Amasia ohamba yaJuda
1 Omido daAmasia, eshi a ninga ohamba, da li omilongo mbali nanhano, nokwa pangela omido omilongo mbali nomugoi muJerusalem. Edina laina oJehoadin Omujerusalem. 2 Nokwa ninga osho sha yuka moipafi yOmwene, ndelenee hanomutima aushe. 3 Nepangelo laye louhamba eshi la pama, okwa dipaa ovapiya vaye ovo va dipaa xe. 4 Ndelenee ina dipaa ovana vovadipai, ngaashi pa shangwa momhango yaMoses, omo Omwene ta ti: “Ooxe itava ka fila ovana vavo, novana itava ka fila ooxe. Ndelenee keshe umwe ota file etimba laye mwene.”
5 Opo nee Amasia a ongela Ovajuda nokwe va tula po pamapata avo, pavaneyovi nopavanefele, Ovajuda aveshe nOvabenjamin, nokwa hoolola ovo ve nomido omilongo mbali naavo ve di koya ndele ta mono nokutya, ovalumenhu ovahoololwa, ovo tava dulu okulongifa eonga noshikelelifo, ove fike pomayovi omafele atatu. 6 Nokwa ehela vali muIsrael ovaladi omayovi efele ye ta yandje eeshali doisiliveli yeekilograma omayovi atatu nomafele ane. 7 Opo nee omulumenhu umwe waKalunga e uya kuye, ndele ta ti: “Akutu, ohamba! Ino shi itavela, etanga lOvaisraeli li ende pamwe naave, osheshi Omwene ita kala pamwe nOvaisraeli, ita kala novana aveshe vaEfraim. 8 Ndelenee ngeenge oto i, fikama u kale wa nyatipala molwoodi. Ngeenge hasho, Kalunga ote ku efa u wile po moipafi yovatondadi. Osheshi Kalunga ta dulu okukwafa nokupundula.” 9 Ndelenee Amasia ta ti komulumenhu waKalunga: “Ndelenee eeshali doisiliveli yeekilograma omayovi atatu nomafele ane, nde di yandja kovakwaita Ovaisraeli, otadi ka ningwa ngahelipi?” Nomulumenhu waKalunga a nyamukula: “Omwene ta dulu oku ku pa shihapu shi dule oyo.” 10 Opo Amasia a lekela omatanga ovakwaita ava va dja kuEfraim va shune keenhele davo. Ndelenee va handukila unene Juda, ndele va shuna keenhele davo ve nehandu la xwama.
11 Ndelenee Amasia okwe linyatipaleka nokwa twala ovakwaita vaye mEfilu lomongwa, nokwa dipaa ovana vaSeir ve fike pomayovi omulongo. 12 Ovajuda va kwata eenghwate omayovi omulongo ve nomwenyo, ve va twala koxulo yomhunda ndele ve va undwila poshi, ndele aveshe va teyauka. 13 Ndelenee omatanga ovakwaita ovo Amasia a lekela va shune komaumbo avo vaha kale pamwe naye mokuhomona, ova ya moilando yomuJuda, okudja kuSamaria fiyo okuBet-Horon, ndele va dipaa omayovi atatu vomuvo ndele va twala oixuulwa ihapu.
14 Ndele Amasia eshi e uya keumbo eshi a taataa Ovaedom, okwa eta pamwe naye oikalunga yovana vaEdom nokwe i lidikila i ninge oikalunga yaye ndele okwe linyongamena kuyo ndele te i xwikile omayambo. 15 Opo nee ehandu lOmwene la xwamena Amasia, ndele Ye a tuma kuye omuxunganeki, ndele ye okwe mu lombwela ta ti: “Omolwashike to kongo oikalunga yoshiwana osho, oyo ya nyengwa oku shi xupifa meke loye?” 16 Ndele fimbo ta popi naye, Amasia ta ti kuye: “Fye otwe ku tula po mbela, u ninge omupukululi wohamba? Mwena, oshike wa hala u dipawe?” Opo nee omuxunganeki a mwena ndele ta ti: “Ame ohandi dimbulukwa nokutya, Kalunga a hala oku ku nyonauna po, shaashi we shi ninga, ndelenee ino pwilikina epukululo lange.”
17 Ndele Amasia, ohamba yaJuda, eshi a kundafana novakulunhu, oya tuma kuJoas yaJoahas yaJehu, ohamba yaIsrael, tai ti: ila, tu lwe! 18 Ndelenee Joas, ohamba yaIsrael, ya shiivifila Amasia, ohamba yaJuda, tai ti: “Oshiyoosheuta shomuLibanon sha lombwela omusederi womuLibanon: ‘Omona woye okakadona, mu pa omumwange omumati, a ninge omwalikadi waye!’ Ndelenee oifitukuti i li mu Libanon, oya lyataula oshiyoosheuta nokweenda po kwayo. 19 Amasia, eshi wa finda Ovaedom, osho nee to linenepekele! Ame ohandi ku kunghilile u kale wa mwena meumbo. Omolwashike wa hala okweeta oudjuu, ove u kokele ovanhu naave mwene momupya?”
20 Ndelenee Amasia ina pwilikina. Osheshi oshinima eshi sha dja kuKalunga. Ye okwa li a hala oku ve liyandjela, shaashi ve likongela oikalunga vaEdom. 21 Opo nee Joas, ohamba yaIsrael, ya fikama, ndele va monafana puBet-Semes vo naAmasia, ohamba yaJuda. 22 Ndele Ovajuda va tewa kOvaisraeli, ndele va ya onhapo, keshe umwe keumbo laye. 23 Ndele Joas, ohamba yaIsrael, oya kwata puBet-Semes Amasia yaJoas yaAhasia, ohamba yaJuda, onghwate, ndele ye mu twala muJerusalem. Ndele a ngumauna po ohotekuma yaJerusalem oule wayo oshititano shi fike peemeta nhee, okudja koshivelo shaEfraim fiyo okoshivelo shokolonela. 24 Nokwa kufa oshingoldo ashishe noshisiliveli noinima aishe ya monika mongulu yaKalunga puObed-Edom, nomamona omongulu yohamba neenghwate, ndele ta shuna kuSamaria.
25 Ndele Amasia yaJoas, ohamba yaJuda, okwa kala nomwenyo konima yefyo laJoas yaJoahas, ohamba yaIsrael, omido omulongo nanhano. 26 Noinima imwe tai hepaulula Amasia, inya yotete naayo yaxuuninwa, inai shangelwa mbela membo leehamba daJuda nodaIsrael? 27 Ndele okudja kefimbo tuu olo Amasia eshi a amuka kOmwene, okwa hangakenwa muJerusalem, ndele okwa ya onhapo kuLakis. Ndele pa tumwa ovalumenhu ve mu shikula kuLakis, ndele ve mu dipaela ko. 28 Ndele oshimhu shaye ve shi londeka konghambe ndele okwa pakwa meembila deehamba moshilando shaDavid.
© Oshikwanyama Bible Revised © Bible Society of Namibia, 2008, 2012.
