Jeremia ta pangulilwa okufya
1 Pehovelo lepangelo laJehoiakim yaJosia, ohamba yaJuda, ondjovo ei oya dja kOmwene: 2 “Omwene ota ti ngaha: Inda u ka kale ofika moluumbo lotembeli yOmwene, ove u popye nokupa oilando aishe yomuJuda oushima; ovo tave uya motembeli yOmwene okulinyongamena, va lombwela eendjovo adishe nde di ku lombwela u di tonge kuvo. Ino efa po nande ondjovo imwe. 3 Kashiimba tava ka pwilikina ndele tave lialuluka, keshe umwe, kondjila yaye ii, opo Ame ohandi lialuluka kowii ou nde u va diladilila molwowii woilonga yavo. 4 Ndele va lombwela: ‘Omwene ota ti ngaha: Ngeenge itamu pwilikine nge nokweenda pamhango yange ei nde i mu pa, 5 nongeenge itamu pwilikine eendjovo dovapiya vange ovaxunganeki, ngaashi inandi fya ounye oku va tuma kunye, ndele nye inamu pwilikina, 6 opo nee handi ka ninga otembeli ei ngaashi nda ninga Silo noshilando eshi ohandi shi ningi ondjovo yefingo koiwana aishe yokombada yedu.’ ”
7 Ndele ovapristeli novaxunganeki novanhu aveshe va uda eendjovo edi Jeremia e di popya motembeli yOmwene. 8 Ndele Jeremia eshi a xulifa okupopya adishe odo e di lombwelwa kOmwene e di lombwele ovanhu aveshe, ovapristeli novaxunganeki novanhu aveshe ove mu kwata nova popya mokule: “Ove ou nokufya shili. 9 Omolwashike we tu xunganekela medina lOmwene, ndele to ti: ‘Otembeli ei oi nokuningwa ngaashi Silo, noshilando eshi oshi nokuninga omakulukuma kashi novanhu’?” Novanhu aveshe va ongalela Jeremia motembeli yOmwene. 10 Ovakulunhu vomuJuda eshi va uda eendjovo edi, ova dja mo moshilongo ndele tave uya kotembeli yOmwene, ndele vo ova kala omutumba poshivelo shipe shOmwene. 11 Opo nee ovapristeli novaxunganeki ova lombwela ovakulunhu novanhu aveshe, ndele tava ti ngaha: “Omulumenhu ou okwa tula etimba lokudipawa, osheshi oye ota xunganekele nokutwa ondubo oshilando eshi, ngaashi nye vene mwe shi uda nomatwi eni.” 12 Ndelenee Jeremia okwa lombwela ovakulunhu aveshe novanhu aveshe ndele ta ti ngaha: “Omwene okwa tuma nge ndi popye eendjovo odo adishe domaxunganeko da twa ondubo otembeli ei noshilando eshi, ngaashi nye mwe di uda. 13 Hano paife wapekeni eendjila deni noilonga yeni, nye mu pwilikine ondaka yOmwene Kalunga keni, opo nee Omwene ote lialuluka kowii ou e u popya tau mu hange. 14 Ndelenee taleni aame, ngaashi ndi li, ondi li momake eni, ningei nge eshi sha wapala nosha yuka kunye.”
15 Ndelenee shimwe ashike mu kale mu shi shii, ngeenge tamu dipaa nge, otamu litwike ohonde ihe netimba, noshilando eshi noonakukalamo otamu va kwatifa ohonde oyo, osheshi Omwene okwa tuma nge shili kunye, ndi mu udifile eendjovo edi adishe momatwi eni.
16 Opo nee ovakulunhu novanhu aveshe ova lombwela ovapristeli novaxunganeki ndele tava ti: Omulumenhu ou ke netimba lokufya. Osheshi ye okwe tu lombwela medina lOmwene Kalunga ketu. 17 Novakulunhu vamwe vomoshilongo ova kala ofika tava lombwele ongudu aishe yovanhu tava ti: 18 Pomafiku aHiskia, ohamba yaJuda, opa holoka Mika Omumoreset, a xunganeka nokwa lombwela oshiwana ashishe shaJuda, ndele ta ti ngaha: Omwene womatanga ovakwaita ota ti ngaha:
“Sion otai limwa epya,
Jerusalem otashi ningi oshala shoimbodi
nomhunda yotembeli otai shituka oshikulundudu shi noixwa.”
19 Hiskia, ohamba yaJuda, nOvajuda aveshe ove mu dipaa vati? Vo inava tila Omwene nove mu handukulukifa, opo Omwene okwe lialuluka komupya winya a li e u va handukilila, manga fye tu li po twa hala tu litwike keemwenyo detu omupya u fike apa.
20 Ndelenee okwa li yo omulumenhu umwe Uria yaShemaia, Omukiriat-Jearim. Ye okwa xunganeka medina lOmwene ta popi okuhandukilwa kwoshilando eshi nedu eli ngaashi Jeremia. 21 Ohamba Jehoiakim novaladi vaye aveshe nomalenga aye aeshe omakulunhu, eshi va uda eendjovo odo, ohamba oya li tai mu kongo ya hala oku mu dipaa. Uria eshi e shi uda okwa tila, ndele ta i kuEgipiti. 22 Ndelenee ohamba Jehoiakim oya tuma ovalumenhu kuEgipiti: Elnatan yaAkbor novalumenhu pamwe naye kuEgipiti. 23 Ndele ova eta Uria muEgipiti ndele ve mu twala kohamba Jehoiakim, nohamba oye mu dipaifa neongamukonda, noshimhu shaye osha kupulwa moshilambo shovanhu vongaho, omo hamu pakwa ovafyoona. 24 Ndelenee eke laAhikam yaSafan ola amena Jeremia, opo ye ina yandjwa komake ovanhu a dipawe.
© Oshikwanyama Bible Revised © Bible Society of Namibia, 2008, 2012.
