David ta i Saul onhapo
1 Ndele David e uya kuNob komupristeli Ahimelek. Ndele Ahimelek okwa ya ta kakama okushakeneka David ndee te mu pula: “Omolwashike to ende ngaho, oove auke, uhe na nande omunhu?” 2 Ndele David ta ti komupristeli Ahimelek: “Ohamba ya pa nge ondaka ya tya kwaame: Oshinima eshi omolwaasho nde ku tuma, shiha shiivike nande okomunhu.” Onghee hano nda lombwela ovanhu ovanyasha va kale monhele yonhumba. 3 Ndelenee paife pe nge osho u shi na, omingome nhano ile shimwe shi lili osho shi li po. 4 Nomupristeli okwa lombwela David ndee ta ti: “Pwaame kape nomingome dongaho. Ope nomingome diyapuki adike. Ovapiya ngeenge va kukuma ovakainhu.” 5 Opo nee David ta nyamukula omupristeli ndee ta ti kuye: “Oshili, ovakainhu otwe va kukuma ngaashi alushe, ngeenge hatu di po. Heeno, omalutu yo ovapiya mayapuki, nande okweenda kwa li kwongaho. Unene paife hano omingome tadi ka kala diyapuki momalutu avo!” 6 Opo nee omupristeli e mu pa omingome diyapuki osheshi inapa kala omungome umwe, omingome detaliko adike, odo da kufwa po koshipala shOmwene, opo pu tulwe omingome dipe. 7 Ndelenee mefiku tuu olo kwinya kwa kala omulumenhu umwe womovapiya vaSaul, a idililwa mo koshipala shOmwene, edina laye Doeg, Omuedom, omupashukili wovafita voimuna yaSaul. 8 Ndele David ta pula Ahimelek: “Apa kape neonga ile eongamukonda pwoove? Osheshi inandi dja ko ndi neongamukonda ile oiti yange, shaashi ondaka yohamba oya endelela.” 9 Opo nee omupristeli ta ti: Eongamukonda laGoliat, Omufilisti ou we mu dipaa mefilu laEla, opo li li, la tonyenwa moshikutu shokombada kwinya konima yoshikutu shokomapepe. Ngeenge owa hala oku li kufa po, li kufa po hano, osheshi ponho yalo kape na oiti imwe apa. Opo nee David ta ti: “Kape na limwe li dule olo, li pe nge hano.”
David ta i onhapo kohamba Akis
10 Ndele David okwa fikama mefiku tuu olo nokwa dja po onhapo Saul ndele e uya kuAkis, ohamba yaGat. 11 Ndelenee ovapiya vaAkis ve mu pula: “Ou oDavid, ohamba yoshilongo? Vo inave mu imbila mokutanha ndee tava ti:
‘Saul okwa dipaa eyovi,
ndelenee David omayovi omulongo.’ ”
12 Ndele David okwa uda eendjovo tuu odo nokwa tila unene Akis, ohamba yaGat. 13 Onghee hano ye e lidimbika a fa ta i eenghwengu momesho avo nokwe lifefifa elai momake avo nokwa nyola komipito doshivelo, nomayeye a yeyela meendjedi daye. 14 Opo nee Akis ta lombwele ovapiya vaye: “Nye omu wete ko ndishi, omulumenhu ou onakuya eenghwengu. Omolwashike mwe mu eta kwaame? 15 Ame nda pumbwa mbela oonakuya eenghwengu, nye eshi mwe mu eta kwaame ye a weelele nge? Ye a kale ngeno mouhamba wange?”
© Oshikwanyama Bible Revised © Bible Society of Namibia, 2008, 2012.
