Oaltari yexwikilo, nelikoshelotemba, nehale lokomesho
1 Ye okwa ninga yo oaltari yexwikilo yomuti womwoonde. Oule wayo omaludimbo atano, nolumbubu layo omaludimbo atano, noule wopombada omaludimbo atatu, hano yo i neembinga nhee. 2 Ndele okwa ninga eembinga daye meekolonela dayo nhee. Eembinga dayo da li kumwe nayo, oshinhimbu shimwe ashike. Nokwe i vaeka noshikushu. 3 Nokwa ninga yo oilongifo aishe yoaltari nokutya, eembiya noixupulo nomalonga noitwifo yeenyala noikwatelwa yomakala. Oinima yayo aishe e i ninga oshikushu. 4 Nokwa ningila yo oaltari oshiinda shodalate nokutya, eendjadja dodalate yoshikushu koshi yolukambo kombinga yokoshi okudja poshi fiyo opokatielela koaltari. 5 Nokwa teleka monhelekelo eengodo nhee keenhele nhee keendjadja dodalate yoshikushu ngaashi eenhele domitengi. 6 Nomitengi dokuhumbata e di ninga momuti womwoonde nokwe di vaeka noshikushu. 7 Nomitengi okwe di xwekela meengodo keembinga doaltari, i humbatwe nado. Ye okwe i ninga noipilangi ya li i nekololo.
8 Nokwa ninga yo elikoshelotemba loshikushu noshikwatelwamhadi shalo shoshikushu shoutengelelo vovakainhu ovo va kala nokuyakula poshivelo shetwali leongalo.
9 Nokwa ninga yo ehale lokomesho. Kombinga yokoumbuwanhu langhele lwokoumbuwanhu opa li oshiyata sha kambakanifwa, oliina iwa ya tungwa neengodi da poshelwa kumwe. Oule washo omaludimbo efele limwe. 10 Eengudi dasho omilongo mbali noikwatelwamhadi yoshikushu yado omilongo mbali. Eehake neelinga deengudi da li oshisiliveli. 11 Nosho yo kombinga yokoumbangalanhu oshiyata sha kambakanifwa ko, noule washo omaludimbo efele limwe. Eengudi dasho omilongo mbali noikwatelwamhadi yado yoshikushu omilongo mbali. Eehake neelinga deengudi da li oshisiliveli. 12 Nokombinga yokouninginino opa li oshiyata sha kambakanifwako, oule washo omaludimbo omilongo nhano. Neengudi dasho omulongo noikwatelwamhadi yado omulongo. Eehake neelinga deengudi da li oshisiliveli. 13 Nokombinga yokoushilo langhele kepito letango opa li oshiyata sha kambakanifwa omaludimbo omilongo nhano. 14 Kombinga imwe yoshivelo pa li oshiyata sha kambakanifwa ko shi fike pomaludimbo omulongo naatano neengudi dasho nhatu noikwatelwamhadi yado itatu. 15 Nosho yo kombinga ikwao nokutya, kombinga nombinga yoshivelo shehale lokomesho, oshiyata sha kambakanifwa ko sha li shi fike pomaludimbo omulongo naatano, eengudi dasho nhatu noikwatelwamhadi yado itatu. 16 Oiyata ya kambakanifwa keembinga adishe dehale lokomesho oya li oliina iwa ya tungwa neengodi da poshelwa kumwe. 17 Noikwatelwamhadi yeengudi ya li oshikushu, neehake neelinga oda li oshisiliveli, nomitwe deengudi da vaekwa noshisiliveli. Nado vene nokutya, eengudi adishe domehale lokomesho da li di neelinga doshisiliveli. 18 Noshiidilifoyata shoshivelo shehale lokomesho la li oshiyata shomavala, oliina iwa ya tungwa neengodi da poshelwa kumwe dopurpuri noditilyana da fa ohonde. Oule washo omaludimbo omilongo mbali, noule wopombada omaludimbo atano, u fike pomutameno woshiyata, naanaa ngaashi oiyata ya kambakanifwa kehale lokomesho. 19 Eengudi dasho nhee noikwatelwamhadi yado ine yoshikushu, ndelenee eehake dado da li oshisiliveli, nomitwe deengudi da vaekwa noshisiliveli ngaashi eelinga dado. 20 Neendungu adishe detwali liyapuki nodehale lokomesho keembinga adishe da li oshikushu.
Oshingoldo noshisiliveli noshikushu sha manenwa moilonga
21 Hano oyo omuvalofuto woitungifa yetwali liyapuki, etwali londobwedi, ngaashi ya valulilwa palombwelo laMoses pokuyakulwa kwOvalevi meuliko laItamar, omona womupristeli Aron. 22 NaBesaleel yaUri, omona waHur womepata laJuda, okwa ninga aishe ei Omwene e i lombwela Moses. 23 Ndele pamwe naye pa kala Oholiab yaAhisama womepata laDan, omulongielela nomunongo nomutungi woiyata yomavala noyopurpuri noitilyana ya fa ohonde nowoliina iwa.
24 Oshingoldo eshi sha manenwa moilonga, moilonga aishe yokushakenifa etwali liyapuki, osha li shi fike peekilograma eyovi, pakuyeleka kwosekeli yetwali liyapuki. 25 Noshisiliveli sha tambulwa kovanhu mokuvalwa kwavo neongalo osha li shi fike peekilograma omayovi atatu nomafele ane nomilongo nhatu, pakuyeleka kwosekeli yetwali liyapuki.
26 Obeka imwe (tashi ti etata losekeli pasekeli letwali liyapuki) komunhu keshe, heeno komunhu keshe ou a tulwa momuvalu, ou a wanifa omido omilongo mbali ile e di dule, kumwe kovanhu ve fike pomayovi omafele ahamano nomayovi atatu, nomafele atano nomilongo nhano. 27 Neekilograma omayovi atatu nomafele ane doshisiliveli da longifwa mokuteleka monhelekelo oikwatelwamhadi efele yetwali liyapuki noikwatelwamhadi yoshiyatatukulifo; oshikwatelwamhadi imwe, yeekilograma omilongo nhatu nanhee. 28 Ndelenee eekilograma omilongo nhatu doshisiliveli e di manena mo meehake deengudi nokwa uvika omitwe dado nokwe di ningila eelinga. 29 Ndele oshikushu sha etwa eyambo, osha li shi fike peetalenti omilongo heyali neesekeli omayovi avali nomafele ane. 30 Ndele ye okwe shi longifa moikwatelwamhadi poshivelo shetwali leongalo, nokwa ninga nasho oaltari yoshikushu noshiinda shasho shodalate yoshikushu noilongifo aishe yoaltari, 31 noikwatelwamhadi aishe keembinga adishe noikwatelwamhadi yoshivelo shehale lokomesho neendungu adishe detwali liyapuki, neembosha adishe dehale lokomesho.
© Oshikwanyama Bible Revised © Bible Society of Namibia, 2008, 2012.
