Etulumuko lokomesho
1 Tu tileni hano, fimbo eudaneko okuya ketulumuko laye li li po, paha monike nande umwe womunye a fyaala ondjilakati. 2 Osheshi eendjovo diwa otwe di udifilwa yo ngaashi venya, ndelenee eendjovo deudifo inadi va kwafa, osheshi inadi kwatafana meitavelo noonaku di uda. 3 Osheshi fye ava twa itavela, ohatu i metulumuko, ngaashi Oye ta ti:
“Mehandu lange onda ana:
‘Ovo itava fiki metulumuko lange,’ ”
nande oilonga yaye ya pwa nghee tuu okeshito lounyuni. 4 Osheshi monhele imwe okwa tonga efiku etiheyali ta ti: “Efiku etiheyali Kalunga okwa tulumukwa koilonga yaye aishe,” 5 ndele paife naapa vali:
“Ovo itava ka fika metulumuko lange.”
6 Hano otashi kala ngaha: Vamwe tava i mo, ndele ovo va udifilwa tete eendjovo diwa inava ya mo molwokuhadulika. 7 Ye okwa pangela vali efiku limwe, efiku eli nokulombwelifa David, eshi pa pita efimbo lile li fike apa, ngaashi pa tiwa:
“Nena eli ngeenge tamu udu ondaka yaye,
inamu kukutika omitima deni.”
8 Osheshi Josua ngeno e va fikifa ketulumuko, ngeno Kalunga ina tonga vali efiku lokomesho. 9 Otapa kala hano etulumuko lEshabata lokomesho koshiwana shaKalunga. 10 Osheshi ou a ya metulumuko laye, oye ta tulumukwa yo koilonga yaye ngaashi Kalunga kuyaye mwene.
Tu lalakaneni noudiinini nelineekelo
11 Hano tu diinineni tu fike metulumuko olo, paha kale nande umwe ta punduka nokushikula oshihopaenenwa shokuhadulika ngaashi venya. 12 Osheshi ondjovo yaKalunga oi nomwenyo neenghono, noi neememo i dule eongamukonda leememo keembinga mbali, otai tu, ndele tai tongola omwenyo nomhepo, eengolo nomungo; ndele i shii okutokola omadilongo nomadiladilo omutima. 13 Ndele kape na nande oshishitwa shimwe sha holekwa moipafi yaye, ndelenee aishe oya kala ngaho poluhaela momesho aye, kwaau tu noku mu lihepaululila.
14 Hano eshi tu nomupristeli omukulunhu a tokola omaulu, Jesus, Omona waKalunga, tu dameni hano kehepaululo. 15 Osheshi omupristeli wetu omukulunhu haye ou, ehe uditile oungone wetu olukeno, ndelenee Oye ou a shindwa moinima aishe ngaashi fye, ndelenee ke netimba. 16 Tu yeni hano kolukalwa lefilonghenda tu neyombamo, tu talwe nonghenda fye tu mone efilonghenda loku tu kwafa pefimbo liwa.
© Oshikwanyama Bible Revised © Bible Society of Namibia, 2008, 2012.
