Ovalikadi vaSalomo neliteeko laye
1 Nohamba Salomo ya li i hole ovakainhu vahapu ovanailongo ponho yomona okakadona kaFarao, ovakainhu Ovamoab, Ovaammoni, Ovaedom, Ovasidoni nOvaheti, 2 ovakainhu vomoiwana oyo Omwene e i popya nokulombwela ovana vaIsrael: Nye inamu kwatafana navo, vo vaha kwatafane nanye, osheshi ovo tava ka hongaula omitima deni okushikula oikalunga imwe. Salomo okwa kanyatela kuvo nohole. 3 Ndele ye okwa li e novalikadi omafele aheyali veehamba novakainhu vopomunghulo omafele atatu, onghee ovalikadi vaye va hongaula omutima waye. 4 Ndele Salomo eshi a kulupa, ovalikadi vaye va hongaula omutima waye okushikula oikalunga imwe, onghee omutima waye aushe inau kala nOmwene Kalunga kaye ngaashi omutima waxe David. 5 Osho ngaha hano Salomo a shikula Astarte, kalungakadona kOvasidoni naMilkom, oixuna yOvaammoni. 6 Osho ngaha hano Salomo a ninga osho inashi wapala momesho Omwene, ndele ina diinina okushikula Omwene ngaashi xe David. 7 Salomo okwa tungila Kemosh, oixuna yOvamoab, oaltarikulundu komhunda i li koushilo wokuJerusalem, nosho yo e shi tungila Molek, oixuna yOvaammoni. 8 Osho ngaha a ninga nokuwapalela ovalikadi vaye aveshe ovanailongo, ava va twiminina ndele va yambela oikalunga yavo. 9 Onghee hano Omwene okwa handukila Salomo, shaashi omutima waye we liteeka Omwene Kalunga kaIsrael, ou e mu lihololela luvali, 10 nokwe mu lombwela moshinima eshi nokutya, aha shikule oikalunga imwe. Ndelenee ye ina diinina elombwelo olo lOmwene. 11 Onghee hano Omwene a lombwela Salomo, ta ti: “Ove eshi wa ninga ngaha, ndele ino diinina ehangano lange neenghedimhango dange, odo nde di ku lombwela, oshili, Ame ohandi ke ku kufa ouhamba noku u yandja komupiya woye. 12 Ndelenee momafiku oye Ame itandi shi ningi omolwaxo David. Meke lomumwoye Ame ohandi ke u kufa mo. 13 Ndelenee ihandi ka kufa ouhamba aushe. Epata limwe Ame ohandi ke li pa omumwoye omolwomupiya wange David nomolwaJerusalem, nde shi lihoololela.”
Ovatondadi vaSalomo
14 NOmwene okwa pendulila Salomo Hadad, Omuedom, a ninga omutondadi waye. Ye okwa li womepata lohamba yomuEdom. 15 David eshi a li a homona Edom, naJoab, ondjai ya ya, ya ka pake ovadipawa, yo oya dipaa ovalumenhu aveshe muEdom 16 (osheshi Joab a kala ko eehani hamano pamwe nOvaisraeli aveshe fiyo ovalumenhu aveshe vomuEdom va manwa po kuye). 17 Ndelenee Hadad okwa ya onhapo ndele pamwe naye ovalumenhu Ovaedom vomovapiya vaxe, va ye kuEgipiti. Ndele Hadad okwa li omunyasha. 18 Ndele va dja kuMidian, ve uya kuParan, ndele muParan va kufa ovalumenhu pamwe naavo, ndele ve uya kuEgipiti kuFarao, ohamba yaEgipiti. Oyo ye mu pa ongulu ndele ye mu pa eendja nepya. 19 Ndele Hadad okwa hokiwa unene momesho aFarao, onghee hano ou e mu pa okakadona, omumwaina womwalikadi waye, nokutya omumwaina wombada yaye Tagpenes. 20 Nomumwaina waTagpenes okwe mu dalela omona omumati Genubat, ndelenee Tagpenes okwe mu tovifa mongulu yaFarao, onghee hano Genubat okwa kala meumbo laFarao movana vaFarao. 21 Ndelenee Hadad eshi a uda muEgipiti nokutya, David okwe linangeka pooxe, nondjai yaye Joab okwa fya, Hadad okwa lombwela Farao: “Lekele nge ndi ye koshilongo shange.” 22 Opo nee Farao ta ti kuye: “Ndelenee owa hepa shike ngeno pwaame, eshi wa hala divadiva okuya moshilongo shoye?” Ndele ye okwa nyamukula: “Nande sha, ndelenee itavele nge ndi ye ko.”
23 Kalunga okwe mu pendulila yo Reson yaEljada a ninga omutondadi, okwa henuka omwene waye Hadadeser, ohamba yaSoba. 24 Mefimbo linya David okwa li e va dipaa, okwa ongela puye ovalumenhu nokwa li omukulunhu wongudu. Ndele vo va ya kuDamaskus ndele va kala mo ndele tava pangele muDamaskus. 25 Ndele ye okwa li omutondadi waIsrael omafiku aeshe aSalomo nokwe shi ningila owii ngaashi Hadad yo okwa li ta ningi, osheshi okwa li e udite enyonyodolo omolwaIsrael. Nokwa ninga ohamba yOvaaram.
Jerobeam ta xunganekelwa ouhamba kuAhia
26 Nosho Jerobeam yaNebat, Omuefraim womuSereda, edina laina la li Serua, omufiyekadi, omupiya waSalomo, okwa yelulila yo ohamba eke laye. 27 Ye okwa yelulila ohamba eke laye omolwoshinima eshi: Salomo okwa tunga Millo nokwa fitika po ngaha omhito yomoshilando shaxe David. 28 Nomulumenhu Jerobeam okwa li omuladi. Salomo eshi a mona nokutya, omulumenhu omunyasha kwa li omulongi omudiinini, okwe mu ninga omukulunhu wovalongi ovafininikwa vomeumbo laJosef. 29 Mefimbo linya, fimbo Jerobeam a pita mo muJerusalem, omuxunganeki Ahia, Omusilo, okwe mu shakeneka mondjila. Ndele ye okwa li a djala ombaikifa ipe yokombada Ndele vo aveke vavali va li poluhaela. 30 Opo nee Ahia a kwata ombaikifa oyo ipe nokwe i pombaula oitukulwa omulongo naivali, 31 nokwa lombwela Jerobeam: “Tambula oitukulwa omulongo, osheshi Omwene Kalunga kaIsrael ta ti ngaha: ‘Tala Ame ohandi kufa mo oshilongo meke laSalomo ndele handi ku pe omapata omulongo. 32 Ndelenee epata limwe tali ningi laye omolwomupiya wange David nomolwaJerusalem, oshilando, Ame nde shi hoolola mo momapata aeshe aIsrael, 33 osheshi ova efa nge, ndele ve linyongamena koshipala shaAstarte, kalungakadona kOvasidoni nomoipafi yaKemosh, oshikalunga shOvamoab nomoipafi yaMilkom, oshikalunga shovana vaAmmoni, ndelenee inava enda neendjila dange ndele inava wanifa eenghedimhango dange nomalombwelo ange ngaashi David, xe yaSalomo. 34 Ndelenee oshilongo ashishe itandi shi kufa mo meke laye, ndelenee handi mu tula a kale ohamba momafiku aeshe omokukala kwaye omolwomupiya wange David, ou a diinina oipango yange neenghedimhango dange. 35 Ndelenee ouhamba handi u kufa mo meke lomona waye, ndele handi u ku pe, omapata tuu oo omulongo. 36 Nomona waye omulumenhu Ame ohandi ke mu pa epata limwe, opo omupiya wange David, a kale alushe e nolamba moipafi yange muJerusalem, oshilando Ame nde shi hoololela edina lange, opo li kale mo. 37 Ndele Ame ohandi ke ku kufa, ndele ove to ka kala nokupangela ashishe osho omwenyo woye wa hala, ndele to ka kala ohamba yaIsrael. 38 Ndele ngeenge to pwilikine adishe odo Ame handi ku lombwele ndele ho ende neendjila dange, ndele to ningi eshi sha yuka momesho ange mokudiinina eenghedimhango dange noipango yange ngaashi omupiya wange David a ninga, opo nee Ame ohandi ka kala naave noku ku dikila ongulu tai kalelele, ngaashi nda dikila David, ndele handi ku pe Israel. 39 Onghee nda hala okuninipika oludalo laDavid, ndelenee hafiyo alushe.’ ”
40 Ndele Salomo okwa kendabala okudipaa Jerobeam. Ndelenee Jerobeam okwa fikama nokwa ya onhapo kuEgipiti, kuSisak, ohamba yaEgipiti, ndele a kala muEgipiti fiyo okefyo laSalomo.
Efyo laSalomo
41 Ndele oinima ikwao aishe tai hepaulula Salomo, nokutya aishe oyo e i ninga, nounongo waye, oya shangelwa membo tali hepaulula Salomo. 42 Nefimbo Salomo okwa pangela muJerusalem Ovaisraeli aveshe omido omilongo nhee. 43 Opo nee Salomo okwa fya nokwa pakwa moshilando shaxe David. Nomona Rehabeam okwa ninga ohamba ponhele yaye.
© Oshikwanyama Bible Revised © Bible Society of Namibia, 2008, 2012.
