Oita yaKedorlaomer
1 Ndele mefimbo laAmrafel, ohamba yaSinear, naAriok, ohamba yaEllasar, naKedorlaomer, ohamba yaElam, naTideal, ohamba yaGoim, 2 va hovela okuhomona Bera, ohamba yaSodom, naBirsha, ohamba yaGomorra, naSineab, ohamba yaAdma, naSemeber, ohamba yaSeboim nohamba yomuBela nokutya, Soar. 3 Vo aveshe ova ongela omatanga avo ovakwaita molufilu laSiddim nokutya Efuta lOmongwa. 4 Ova li va longela Kedorlaomer omido omulongo nambali, ndele momudo omutimulongo nomutitatu ove mu liteeka. 5 Opo nee Kedorlaomer okwe uya momudo omutimulongo nomutine, neehamba edi da kala pamwe naye, ndele vo ova denga Ovarefai muAsterot-Karnaim nOvasusi muHam nOvaemim mehenene laKiriataim 6 nOvahori keemhunda davo Seir fiyo okuEl-Paran shi li pomunghulo wofuka. 7 Opo nee vo va aluka tave uya kuEn-Mispat nokutya, Kades, ndele tava teya oshilongo ashishe shOvaamaleki nosho yo shOvaamori ava va li muHaseson-Tamar. 8 Opo nee ohamba yaSodom nohamba yaGomorra nohamba yaAdma nohamba yaSeboim nohamba yaBela nokutya, Soar, da fikama, ndele tadi va lwifa molufilu laSiddim, 9 va lwife Kedorlaomer, ohamba yaElam, naTideal, ohamba yaGoim, naAmrafel, ohamba yaSinear, naAriok, ohamba yaEllasar: eehamba nhee di lwife eehamba nhano. 10 Ndelenee olufilu laSiddim ola li li yadi omalambo eka ledu. Eehamba daSodom naGomorra, eshi da ya onhapo, oda wila muo, noshixupe osha ya onhapo keemhunda. 11 Ndele vo ova kufa emona alishe lomuSodom naGomorra neendja davo adishe, ndele tava di po. 12 Vo ova kwata yo Lot, omona wamumwaina waAbram, nemona laye alishe, shaashi ye okwa li a tula muSodom, ndele tava i naye.
Abram ta xupifa Lot
13 Ndele omunhu umwe a dja onhapo polwoodi, okwe uya oku shi hepaululila Abram, Omuheberi, a tula moshuundungila shomuMamre. Omunhu ou okwa li Omuamori, mumwaina waEskol naAner. Vo ova li va kwatafana naAbram. 14 Abram eshi a uda kutya omona wamumwaina a kwatwa, okwa dilila ovalumenhu omafele atatu nomulongo nahetatu, ava va dalelwa meumbo laye, ndele ta i navo ndele tave va shikula fiyo okuDan. 15 Oufiku ove va totela, ve va dilila keembinga di lili, ndele ye novapiya vaye, ve va taataa ndee ve va shikula fiyo okuHoba, shi li koumbangalanhu waDamaskus. 16 Ndele ye okwa alula emona alishe, nomona wamumwaina Lot nemona laye, nosho yo ovalikadi novana. 17 Mokwaaluka kwaye eshi a taataa Kedorlaomer neehamba edi da li pamwe naye, ohamba yaSodom oya li ye ke mu shakeneka kolufilu laShave nokutya, Olufilu lEehamba.
Abram ta nangekwa noupuna kuMelkisedek
18 Ndele Melkisedek, ohamba yaSalem, omupristeli waKalunga wOkombadambada okwa eta omungome nomaviinyu, 19 ndele ye okwe mu nangeka noupuna ndele ta ti: “Abram omunangekwa noupuna waKalunga wOkombadambada, Omushiti weulu nedu, 20 ndele Kalunga wOkombadambada na hambelelwe, ou a yandja ovatondadi voye momake oye.” Ndele Abram okwe mu pa oshitimulongo shomwaaishe.
21 Ndele ohamba yaSodom oya lombwela Abram tai ti: “Pe nge ovanhu, ndele kufa po oinima i ninge yoye.” 22 Opo nee Abram okwa nyamukula ohamba yaSodom ta ti: “Ame ohandi ane kOmwene Kalunga wOkombadambada, Omushiti weulu nedu. 23 Oshili itandi kufa nande okangodi ile omwiya wonghaku, heeno, itandi kufa sha mwaaishe ei yoye, opo uha ka tye kutya: ‘nda ninga Abram oshipuna.’ 24 Ame inandi hala sha nande! Ashike eshi sha liwa kovapiya nokombinga yovanhu ava va enda pamwe naame nokutya, Aner, Eskol naMamre, vo nava pewe oshitukulwa shavo.”
© Oshikwanyama Bible Revised © Bible Society of Namibia, 2008, 2012.
