Oilalakanenwa i lili noi lili yaEfraim noyaJuda
1 Efraim a dingilila nge noipupulu neumbo laIsrael nomakengelelo. Juda yo ke nekwatafano naKalunga, omuyapuki, ou omudiinini.
2 Efraim ta lalakanene omhepo, ndele ta shikula omhepo yokoushilo. Efiku alishe ye ota hapupalifa oipupulu nehanauno, ndele otava ningi ehangano naAsiria, fimbo omaadi taa twalwa kuEgipiti. 3 Omwene ota tu eemhata naJuda, ndele ta handukilile Jakob eendjila daye, ndele te mu pe pailonga yaye. Medimo laina okwa kwata oshififinwa shomumwaina, ndele mefimbo leenghono daye okwa kondja naKalunga. 4 Heeno, oye a kondja nomweengeli, ndele a findana, okwa lila nokwe mu ilikana. MuBetel oye e mu mona noko ye okwa popya nafye. 5 Omwene Kalunga komatanga ovakwaita, Omwene, olo edina laye.
6 Naave u nokushuna kuKalunga koye. Diinina efilonghenda nouyuki. Ndele eteelelo loye li tula alushe muKalunga. 7 Kaanan, meke laye omu noshiyelekifo shihe fi shoshili. E hole okukotokela. 8 Ndelenee Efraim ota ti: Ame nda punapala, ame nde likongela oupuna. Musho nde shi lilongela, itamu monika nande sha tashi pe nge etimba.
9 Ndelenee Aame Omwene, Kalunga koye okudja kedu laEgipiti, Ame ohandi ke ku tula momatwali, u kale mo ngaashi momafiku oshivilo shomatwali. 10 Ame onda lombwela ovaxunganeki ndele nda holola omamoniko mahapu, nonda popififa ovaxunganeki eendjovo domayele. 11 MuGilead ngeenge mwa kala omakotokelo aeke, otava ka ninga oinima yongaho. MuGilgal mwa tomenwa eemhedi, onghee hano eealtari davo tadi ka kala ngaashi eenduba domamanya momapya.
12 Ndele Jakob okwa ya onhapo koixwa yomuAram, naIsrael okwa longela omukainhu. Nomolwomukainhu a lifa oimuna.
13 Ndelenee Omwene okwa pitifa Israel neke lomuxunganeki medu laEgipiti, nomuxunganeki e shi lifa. 14 Efraim okwe mu handukifa nehandu lilula. Onghee Omwene waye ta ka alulila omatimba aye kombada yaye, heeno, oilonga yaye yohoni te ke i mu alulila.
© Oshikwanyama Bible Revised © Bible Society of Namibia, 2008, 2012.
