Eilikano lomunaudu
Epsalme laDavid, edimbulukifoyambo.
1 Omwene, ino tokola nge mehandu loye,
Ove ino denga we likesha!
2 Osheshi oikuti yoye oya tyuula nge,
noudjuu weke loye otau findile nge poshi.
3 Mombelela yange kamu na nande
onhumba inai yehama molwehandu loye,
nomomakipa ange kamu na nande
etulumuko molwoulunde wange.
4 Owii wange owa ninginifa omutwe wange,
wa fa omutengi mudjuu,
wa dula nge eenghono.
5 Oidinda yange oya mbuta, tai nyika nai,
ya twiyukila nge molwoulai wange.
6 Onda tifuka, handi ende omwoodimba,
nda djala oikutu youfiye.
7 Eenho dange oda fulila tadi pi,
nomolutu lange kamu na nande onhumba itai vele.
8 Onda alamekwa, nda mongoshoka,
mokundakula kwomutima wange
ohandi kuu pombada.
9 Omwene, eshi nda hala,
ashishe ou shi shii,
netwo lomadima ange inali ku holekwa.
10 Omutima wange otau lomhauka,
neenghono dange oda fiya nge po,
nouyelele womesho ange yo owa kana.
11 Ookaume kange novashiivikile
ova tekukifwa komupya wange,
novambuletwelela otava kala nge kokule.
12 Ava tava nangele omwenyo wange,
otava tele omiyo,
naava va hala okuyehameka nge,
otava lombola oixuna,
ndele tava dutu ekonda efiku alishe.
13 Ndelenee ame ndi li ngaashi omufitamatwi, nghi udite sha,
nomufitandaka ou ita makula okanya kaye.
14 Ondi li po, nda fa nokuli omulumenhu iha udu ko,
noehe na nande enyamukulo mokanya kaye.
15 Osheshi Omwene, onde lineekela kwoove,
Omwene, Kalunga kange, Oove ou,
to pe nge enyamukulo.
16 Osheshi onda tya: Ngeno uhe va efe,
va lengaife nge,
neemhadi dange, ngeenge tadi fenhuka,
vo vaha shiive okufulalalela nge.
17 Osheshi ondi li popepi nokuteyauka eenghono,
nouyehame wange opo u li alushe.
18 Akutu, ohandi ku hepaululile owii wange,
nonda nyika oufiye omolwomatimba ange.
19 Ndelenee ava tava lwifa nge oshimha, ovanaenghono,
naava tava tondele nge oinima yongaho, ove li po vahapu.
20 Ouwa otave u pilulile nge owii,
ndele tava shivile nge olwoodi,
molwaashi nda anyena mouwa.
21 Ino efa nge, Omwene!
Kalunga kange, ino kala kokule naame!
22 Endelela u kwafe nge,
Omwene, exupifo lange!
© Oshikwanyama Bible Revised © Bible Society of Namibia, 2008, 2012.
