Gideon ta shikula Ovamidian
1 Opo nee ovakwaita vaEfraim ve mu lombwela: “We tu ningila shike ngaha, ove eshi ino tu shiva, ove eshi wa ka lwifa Ovamidian?” Ndele ve mu twifa eemhata unene. 2 Ndelenee ye ta ti kuvo: “Nda ninga ngeno shike shi fike pwaashi nye mwa ninga? Epupudululo laEfraim ndishi li dule ekolo leeviinyu daAbieser? 3 Kalunga a yandja eehamba daMidian, Oreb naSeeb momake eni, ndelenee ame nda ninga shike ngeno shi yelekwe naashi mwe shi ninga?” Ye eshi a popya eendjovo ei, vo ova handukuluka.
4 Ndele Gideon e uya kuJordan, novalumenhu omafele atatu ava va li puye, va tauluka va loloka molwokutaataa. 5 Ndele ye okwa lombwela ovalumenhu vomuSukkot: “Ovakwaita ava hava shikula nge, va peni omingome, osheshi vo ova loloka, naame ondi noupyakadi mokushikula Seba naSalmunna, eehamba dOvamidian.” 6 Ndelenee ovakulunhu vomuSukkot tava pula: “Eke laSeba nolaSalmunna oli li nokuli meke loye, fye tu pe omatanga oye omingome?” 7 Opo nee Gideon ta ti: “Onghee hano, Omwene ngeenge ta yandje meke lange Seba naSalmunna, ame ohandi ka xwa nokunyanyaula ombelela yeni nomano omofuka neeshosholo.” 8 Ndele oko okwa dja ko ta i kuPenuel, ndele okwa popya navo ngaha. Ndelenee ovalumenhu vomuPenuel ve mu nyamukula ngaashi ovalumenhu vomuSukkot ve mu nyamukula. 9 Opo nee ta lombwele ovanhu ava vomuPenuel ndele ta ti: “Ame ngeenge handi aluka nombili, ohandi ka ngumauna po ohoteshungo ei.”
10 Ndelenee Seba naSalmunna va li muKarkor, nomatanga avo, e fike pomayovi omulongo nomayovi atano a li puvo, vo aveshe ava va xupa po komatanga aeshe ovanhu vokoushilo. Ndelenee ava va dipawa po, va li ve fike pomayovi efele nomayovi omilongo mbali, ava va li ve nomaongamukonda. 11 Ndele Gideon okwa enda nondjila yovakali meefaila, langhele lwokoushilo waNobah naJogbeha, ndele okwa taataa omatanga ovakwaita fimbo omatanga a tulumukwa ehe noshisho. 12 Ndele Seba naSalmunna va ya onhapo, ndelenee vo ve va shikula, ndele va kwata eehamba edi mbali dOvamidian, Seba naSalmunna, eshi va halakanifa onhanda aishe.
13 Ndele Gideon yaJoas eshi a aluka a dja kolwoodi ta piti monghondo yaHeres, 14 okwa kwata omumati umwe womovanhu vomuSukkot nokwe mu pula noku mu pululula, ndele ye okwe mu shangela mo omadina omalenga novakulunhu vomuSukkot, ovalumenhu omilongo heyali navaheyali. 15 Ndele ye eshi e uya kovanhu vomuSukkot, ye ta ti: “Seba naSalmunna ovava, omolwavo mwa sheka nge nokutya: Eke laSeba nolaSalmunna oli li tuu nokuli meke loye, opo tu pe omatanga oye ovakwaita va loloka omingome?” 16 Opo nee ye okwa kwata ovakulunhu voshilando. Nokwa kufa omano omofuka neeshosholo. Ndele okwa longa ovalumenhu vomuSukkot nayo oshileshwa. 17 Nohoteshungo yomuPenuel okwe i ngumauna po nokwa dipaa ovalumenhu vomoshilando. 18 Ndele okwa pula kuSeba nokuSalmunna: “Ovalumenhu venya mwe va dipaa puTabor ovakwashike?” Ndele vo va nyamukula: “Ngaashi ove, osho va li: olupe lakeshe la fa olupe lovana vohamba.” 19 Opo nee ye ta ti: “Vo va li ovamwameme, ovana vameme! Oshili ngaashi Omwene e nomwenyo, ngeno mwe va efele va kale nomwenyo, ngeno itandi mu dipaa!” 20 Ndele ye ta ti kuJeter, oshiveli shaye: “Fikama, va dipaa!” Ndelenee omumati ina pweya mo eongamukonda, shaashi ye okwa tila. Osheshi ye okwa li natango okaana. 21 Opo nee Seba naSalmunna tava ti: “Fikama ove mwene u tu twe, osheshi ngaashi omulumenhu e li nosho yo eenghono daye di li.” Opo nee Gideon okwa fikama nokwa dipaa Seba naSalmunna. Ndele okwa kufa po omaulenga omeefingo deengamelo davo.
Gideon ta tungifa oshikutu shokomapepe
22 Opo nee ovalumenhu Ovaisraeli va lombwela Gideon ndele tava ti: “Tu pangela ove mwene, nomona woye omumati nomutekulu woye, osheshi ove we tu xupifa momake Ovamidian.” 23 Ndelenee Gideon e va nyamukula ta ti: “Ame inandi hala oku mu pangela, nomona wange yo ite ke mu pangela. Omwene ote ke mu pangela.” 24 Ndele Gideon okwe va lombwela ta ti: “Onda hala oku mu indila sha. Pei nge, keshe umwe, oulinga mwe va pewa oixuulwa!” Osheshi venya va li ve na oulinga voshingoldo, shaashi vo va li Ovaismaeli. 25 Opo vo va tya: “Ohatu va yandje nehafo.” Ndele vo ova yala oshikutu shokombada poshi, ndele keshe umwe a ekela po okalinga komoixuulwa yaye. 26 Ndele ondjele youlinga voshingoldo ovo e va indila ya li i fike peekilograma omilongo mbali ponho yomaulenga nomaliwapeko omomatwi noikutu yapurpuri, ei ya li ya djalwa keehamba dOvamidian, noponho yomalyenge a li meefingo deengamelo dado. 27 Ndele Gideon okwa ninga nayo oshikutu shokomapepe, ndele e shi dika moshilando shaye Ofra. NOvaisraeli aveshe ove shi shikula mokuhaela. Ndele eshi sha ninga omwiyo kuGideon neumbo laye. 28 Osho ngaha hano Ovamidian va li ve nokulininipika moipafi yovana vaIsrael, ndele venya inava tanganeneka omitwe davo vali. Noshilongo sha kala sha tulumukwa mefimbo laGideon omido omilongo nhee.
Oludalo laGideon nefyo laye
29 Ndele Jerubbaal yaJoas okwa ya keumbo nokwa kala ko. 30 Ndele Gideon okwa li e novana ovalumenhu omilongo heyali ava ye e va dala, osheshi ye okwa li e novalikadi vahapu. 31 Ndele oshikumbu shaye, ou a kala muSekem, e mu dalela yo okaana okamati, ndele e ka luka Abimelek. 32 Ndele Gideon yaJoas okwa fya a kulupa ndele a pakwa mombila yaxe Joas muOfra shOvaabieser. 33 Ndelenee Gideon eshi a fya, ovana vaIsrael va shikula vali ooBaal mokuhaela. Ndele ve liningila Baal-Berit kalunga kavo. 34 Novana vaIsrael inava dimbulukwa Omwene Kalunga kavo, ou e va xupifa mo momake ovatondadi vavo keembinga adishe. 35 Ndele vo inava alulila eumbo laJerubbaal (Gideon), omolwouwa aushe ou okwa li a ningila Israel.
© Oshikwanyama Bible Revised © Bible Society of Namibia, 2008, 2012.
