Oshivilo shaPaasa tashi danwa vali muJerusalem
1 Ndele Hiskia okwa tumina Israel ashishe naJuda, ndele a shangela Efraim naManasse eenhumwafo, ve uye kongulu yOmwene muJerusalem va dane okufimaneka Omwene Kalunga kaIsrael oshivilo shaPaasa. 2 Nohamba novakulunhu vayo neongalo alishe lomuJerusalem va udafana va dane Opaasa mohani onhivali, 3 osheshi va nyengwa oku i dana mefimbo layo, shaashi ovapristeli ovo ve liyapula, inava wana, novanhu inava ongala muJerusalem. 4 Noshinima sha li sha yuka momesho ohamba nomomesho eongalo alishe. 5 Osho ngaha hano ova pangela omhangela va vilikile muIsrael ashishe okudja kuBerseba fiyo okuDan, nokutya ve nokuuya kuJerusalem, va dane Opaasa okufimaneka Omwene Kalunga kaIsrael. Osheshi inave i dana meongalo ngaashi sha pangelwa. 6 Eenhondoki da fikama hano ndele da ya muIsrael ashishe nomuJuda ndele da vilikila oshipango shohamba, tashi ti: “Nye Ovaisraeli, alukileni kOmwene Kalunga kaAbraham naIsak naIsrael, opo Ye a alukile kwaavo va xupa po munye ndele va xupifwa momake eehamba daAsiria. 7 Inamu kala ngaashi ooxo novamwanyoko, ovo va efa Omwene Kalunga kooxe, onghee va ninga oshitevo noshikumwifa ngaashi nye vene tamu shi mono. 8 Inamu kukutika eefingo deni ngaashi ooxo; yandjeni kOmwene omake ndele ileni kotembeli yaye, Ye e i yapula fiyo alushe, mu longele Omwene Kalunga keni, opo oupyuhandu waye u dje po punye. 9 Osheshi ngeenge nye tamu aluka kOmwene, ovamwanyoko novana veni tava ka filwa onghenda kwaava ve va twala ko eenghwate, vo va shiive okwaaluka moshilongo eshi. Osheshi Omwene Kalunga keni Ye e nolune nonghenda, ndele ita ka pungulula oshipala shaye kunye, nye ngeenge tamu aluka kuye.” 10 Ndelenee eenhondoki eshi da enda noilando koilando medu laEfraim nolaManasse fiyo okuSebulon, ove di yola ndele ve di sheka. 11 Ndelenee ovalumenhu vamwe vomuAsser naManasse nomuSebulon ve lininipika ndele va ya kuJerusalem. 12 MuJuda yo eke laKalunga la longa, onghee ve liyandja nomutima umwe, va wanife oshipango shohamba noshovakulunhu pandjovo yOmwene.
13 Novanhu vahapu va ongala muJerusalem va dane oshivilo shomungome uhe nonhafi, mohani onhivali, heeno, oshiongalele shinene. 14 Ndele va fikama ndele va hanauna po eealtari domuJerusalem. Nosho eealtari adishe dokutwimina ve di hanauna po ndele ve di ekela mokamulonga Kidron. 15 Mefiku etimulongo netine mohani onhivali va dipaa odi yaPaasa. Novapristeli nOvalevi va fya ohoni ndele ve liyapula ndele va eta omaxwikiloyambo mongulu yOmwene. 16 Ndele va ya va ka kale ofika meenhele davo palombwelo lomhango yaMoses, omulumenhu waKalunga, fimbo ovapristeli va tambula ohonde momake Ovalevi, ndele ve i tila. 17 Osheshi moshiongalele mwa li vahapu inave liyapula, onghee hano Ovalevi va li ve nokutoma omatomenoyambo ponhele yakeshe ou ina yapulwa, opo ve va yapulile Omwene. 18 Osheshi vahapu unene vomovanhu va dja muEfraim nomuManasse, muIsaskar nomuSebulon, inave liyapula, ndele va lya odi yaPaasa hapanghedi yayo. Ndelenee Hiskia okwe va ilikanena ndele ta ti: “Omwene muwa na kufile po 19 keshe umwe a yukifa omutima waye okukonga Kalunga, Omwene Kalunga kooxe, nande ehe neyapulo lopatembeli.” 20 NOmwene okwa uda Hiskia ndele a velula ovanhu. 21 Osho ngaha hano ovana vaIsrael ovo va li muJerusalem, ova dana oshivilo shomingome dihe nonhafi omafiku aheyali nehafo linene, fimbo Ovalevi novapristeli va hambelela Omwene efiku nefiku noishikomwa i neenghono okefimano lOmwene. 22 Ndele Hiskia okwa popifa nombili Ovalevi aveshe, ava va wanifa oilonga yavo paunongo wokufimaneka Omwene. Nomafiku aheyali va lya omayambo oshivilo ndele va yamba omapanduloyambo, ndele tava hambelele Omwene Kalunga kooxe.
23 Neongalo alishe eshi la udafana va dane vali oshivilo omafiku aheyali, vo ova dana nehafo oshivilo natango omafiku aheyali. 24 Osheshi Hiskia, ohamba yaJuda, ya yandja koshiongalele eengobe deemhedi eyovi needi omayovi aheyali. Novakulunhu va yandja koshiongalele eengobe deemhedi eyovi needi omayovi omulongo. Novapristeli vahapu ve liyapula. 25 Noshiongalele ashishe shOvajuda sha hafa, novapristeli yo nOvalevi noshiongalele ashishe yo shaava va dja muIsrael. Novanailongo yo va dja medu laIsrael naava va kala muJuda. 26 Ndele muJerusalem mwa li ehafo linene. Osheshi okomafiku enya aSalomo yaDavid, ohamba yaIsrael, oshinima sha tya ngaha inashi ningwa muJerusalem. 27 Opo nee ovapristeli nOvalevi va kala ofika ndele tava nangeke ovanhu noupuna. Nondaka yavo ya udika, nomaindilo avo a fika keumbo laye liyapuki lomeulu.
© Oshikwanyama Bible Revised © Bible Society of Namibia, 2008, 2012.
