JEREMIA 43 - Oshikwanyama Bible (OKYB)

Jeremia ta twalwa kuEgipiti

1 Ndelenee Jeremia eshi a mana okulombwela ovanhu aveshe eendjovo adishe dOmwene Kalunga kavo, ngaashi Omwene Kalunga kavo e mu tuma nado kuvo, nokutya eendjovo adishe odo, 2 opo nee Asaria yaHosaja naJohanan yaKarea pamwe novalumenhu ovakukutu aveshe va lombwela Jeremia, ndele tava ti: Ove oto popi oipupulu. Omwene Kalunga ketu ine ku tuma u tye: Inamu ya kuEgipiti, mu kale ngeno ovanailongo kwinya. 3 Ndelenee Baruk yaNeria, oye ote ku twifa ondubo nafye, opo tu yandjwe momake Ovakaldea vo va shiive oku tu dipaa nokutwala eenghwate kuBabilon. 4 Osho hano Johanan yaKarea nomalenga aeshe omatanga ovakwaita pamwe novanhu aveshe inava dulika kondaka yOmwene, va kale moshilongo shaJuda. 5 Ndelenee Johanan yaKarea nomalenga aeshe omatanga ovakwaita ova kufa oshixupe shomuJuda ava va li va halakanifilwa moiwana aishe ndele va aluka va kale moshilongo shaJuda: 6 ovalumenhu novakainhu nounona novana oukadona vohamba novanhu aveshe Nebusaradan, elenga lakula lovanangeli le va fiya poGedalja yaAhikam yaSafan, nomuxunganeki Jeremia yo naBaruk yaNeria. 7 Ndele ova ya kedu laEgipiti, osheshi inava itavela ondaka yOmwene. Ndele ove uya kuTahpanhes.

8 Opo nee ondjovo yOmwene oya hanga Jeremia muTahpanhes tai ti: 9 “Ka toole omamanya manene, ove u ke a fudike monhata monhele yoposhivelo shouhamba waFarao muTahpanhes, moipafi yovalumenhu Ovajuda, 10 ove u tye kuvo: ‘Omwene womatanga ovakwaita, Kalunga kaIsrael ota ti ngaha: “Tala, Ame ohandi ka tuma ko, ndi ifane omupiya wange Nebukadnesar, ohamba yaBabilon, ndele ohandi ka yala olukalwapangelo laye louhamba komamanya aa, nde a fudika apa. Ndele oilyatwalapi yaye youhamba otai ka yalwa kombada yomamanya aa. 11 Ndele ye ote ke uya ndele ta denge edu laEgipiti. Ou a ufilwa oudu wolutapo, ota kwatwa koudu wolutapo; naau a ufilwa ounghwate, ota i mounghwate, naau a ufilwa eongamukonda, ota fi keongamukonda. 12 Ndele Ame ohandi ka tema omundilo weetembeli doikalunga yomuEgipiti. Ndele ye ote di xwike po ndele ta twala oikalunga oixuulwa. Ndele ye ota fina edu laEgipiti eena, ngaashi omufita ta fina eena moikutu yaye; ndele ta di po nombili. 13 Ndele ye ota ka ngumauna po eengudi domamanya muHeliopolis shomuEgipiti, ndele ta xwike po nomundilo eetembeli doikalunga muEgipiti.” ’ ”