Ovakulunhu nava file oshiwana shaKalunga oshisho
1 Ovakulunhu vomokati keni ohandi va kumaida, ame ou ndi li omukulunhu mukweni nondobwedi yomahepeko aKristus nanakupewa mo pamwe mefimano olo tali ka holoka. 2 Lifeni oufita waKalunga mwe u pewa, hakefininiko, ndelenee omehalo liwa; hamolweliko la kaka, ndelenee okehalo liwa lokomwenyo pahalo laKalunga, 3 inamu pangela ngaashi omalenga ava mwe va pewa, ndelenee ningeni ovahopaelelwa voufita. 4 Omufita omukulunhu eshi ta ka holoka, onye notamu ka pewa oshishani shefimano itashi lembe.
Ovanyasha tava kumaidwa
5 Osho ngaha nye, ovanyasha, dulikeni kovakulunhu, naamushe mokukalafana kweni djaleni elininipiko, osheshi: “Kalunga oha tondo ovalinenepeki, ndele ovalininipiki te va file onghenda.” 6 Lininipikeni hano koshi yeke li neenghono laKalunga, opo e mu nenepeke pefimbo la wapala. 7 Noshisho sheni shi mu dikeni, osheshi Oye te mu file oshisho.
8 Kaleni mu nelidiliko nomwa pashuka, omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po. 9 Mu lwifeni mwa pama meitavelo, nye mu kale mu shi shii, novamwaxo yo ve li mounyuni ove nokuhumbata omahepeko a tya ngaha.
Kalunga Oye omudiinini
10 Ndele Kalunga kefilonghenda alishe, ou e mu ifanena oshinge shaye shaalushe muKristus Jesus, eshi mwe lididimika okafimbo, Oye ote mu longekida, te mu yambidida, te mu pameke note mu kanghameke. 11 Oye e neenghono alushe fiyo alushe. Amen.
Omakundilo
12 Silvanus, omumwatate omudiinini, ngaashi nde mu lineekela, onde mu shangifa edi pauxupi noku mu kumaida noku mu hepaululila efilonghenda eli mu li mo, olo tuu efilonghenda lashili laKalunga. 13 Tamu kundilwa po keongalo lomuBabilon, la hoololwa ngaashi nye, nokomona wange Markus. 14 Minikafaneni nokuxupita kwohole.
Ombili nai kale nanye amushe ava mu li muKristus! Amen.
© Oshikwanyama Bible Revised © Bible Society of Namibia, 2008, 2012.
