Ehekeleko lomondjovo yaKalunga
1 Ovanelao ovava, ve nondjila ya yuka,
ndele tava ende pamhango yOmwene.
2 Ovanelao ovava tava diinine omalongo aye,
ndele tave mu kongo nomutima aushe,
3 itava nyono sha,
ndelenee tava ende mondjila yaye.
4 Ove mwene wa pangela eemhango doye,
do di diininwe shili.
5 Akutu, okukala kwange
ngeno oku pame mouyuki,
ame ndi shikule eenghedimhango doye.
6 Opo ngeno ame itandi fifwa ohoni,
eshi handi tale oipango yoye aishe.
7 Onda hala, ndi ku pandule nomutima wa yuka
omokulilonga omayukifo oye ouyuki.
8 Eenghedimhango doye
onda hala ndi di diinine,
ino efa nge nande ongaho!
9 Ondjila ilipipo i nokweendwa komumati,
a kale omukoshoki?
Ongeenge te liyandje meulikilo londjovo yoye.
10 Ohandi ku kongo nomutima aushe.
Ino efa, ndi puke mo moipango yoye.
11 Ondjovo yoye onde i tuvikila momutima wange,
ndiha nyone kwoove.
12 Omwene, tangwa,
Ove longe nge eenghedimhango doye!
13 Omilungu dange ohandi di valifa
eemhangela adishe dokanya koye.
14 Ondjila yehepaululo loye ohandi i hafele,
oyo oupuna kwaame wakeshe tuu.
15 Omalombwelo oye onda hala oku a shipaashipa
nokupashukila omalila oye.
16 Onda hokwa eenghedimhango doye,
ame inandi hala okudimbwa ondjovo yoye.
17 Ningila omupiya woye ouwa, ndi kale nomwenyo,
opo ndi shiive okudiinina ondjovo yoye.
18 Pashukifa omesho ange,
opo ndi mone oikumwifa, ei i li momhango yoye.
19 Ame ondi li ngaho epongo kombada yedu,
Ove ino holeka nge oipango yoye.
20 Omwenyo wange owa kwatwa kodjuulufi,
alushe tau djuulukwa omayukifo oye.
21 Ove owa aneka ovalitumbaleki, ava va fingwa,
ndele tava kanduka moipango yoye.
22 Pungulula pwaame elengwa nodino,
osheshi ohandi lungamene ehepaululo loye.
23 Oidale nande nai kale pamwe omutumba,
tai likundu molwange;
aame, omupiya woye,
ohandi likundu neenghedimhango doye.
24 Heeno, omahepaululo oye oo enyaku lange,
otaa pukulula nge.
25 Omwenyo wange owa wila mondwi yedu,
kaleke nge nomwenyo pandjovo yoye.
26 Onde ku hololela okweenda kwange, nhumbi ndi li,
Ove oho udu nge; longe nge eenghedimhango doye.
27 Konekife nge ondjila,
ei nda udikilwa komalombwelo oye;
opo ndi dilakane oikumwifalonga yoye;
28 omwenyo wange otau hanauka koisho.
Petule nge po pandjovo yoye.
29 Ondjila yoipupulu i tula kokule naame,
u punikile nge omhango yoye.
30 Onde lihoololela ondjila, nomayukifo oye
onde a tula koshipala shange.
31 Ame onda dama komahepaululo oye.
Omwene, ino efa, ndi limbililwe.
32 Onda hala ndi lotoke mondjila yoipango yoye,
osheshi Ove to mbwalangadjifa omutima wange.
33 Omwene, longe nge ondjila yeenghedimhango doye,
ame ndi di diinine fiyo hauxuuninwa.
34 Nongopalife nge, ndi shiive okuwanifa omhango yoye,
ame ndi i lalakanene nomutima aushe.
35 Endife nge melila loipango yoye,
osheshi onda hokwa mo.
36 Omutima wange u ehenifa komahepaululo oye,
oo uha ehene kolwisho lemona loulunde.
37 Omesho ange a alula ko, aha tale koinima yongaho,
nyatipalife nge meendjila doye.
38 Wanifila omupiya woye eudaneko loye,
eli la pewa ava have ku tila.
39 Pungulula po elengaifo, eli tali tilifa nge,
osheshi omayukifo oye oo omawa.
40 Oshili, onda djuulukwa omalombwelo oye,
tule nge omwenyo kouyuki woye.
41 Omwene, hololele nge ouwanghenda woye,
nexupifo loye paudaneko loye,
42 opo ndi shiive okunyamukula ou, ta yeele nge,
osheshi ohandi lineekele ondjovo yoye.
43 Mokanya kange ondjovo ino i mana mo nande,
osheshi ohandi tula elineekelo lange keemhangela doye.
44 Nonda hala okushakenifa
omhango yoye nediinino alushelushe.
45 Osho otai ka endifa nge mokaalanga,
osheshi onda konga omalombwelo oye.
46 Ndele nda hala okuvilikilila eehamba
omahepaululo oye, itandi fi ohoni;
47 osheshi oipango yoye onde i hafela, nde i hokwa,
48 ndele handi yelula omake ange
koipango yoye, nde i hokwa,
ame ndi shipaashipe eenghedimhango doye.
49 Dimbulukila omupiya woye ondjovo yoye,
ei wa udanekela nge.
50 Eshi osho ehekeleko lange moudjuu wange,
kutya eudaneko loye la tula nge omwenyo.
51 Ovalundakani otava sheke nge oixuna yongaho;
ndele ame momhango yoye
inandi tumhakana mo nande.
52 Ngeenge handi shipulula omatokolo oye
aa onalenale, Omwene,
opo ndi udite ehekeleko.
53 Onda kwatwa kehandu la hanya molwovadinikalunga,
ava va tukuka komhango yoye.
54 Eenghedimhango doye
odo omaimbilo ehambelelo lange,
fimbo ndi li monduda youpongo wange.
55 Oufiku ondi li po handi dilonga edina loye, Omwene,
nokukwatelela momhango yoye.
56 Osho osha ninga oshitukulwa shange,
eshi handi shikula omalombwelo oye.
57 Omwene Oye oshitukulwa shange;
ame ohandi diinine eendjovo doye.
58 Ohandi ku ilikana nomutima aushe;
file nge onghenda paudaneko loye.
59 Ohandi shipununa eendjila dange,
nohandi yukifa eenghatu dange komalongo oye.
60 Ohandi uluma ndele itandi kanghama,
ndi wanife oipango yoye.
61 Omalulo ovakolokoshi taa dingilile nge;
nande ndi li ngaha,
itandi dimbwa nande omhango yoye.
62 Keenhundumene doufiku ohandi penduka,
ndi ku pandulile eemhangela doye diyuki.
63 Aame omukwao waava, tave ku tila,
nowaava, tava shikula omalombwelo oye.
64 Omwene, edu oli yadi ndoo ouwanghenda woye.
Longe nge eenghedimhango doye.
65 Omupiya woye owe mu ningila ouwa,
Omwene, pandjovo yoye.
66 Longe nge omayele neendunge,
osheshi ohandi lineekele oipango yoye.
67 Fimbo nda li inandi ninipikwa, onda puka;
ndele paife ohandi diinine ondaka yoye.
68 Oove u muwa, ndele ho longo ouwa;
longe nge eenghedimhango doye.
69 Ovalinenepeki ova totela nge oipupulu;
ndelenee ame ohandi pashukile
omalombwelo oye nomutima aushe.
70 Omitima davo da fimha, da fa da dimwa komaadi;
ndelenee ame ohandi hafele omhango yoye.
71 Onawa nee, eshi nda ninipikwa,
opo ndi lilonge eenghedimhango doye.
72 Omhango yokanya koye oya wapalela nge,
i dule oitetela yoingoldo noisiliveli omayovi nomayovi.
73 Omake oye okwa shita nge, a wapeka nge.
Longe nge omayele, ndi lilonge oipango yoye.
74 Ava have ku tila tava ka mona nge nokuhafa;
osheshi elineekelo lange onde li tula mondjovo yoye.
75 Ondi shi shii, Omwene,
nokutya omatokolo oye okwa yuka,
naashi wa ninipika nge, omolwoudiinini woye.
76 Kwafa, onghenda yoye i hekeleke nge,
ngaashi we shi udanekela omupiya woye.
77 Efa ndi wilwe kefilonghenda loye,
opo ndi kale nomwenyo,
osheshi omhango yoye oyo enyaku lange.
78 Yandja ovalinenepeki, va fifwe ohoni,
osheshi otava fininikile nge poshi oshimha;
ndele ame ohandi diladila omalombwelo oye.
79 Ava have ku tila, nave liameke kwaame,
vo va koneke omahepaululo oye.
80 Diininifa omutima wange keenghedimhango doye,
ame ndiha xutuke.
81 Omutima wange otau notelwa exupifo loye;
ohandi tula elineekelo lange mondjovo yoye.
82 Omesho ange otaa dakamene
omaudaneko oye ndele taa ti:
“Onaini to ya okuhekeleka nge?”
83 Osheshi nande nda ninga nda fa ekutu la fya omwifi,
eenghedimhango doye inandi di dimbwa.
84 Omafiku omupiya woye angapi e li po natango?
Onaini hano to tokola ovataataai vange?
85 Ovatuwalali ova fela nge omakelo,
ovava ihava yukifwa komhango yoye.
86 Oipango yoye aishe oyo oshili;
otava shindifa nge oipupulu yavo,
onghee kwafe nge!
87 Okwa li hanga va dipae nge moshilongo,
ndelenee itandi efa omalombwelo oye.
88 Molwouwanghenda woye amenene nge omwenyo,
ame opo ndi shikule elongo lokanya koye.
89 Fiyo alushe, Omwene,
ondjovo yoye tai kala ya pama meulu.
90 Komapupi nomapupi otaku kala oudiinini woye;
Ove wa dika edu, ndele olo li li po la dikika.
91 Ngaashi we shi pangela momhangela yoye,
osho shi li po natango,
osheshi oinima aishe otai ku longele.
92 Omhango yoye ngeno kaya li ehafo lange,
ngeno nda xula po molufifihepo lange.
93 Fiyo alushe inandi hala nande
okudimbwa omalombwelo oye;
osheshi owa tula nge nao omwenyo.
94 Aame owoye, xupife nge,
osheshi ohandi kongo omalombwelo oye.
95 Ovadinikalunga ohava nangele nge, va dipae nge,
ndelenee ame ohandi pupapupa komaudaneko oye.
96 Oinima aishe nande oya wapalelela,
onda mona exulepo layo,
ndele omhango yoye oya mbwalangadja.
97 Omhango yoye ondi i hole shi fike peni!
Efiku alishe ohandi i dilonga.
98 Oipango yoye otai nongopaleke nge,
ndi dule ovatondi vange ounongo,
osheshi oyo oyange fiyo alushe.
99 Ovalongi vange aveshe ondi va dule eendunge,
osheshi omahepaululo oye oo omadiladilo ange.
100 Ondi dule ovaxungu omayele,
osheshi ohandi diinine omalombwelo oye.
101 Eemhadi dange ohandi di kelele,
ndiha lyate nande melila loulunde,
ame ndi shikule ondjovo yoye.
102 Momayukifo oye itandi pumu mo,
osheshi Ove mwene wa longa nge.
103 Omaudaneko oye omanyenye
moshihokohoko shokanya kange shi fike peni,
omanyenye e dule omaadi eenyiki.
104 Momalombwelo oye otamu di eendunge dange,
onghee handi tondo keshe tuu omufango woipupulu.
105 Ondjovo yoye oyo olamba yeemhadi dange,
nouyelele mondjila yange.Ondjovo yoye oyo olamba yeemhadi dange.
106 Onda ana, ndele ohandi limangele mo,
nokutya momayukifo oye mayuki ohandi anyene mo.
107 Ondi li po nda findilwa poshi unene;
Omwene, tule nge omwenyo pandjovo yoye.
108 Omayambo ehe nafindilo omokanya kange,
nae ku wapalele, Omwene,
Ove u longe nge eemhangela doye.
109 Omwenyo wange alushe wa tenanana meke lange,
ndele itashi dimbwifa nge omhango yoye.
110 Ovadinikalunga ova tela nge omalulo,
ndele ame inandi puka nande momalombwelo oye.
111 Omalongo oye oo efyuululo lange fiyo alushe,
osheshi oo oshihafifo shomutima wange.
112 Omutima wange ohandi u ikifa,
okuhala okuwanifa eenghedimhango doye
alushe fiyo okoxuuninwa.
113 Ava vomitima mbali ohandi va tondo,
ndele omhango yoye ondi i hole.
114 Oove eameno lange noshikelelifo shange,
mondjovo yoye ohandi tula elineekelo lange.
115 Ovaningi vowii nye, djeni po pwaame.
Ame onda hala okudiinina
oipango yaKalunga kange.
116 Yakele nge paudaneko loye,
ndi kale ndi nomwenyo,
efa, ndi kale nelineekelo lange,
ndiha fifwe ohoni.
117 Pameke nge, ndi hange kexupifo,
ame ndi dakamene alushe
eenghedimhango doye.
118 Ove to ekeleshi aveshe, ava tava tekuka
meenghedimhango doye,
osheshi eliweweleko lavo olongaho.
119 Ovakolokoshi aveshe kombada yedu
oto va kandwileshi ngaashi omaxu oivela;
onghee ame ondi hole omalongo oye.
120 Olutu lange otali kakama molwoutile,
ndele handi tila molwomatokolo oye.
121 Ame onda longa oshili nouyuki,
ino yandja nge momake ovafininiki vange.
122 Popila omupiya woye u mu xupife,
ovalinenepeki ino efa, va fininike nge.
123 Omesho ange otaa dakamene exupifo loye
neudaneko loye la yuka.
124 Ningila omupiya woye pauwanghenda woye,
Ove longe nge eenghedimhango doye.
125 Aame omupiya woye, pe nge omayele,
ndi koneke ehepaululo loye.
126 Efimbo ola fika, Omwene a tokole,
ove li po va hanauna po omhango.
127 Onghee oipango yoye ondi i hole
komesho yoingoldo noingoldoelela.
128 Osho ame ondi wete
omalombwelo oye aeshe okwa yuka,
nomufango keshe woipupulu ohandi u tondo.
129 Ehepaululo loye, olo likumwifa,
onghee omwenyo wange otau anyene mulo.
130 Eyeuluko leendjovo doye ohali minikile,
ndele tali pe eendunge ava tave lininipike.
131 Ohandi akama unene okanya kange,
ndele handi hefaana,
osheshi onda notelwa oipango yoye.
132 Liameka kwaame u file nge onghenda,
ngaashi sha fewela ava, ve hole edina loye.
133 Pameka omanha ange mondjovo yoye,
ndele ino itavela ndi pangelwe kowii washa.
134 Xupife nge kefininiko lovanhu,
opo ame ndi shikule omalombwelo oye.
135 Minikilifa oshipala shoye kombada yomupiya woye,
Ove longe nge eenghedimhango doye.
136 Omahodi otaa kunguluka momesho ange,
shaashi omhango yoye ihave i yavala.
137 Omwene Oove omuyuki,
nomatokolo oye okwa yuka.
138 Ove owa pangela omahepaululo oye
nouyuki noshili inene; itaa lunduluka.
139 Ouladi wange ohau nameke nge,
shaashi ovatondi vange
otava dimbwa eendjovo doye.
140 Ondjovo yoye oya yela,
nomupiya woye e i hole.
141 Aame ondi munini nda dinika,
ndelenee omalombwelo oye itandi a dimbwa.
142 Ouyuki woye owo ouyuki waalushe,
nomhango yoye oyo oshili.
143 Ngeenge nda hangika koudjuu noluhepo,
opo oipango yoye otai hafifa nge.
144 Omahepaululo oye oo ouyuki fiyo alushe.
Pe nge omayele, opo ndi kale nomwenyo.
145 Ohandi ku ingida nomutima aushe:
Ude nge, Omwene,
eenghedimhango doye onda hala oku di diinina.
146 Ohandi ingida kwoove; xupife nge,
opo ame ndi diinine omahepaululo oye.
147 Ohandi penduka fimbo inaku sha,
ndele handi kuu onghuwo.
Ohandi teelele ondaka yoye.
148 Oufiku aushe ohandi nangala oupafi,
ndi shipaashipe ondjovo yoye.
149 Uda ondaka yange pauwanghenda woye.
Omwene, tululule nge omwenyo pauyuki woye.
150 Ovanangeli otava ehene popepi,
ove li kokule nomhango yoye.
151 Ndelenee Omwene, Ove u li popepi,
noipango yoye aishe oyoshili.
152 Omahepaululo oye wa shiivifa nge nale,
nokutya owe a tula po, a kalelele po alushe.
153 Tala oluhepo lange, Ove xupife nge.
Osheshi omhango yoye inandi i dimbwa.
154 Yukifile nge, u kulile nge.
Pe nge omwenyo mupe paudaneko loye.
155 Ovadinikalunga, ekwafo ohali va kala kokule,
osheshi vo kave na ko na sha neenghedimhango doye.
156 Omwene, efilonghenda loye olinene.
Kwafa, ndi kale meemhangela doye.
157 Omuvalo wovataataai vange
nowovatondi vange, omuhapu.
Ndele ame ihandi tekuka momahepaululo oye.
158 Ngeenge handi mono ovanhu ve neteke,
otava nyonyodolifa nge,
shaashi ihava yavala omhango yoye.
159 Tala oku, Omwene, ondi hole omalombwelo oye.
Molwouwanghenda woye pe nge omwenyo mupe.
160 Etindi londjovo yoye olo oshili,
nakeshe tuu onghedimhango yoye youyuki
otai kalelele po fiyo alushe.
161 Oidale oya telatela nge oshimha,
ndelenee ondjovo yoye oyo aike
tai kakamifa omutima wange.
162 Ohandi hafele eudaneko loye,
ngaashi umwe, ou a xuula eexuulwa dihapu.
163 Oipupulu ohandi i tondo, tai nyonyodolifa nge,
ndelenee omhango yoye ondi i hole.
164 Keshe efiku ohandi ku tange omapa aheyali
molweemhangela doye da yuka.
165 Ava ve hole omhango yoye, ove na ombili inene,
osheshi kave na eshi tashi va tengula.
166 Omwene, ohandi teelele exupifo loye,
osheshi oipango yoye onde i diinina.
167 Omwenyo wange otau diinine omahepaululo oye,
ndele ondi a hole, nghi nakonda.
168 Omalombwelo oye nomahepaululo oye
ohandi a wanifa,
osheshi eendjila dange adishe odi li koshipala shoye.
169 Ekwenauko lange nali fike koshipala shoye, Omwene.
Molweendjovo doye longe nge omayele.
170 Eindilo lange nali uye kwoove.
Xupife nge paudaneko loye.
171 Momilungu dange namu xunguke omahambelelo,
Ove ngeenge to longo nge eenghedimhango doye.
172 Elaka lange nali imbe ondjovo yoye,
osheshi oipango yoye aishe oiyuki.
173 Longekida eke loye, li kwafe nge,
osheshi ame onda hoolola po omalombwelo oye.
174 Onda djuulukwa exupifo loye, Omwene,
nomhango yoye oyo ehafo lange.
175 Pa omwenyo wange, u kale nomwenyo,
opo ndi ku tange,
nomatokolo oye naa kwafe nge.
176 Ame onda puka, ngaashi odi ei ya kana,
opo nee Ove konga omupiya woye, ame,
osheshi oipango yoye itandi i dimbwa.
© Oshikwanyama Bible Revised © Bible Society of Namibia, 2008, 2012.
