efyo laRakel
16 Opo nee va tembuka muBetel, ndele eshi va li kokule kanini kuEfrat, Rakel okwa hangika kefeto ledimo. Nefeto laye ola li lidjuu unene. 17 Ndele fimbo oudjuu wefeto wa li unene, omudalifi okwe mu lombwela ta ti: “Ino tila, paife ou na vali okaana okamati.” 18 Ndelenee omwenyo waye eshi tau mu fiye po, osheshi ye okwa li e na okufya, ye okwe ka luka Ben-oni. Ndelenee xe okwe ka luka Benjamin. 19 Osho hano Rakel okwa fya. Ndele ye okwa pakwa pondjila yokuya kuEfrat, nokutya Betlehem. 20 Ndele Jakob okwa dikila ko edimbulukifomanya kombila yaye. Fiyo onena eli edimbulukifomanya lokombila yaRakel opo li li. 21 Ndele Israel okwa fikama a ehene komesho nokwa onga onhanda yaye langhele kwinya kombada yaMigdal-Eder.
Ovana vaJakob
22 Hano Israel fimbo a kala opo, Ruben okwa ya ko a ka nangale naBilha, omwalikadi waxe wopomunghulo, naIsrael okwe shi uda. Ovana ovamati vaJakob ova li omulongo navavali.
23 Ovana vaLea ovava: Ruben (oshiveli shaJakob), Simeon, Levi, Juda, Isaskar naSebulon. 24 Ovana vaRakel: Josef naBenjamin. 25 VaBilha, omupika waRakel, ovava: Dan naNaftali. 26 VaSilpa, omupika waLea, ovava: Gad naAsser. Ava hano ovo ovana vaJakob, va dalelwa muPaddan-Aram.
Efyo laIsak
27 Ndele Jakob okwa fika kuxe Isak muMamre puKiriat-Arba, nokutya Hebron, oko Abraham a kala omunailongo nosho yo Isak. 28 Nomafiku aIsak a li e fike pomido efele nomilongo hetatu. 29 Ndele Isak okwa fuda mo omhepo yaye nokwa fya, ndele okwa ongelwa kovanepata vaye, a kulupa nokwa kuta omwenyo. Novana vaye ovamati, Esau naJakob ove mu paka.
© Oshikwanyama Bible Revised © Bible Society of Namibia, 2008, 2012.
