Jehu ta xunganeke nokupopya Baasha
1 Ndele ondjovo yOmwene ye uya kuJehu yaHanani, tai popi Baasha, ndele tai ti: 2 “Ame nde ku tumba mo mondwi ndele nde ku ninga ohamba yovanhu vange Ovaisraeli, ndelenee ove wa enda nondjila yaJerobeam ndele wa hongaula ovanhu vange Ovaisraeli okunyona, opo nee va handukifa nge nomatimba avo. 3 Onghee hano Ame ohandi ka komba po diva Baasha neumbo laye, ndele handi ka ninga eumbo loye ngaashi eumbo laJerobeam yaNebat. 4 Omukwabaasha keshe, ou ta file moshilando, ota ka liwa po keembwa, naau womuye ta fi pondje, moluhaela, ota ka liwa po keedila dokeulu.” 5 Noinima imwe tai hepaulula Baasha nasho e shi ninga noilonga yaye inene, inai shangelwa mbela membo lefimbo leehamba dOvaisraeli? 6 Ndele Baasha okwa ka nangala pooxe, nokwa pakwa muTirsa. Nomona waye Ela okwa ninga ohamba ponhele yaye. 7 Nondjovo yOmwene, e i lombwela Jehu yaHanani, omuxunganeki, otai popi yo Baasha neumbo laye, hamolwowii aushe e u ninga moipafi yOmwene, e mu handukife noilonga yaye yomake, onghee a ningwa ngaashi epata laJerobeam, ndelenee omolwokudipaa yo, eshi a dipaa epata olo.
Simri naOmri eehamba daIsrael
8 Momudo omutimilongo mbali nomutihamano waAsa, ohamba yaJuda, Ela yaBaasha a ninga ohamba yaIsrael muTirsa, nokwa pangela omido mbali. 9 Ndelenee omupiya waye Simri, omukulunhu wovakwaita woshitukulwatata shomatemba oita, ove mu hangakena. Fimbo Ela okwa nwa nokwa kolwa muTirsa meumbo laArsa, omukulunhu womouhamba muTirsa, 10 Simri e uya mo nokwe mu dipaa momudo omutimilongo mbali nomutiheyali waAsa, ohamba yaJuda, ndele a ninga ohamba ponhele yaye. 11 Ndele ye eshi a ninga ohamba nokwa kala omutumba kolukalwapangelo, okwa mana po epata alishe laBaasha. Ndele ina efa nande omulumenhu umwe womoludalo laye a kale nomwenyo, nande omukwatakanifi wepata ile okaume. 12 Osho ngaha hano Simri a hanauna po eumbo alishe laBaasha pandjovo yOmwene, Ye e i lombwela omuxunganeki Jehu mokupopya Baasha, 13 omolwomatimba aeshe aBaasha noomona waye Ela, aa ve a ninga ndele va hongaula Israel okunyona, opo va handukife Omwene, Kalunga kaIsrael, omolwoikalunga yavo yongaho. 14 Noinima imwe tai hepaulula Ela naashishe e shi ninga, inashi shangelwa mbela membo lefimbo leehamba daIsrael?
15 Momudo omutimilongo nhee nomutiheyali waAsa, ohamba yaJuda, Simri okwa li ohamba muTirsa omafiku aheyali, fimbo ovakwaita va kondeka Gibbeton, sha li sha pangelwa kOvafilisti 16 novakwaita ava va kondeka, eshi va uda nokutya, Simri okwa kengelela ohamba ndele e i dipaa yo, opo nee Ovaisraeli aveshe vomonhanda va ninga Omri, ondjai yovakwaita, ohamba yaIsrael mefiku tuu olo. 17 Ndele Omri pamwe nOvaisraeli aveshe va fikama va dja kuGibbeton, ndele tava kondeke Tirsa. 18 Simri eshi a mona nokutya, oshilando sha teka, okwa ya mohotengulu yomongulu yohamba nokwa xwika po ongulu yohamba kombada yaye, nosho ngaha a fila mo, 19 omolwomatimba aye e a ninga, eshi a ninga, osho inashi yuka momesho Omwene, eshi a enda nondjila yaJerobeam nomomatimba oo ye a ninga mokuhongaula Israel okunyona. 20 Oinima imwe tai hepaulula Simri nehangakeno laye, inali shangelwa mbela membo lefimbo leehamba dOvaisraeli?
21 Opo nee ovanhu vaIsrael va tukauka oitukulwa ivali: Oshitukulwa shimwe shovanhu osha shikula Tibni yaGinat, ve mu ninge ohamba, noshitukulwa shikwao sha shikula Omri. 22 Ndelenee ovanhu ava va shikula Omri va li ve neenghono, ve dule ovanhu ovo va shikula Tibni yaGinat. Ndele Tibni okwa fya, ndele Omri a ninga ohamba.
23 Momudo omutimilongo nhatu naumwe waAsa, ohamba yaJuda, Omri okwa ninga ohamba yaIsrael nokwa pangela omido omulongo nambali. Ye okwa li ohamba omido hamano muTirsa. 24 Ndele okwa landa omhunda yaSamaria kuSemer noitalenti ivali yoshisiliveli, nokwa tunga oshilando komhunda, ndele e shi lukila Semer, omwene womhunda, Samaria. 25 Ndele Omri okwa ninga osho inashi yuka momesho Omwene nokwa longa owii u dule owii wovatetekeli vaye aveshe. 26 Osheshi a enda neendjila adishe daJerobeam yaNebat nomomatimba enya ye a hongaula Israel okunyona, opo a handukife Omwene Kalunga kaIsrael noikalunga yaye yongaho. 27 Noinima imwe oyo tai hepaulula Omri, osho e shi ninga, noilonga yaye inene e i longa, inai shangelwa mbela membo lefimbo leehamba daIsrael? 28 Ndele Omri okwa ka nangala pooxe nokwa pakwa muSamaria. Nomona waye Ahab okwa ninga ohamba ponhele yaye.
Ahab ohamba yaIsrael
29 Ndele Ahab yaOmri okwa ninga ohamba yaIsrael momudo omutimilongo nhatu nomutihetatu waAsa, ohamba yaJuda. Ndele Ahab yaOmri okwa li a pangela Israel muSamaria omido omilongo mbali nambali. 30 Ndele Ahab yaOmri okwa ninga osho inashi yuka momesho Omwene, e dule aveshe ovo ve mu tetekela. 31 Ndele sha li inashi mu wanena osho eshi a enda nondjila yaJerobeam yaNebat, ndelenee okwa hombola Isabel, omona waEtbaal, ohamba yaSidon nokwa fimaneka Baal nokwe shi linyongamena, 32 nokwa tungila Baal oaltari mongulu yaBaal, oyo e i tunga muSamaria. 33 Ahab okwa ninga yo omuti wolupwelele laAsera, ndele Ahab okwa longa owii uhapu unene nokwa handukifa Omwene, Kalunga kaIsrael, e dule eehamba adishe de mu tetekela. 34 Pomafiku aye Hiel wokuBetel okwa tungulula Jeriko. Ye eshi a tunga ekanghameno lasho, oshiveli shaye Abiram osha fya. Ndele eshi kwa li ta diki omivelo dasho, odo de mu kufa onghelo yaye Segub, pandjovo yOmwene, e i lombwelifa Josua yaNun.
© Oshikwanyama Bible Revised © Bible Society of Namibia, 2008, 2012.
