OMAYELETUMBULO 31 - Oshikwanyama Bible (OKYB)

Ina yohamba Lemuel ta longo omona waye omumati

1 Eendjovo daLemuel, ohamba yaMassa, ina e i kumaida nado: 2 “Oshike, omumwange omumati, heeno, oshike omumwange womedimo lange, heeno, oshike omumwange womaudaneko ange, ndi nokutya? 3 Eenghono doye ino di yandja kovakainhu, kwaava hava nyono po eehamba. 4 Akutu Lemuel, inashi wapalela eehamba, heeno, inashi wapalela eehamba okunwa omaviinyu ndele inashi wapalela ovapangeli okupula: Oikunwa idjuu oi li peni? 5 Osheshi mokunwa kwaye oikolwifa ta dimbwa eenghedimhango ndele ta pengifa ouyuki wovakwanaluhepo aveshe. 6 Oikolwifa i peni ou a nyika okunyonauka po, nomaviinyu ava ve neemwenyo da nyika oluhodi. 7 Ye na nwe, opo a dimbwe oluhepo laye, ndele ita dimbulukwa vali oupyakadi waye. 8 Okanya koye ka makulila omufitandaka, u popile moihokolola aveshe hava fininikwa. 9 Makula okanya koye, tokola pauyuki, u yukife eendjovo deehepele nodovakwanaluhepo.”

Omwalikadi muwa

10 Olyelye ta ka mona omwalikadi muwa? Ondilo yaye oinene i dule ondilo yomba koshilanda. 11 Omutima womulumenhu waye tau mu lineekele, ye ita pumbwa eliko. 12 Oye ta ningile omulumenhu waye osho shiwa, hasho eshi shii momafiku aeshe omokukalamwenyo kwaye. 13 Ye ota humbata oshisho sholududi leedi nosholiina ndele ta longo nomake e nehalo liwa. 14 Ye e li ngaashi eeskepa domulandifi, ota kongo kokule omungome waye. 15 Ndele ye oha meneka oufiku, neumbo laye te li pe eendja noitukulwa yavo kovapiya vaye. 16 Ye a hala epya ndele te li lande. Omeliko lomake aye te litwikile oshikokola shomiviinyu. 17 Oye te lidike moshiya shaye neenghono, ndele ta pameke omaoko aye. 18 Oye e wete omaliko aye taa hapupala. Olamba yaye itai dimi oufiku. 19 Eke laye tali kwata oshihodilifo nominwe daye tadi kwata oshitungifo shoshiyata. 20 Eke laye te li futululile eehepele, omake aye avali ote a twala komukwanaluhepo. 21 Eumbo laye ihali tila molweandu, osheshi eumbo laye alishe la dikwa olududi litilyana leedi. 22 Ye ote liningile omakumbafa. Oikutu yaye oyo oliina iwa nopurpuri. 23 Omulumenhu waye a shiivika poshivelo, eshi ta kala ko omutumba pamwe novakulunhu voshilongo. 24 Ye ota ningi eehema, ndele te di landifa, nomiya doshiyata te di shingifa po komulandifi woipindi. 25 Eenghono nefimano, odo oshikutu shaye, ndele ta yolo efiku tali ke uya. 26 Okanya kaye te ka makulile eendjovo dounongo, nomalongo matalala e li kelaka laye. 27 Ota pashukile nawa oilonga aishe yomeumbo laye, ndele ita li omungome wondede. 28 Ovana vaye ovamati tava fikama ndele tave mu pandulile elao laye nosho yo omulumenhu waye, ndele ye te mu pandula ta ti: 29 “Ovakainhu vahapu ve noudiinini moilonga, ndelenee ove u va dule aveshe unene.” 30 Onhemokainhu kai shii kulineekelwa. Ouwa womukainhu tau xulu po. Omwalikadi ou ha tila Omwene na hambelelwe. 31 Na shambukwe komwenyo molwoilonga yomake aye. Noilonga yaye nai mu pandule poshivelo.