OVATOKOLIPANGELI 10 - Oshikwanyama Bible (OKYB)

Ovatokolipangeli Tola naJair

1 Ndele konima yaAbimelek, Tola yaPua yaDodo womuIsaskar okwa fikama a xupife Israel. Ndele ye okwa kala muSamir, keemhunda daEfraim. 2 Ndele ye okwa pangela Israel omido omilongo mbali nanhatu. Ndele okwa fya nokwa pakwa muSamir.

3 Ndele konima yaye Jair, Omugilead okwa fikama nokwa pangela Israel omido omilongo mbali nambali. 4 Ndele ye okwa li e novana ovalumenhu omilongo nhatu, ava va londa eendongi omilongo nhatu deenyasha, ndele va li ve noilando omilongo nhatu. Yo otai ifanwa fiyo onena eli omikunda daJair, do di li medu laGilead. 5 Ndele Jair okwa fya nokwa pakwa muKamon.

Ovaisraeli tava pangelwa kOvafilisti nokOvaammoni

6 Ndele ovana vaIsrael ova ninga vali eshi shii momesho Omwene. Ndele va longela ooBaal nooAstarot noikalunga yOvaarami noikalunga yOvasidoni noikalunga yOvamoab noikalunga yovana vaAmmoni noikalunga yOvafilisti, ndele va efa Omwene, ndele itave mu longele. 7 Onghee hano ehandu lOmwene la xwamena Israel, ndele Ye okwe va landifa po momake Ovafilisti nomomake ovana vaAmmoni. 8 Ndele vo ova fininika nokuhepeka ovana vaIsrael omudo winya. Omido omulongo nahetatu ova hepeka Ovaisraeli aveshe venya va li kombada yaJordan medu lOvaamori muGilead. 9 Novana vaAmmoni va tauluka Jordan ndele va homona yo Juda naBenjamin noshilongo shaEfraim; osho ngaha Israel sha hangika kehepeko linene. 10 Opo nee ovana vaIsrael va kuwa kOmwene ndele tava ti: “Fye twa nyona kwoove, osheshi twa efa Kalunga ketu ndele twa longela ooBaal.” 11 Ndelenee Omwene okwa lombwela ovana vaIsrael ndele ta ti: “Ame inandi mu xupifa hamba mOvaegipiti nomOvaamori nomovana vaAmmoni nomOvafilisti, 12 nOvasidoni nOvaamaleki nOvamaoniti, eshi ve mu hepeka, ndele nye mwa kuwa kwaame, inandi mu xupifa hamba momake avo? 13 Ndelenee mwa efa nge ndele mwa longela oikalunga imwe. Onghee hano ihandi ke mu xupifa vali. 14 Indeni mu kuwe koikalunga oyo mwa hoolola. Yo nai mu xupife mefimbo lehepeko leni.” 15 Opo nee ovana vaIsrael tava ti kOmwene: “Fye twa nyona. Tu ningila ngaashi she ku wapalela. Tu xupifa ashike nena eli.” 16 Ndele vo ova kandula po oikalunga yokoilongo mokati kavo, ndele va longela Omwene. Opo nee Ye ine shi lididimikila vali Israel shi hepekwe.

17 Novana vaAmmoni ova ifanwa ve liongele ndele va onga onhanda muGilead. Ndelenee ovana vaIsrael va ongala ndele va onga onhanda muMispa. 18 Opo nee ovakwaita, ovakulunhu vaGilead, va pulafana umwe naumwe, tava ti: “Omulumenhu olyelye ou ta hovele okulwifa ovana vaAmmoni? Ye ota ka ninga omupangeli woonakukalamo aveshe vomuGilead.”