Jeremia ta kumaida ve liyandje mepangelo laBabilon
1 Pehovelo lepangelo laSedekia yaJosia, ohamba yaJuda, Jeremia okwa hangika kondjovo ei ya dja kOmwene, 2 Omwene okwa lombwela nge ndele ta ti ngaha: “Liningila ondjoko pamwe neestropa, u i litwike kofingo. 3 I tumina ohamba yaEdom nohamba yaMoab, nohamba yaAmmoni, nohamba yaTirus, nohamba yaSidon, pamwe novatumwa vavo ve uya kuSedekia, ohamba yaJuda, kuJerusalem. 4 Ndele va lombwela va ka lombwele oovene vavo va tye: ‘Omwene womatanga ovakwaita, Kalunga kaIsrael, osho ta ti: Oovene veni omu noku va lombwela mu tye: 5 “Neenghono dange dinene nokwooko kwange kwa yeluka, Ame onda shita edu novanhu noifitukuti i li kombada yedu, nohandi li pe keshe tuu nda hala oku li mu pa. 6 Ndele paife oilongo ei aishe onde i yandja meke lomupiya wange Nebukadnesar, ohamba yaBabilon noifitukuti yo aishe yomofuka ohandi i mu pe i mu longele. 7 Noiwana aishe oi noku mu longela, oye mwene nomona waye nomutekulu waye fiyo efimbo loshilongo shaye tali uya yo, opo nee oilongo ihapu neehamba di neenghono otadi mu longifa yo.
8 “ ‘ “Nakeshe oshiwana nouhamba tashi anye oku mu longela, oye tuu ou Nebukadnesar, ohamba yaBabilon, ndele tashi anye okutula ofingo yasho mondjoko yohamba yaBabilon, oshilongo tuu osho ohandi shi dengifa eongamukonda nondjala noudu wolutapo, Omwene osho ta ti, fiyo ohandi shi manifa po sheke keke laye. 9 Hano nye, inamu pwilikina ovaxunganeki veni neendudu deni neendjodi deni neemhule deni, ava tave mu lombwele tava ti: Ahowe, nye kamu na apa tamu longela ohamba yaBabilon. 10 Osheshi vo otave mu xunganekele oipupulu ndele tave mu twalifa kokule nedu leni, ndele handi mu te mo, nye tamu ka nyonauka po. 11 Ndelenee oshiwana tashi eta ofingo yasho mondjoko yohamba yaBabilon, ndele tashi mu longele, ohandi shi efele medu lasho, Omwene ta ti. Eshi otashi itavelwa okukala mo noku li longa.” ’ ”
12 Nohamba yaJuda Sedekia onde mu lombwela eendjovo odo tuu odo, ndele nda tya: “Ngeenge tamu eta eefingo deni mondjoko yohamba yaBabilon, notamu mu longele, oye mwene noshiwana shaye, otamu kala mu nomwenyo. 13 Omolwashike ngeno nye mwa hala okufya, ove novanhu voye, keongamukonda nokondjala nokoudu wolutapo, ngaashi Omwene a lombwela ovanhu venya inava hala okulongela ohamba yaBabilon? 14 Inamu pwilikina eendjovo dovaxunganeki ava tave mu lombwele tava ti ngaha: ‘Kamu na apa tamu ka longela ohamba yaBabilon,’ osheshi otave mu xunganekele oipupulu. 15 Osheshi ame inandi va tuma, Omwene osho ta ti, ndelenee otava xunganeke oipupulu medina lange, opo ndi mu te po, ndele nye otamu xulu po pamwe novaxunganeki ava tave mu xunganekele.”
16 Novapristeli novanhu ovo aveshe onde va lombwela nda tya: Omwene ota ti ngaha: “Inamu pwilikina eendjovo dovaxunganeki veni, ava tave mu xunganekele, ndele tava ti: ‘Tala, oitoo yotembeli yOmwene otai alulwa paife tai di kuBabilon,’ osheshi otave mu lombwele oipupulu. 17 Inamu va pwilikina. Longeleni ohamba yaBabilon, opo nee tamu kala mu nomwenyo. Omolwashike oshilando eshi shi nokuninga onduba yomakulukuma? 18 Ndelenee ovo ngeenge ovaxunganeki nongeenge ve neendjovo dOmwene, nava ilikane Omwene womatanga ovakwaita, oiyuma ei ya fyaala motembeli yOmwene nomouhamba wohamba yaJuda nomuJerusalem, nayo yo iha twalwe kuBabilon. 19 Osheshi osho Omwene womatanga ovakwaita ta ti mokupopya eengudi nefuta loshikushu noiyaxa aishe ei ya fyaala moshilando eshi, 20 oyo tuu ei Nebukadnesar, ohamba yaBabilon, ine i kufa mo muJerusalem, eshi a twala moupika Jekonia yaJehoiakim, ohamba yaJuda kuBabilon, pamwe novakulunhu aveshe vomuJuda novomuJerusalem, 21 osheshi Omwene womatanga ovakwaita, Kalunga kaIsrael ota ti ngaha: Mokupopya oiyuma ei ya fyaala motembeli yOmwene nomouhamba waJuda nomuJerusalem, 22 oi nokutwalwa kuBabilon noi nokukala ko fiyo okefiku olo handi i dimbulukwa, Omwene osho ta ti, ndele Ame ohandi i kufa ko nohandi i alulile ponhele ei.”
© Oshikwanyama Bible Revised © Bible Society of Namibia, 2008, 2012.
