HESEKIEL 33 - Oshikwanyama Bible (OKYB)

Enangelo

1 Ndele ondjovo yOmwene ye uya kwaame ndele tai ti: 2 “Kaana komunhu, lombwela ovana vomoshiwana shoye u tye kuvo: Ame ngeenge handi eta eongamukonda kombada yoshilongo shimwe, novanhu vomoshilongo osho tava kufa mokati kavo omulumenhu umwe ndele tave mu ningi omunangeli, 3 ndele ye ota mono eongamukonda tali uya kombada yoshilongo, ndele ta shiki enghuma ndele ta londwele ovanhu, 4 ngeenge ope na umwe, ou ta udu ondaka yenghuma, ndelenee ina hala okulondwelwa, neongamukonda tali uya ndele tali mu kufa po, opo nee ohonde yaye oi li kombada yomutwe waye. 5 Ye okwa uda ondaka yenghuma, ndelenee ina hala okulondwelwa. Ohonde yaye oi li kombada yaye. Ndelenee ye ngeenge a hala okulondwelwa, ye ota xupifa omwenyo waye. 6 Ndelenee omunangeli, ngeenge ta mono eongamukonda tali uya, ndelenee ita shiki enghuma, ovanhu opo va londolwe, neongamukonda tali uya, ndele tali kufa po omwenyo umwe mokati kavo, opo ye a kufwa po molwetimba laye ndelenee ohandi ke i pula meke lomunangeli.

7 “Ndele oove, kaana komunhu, ove nde ku tula po u ninge omunangeli weumbo laIsrael; ndele ngeenge to udu ondjovo mokanya kange u noku va londola kombinga yange. 8 Ame ngeenge handi ti komuhenakalunga: Akutu omuhenakalunga, oshilielela, u nokufya, ndele ove ito popifa omuhenakalunga oku mu londwela, opo nee ye, omuhenakalunga, ota ka fya molwetimba laye, ndelenee ohonde yaye ohandi i pula meke loye. 9 Ndelenee ove ngeenge to londwele omuhenakalunga molwondjila yaye, opo ye a aluluke, ndele ye ita aluluka kondjila yaye, opo nee ye e nokufya omolwetimba laye, ndelenee ove wa xupifa omwenyo woye.”

Ouwa nouyuki waKalunga

10 Ndele oove, kaana komunhu, lombwela eumbo laIsrael u tye: “Nye omwa tile ngaha: ‘Oshili, omatauluko etu nomatimba etu oku li kombada yetu, onghee hano hatu loloka mondjila yetu. Ohatu dulu ngahelipi okukala tu nomwenyo?’ 11 Tya kuvo: Oshili, ngaashi Ame ndi nomwenyo, Omwene Kalunga ta ti, oshilielela, Ame ndihe nohokwe nefyo lomuhenakalunga, ndelenee omuhenakalunga ne lialuluke mondjila yaye opo a kale nomwenyo. Lialulukeni! Lialulukeni keendjila deni dii! Molwashike wa hala okufya, oove, eumbo laIsrael.

12 “Ndele ove, kaana komunhu, lombwela ovana voshiwana shoye, u tye: Ouyuki womuyuki itau ke mu xupifa mefiku lokunyona kwaye; ndele omuhenakalunga ita ka wila po mefiku olo ye e lialuluka mouhenakalunga waye. Nomuyuki ita ka kala e nomwenyo molwouyuki waye mefiku olo ta nyono. 13 Ame ngeenge handi lombwele omuyuki nokutya, ye ota ka kala shili e nomwenyo, ndele ye ote lineekele ouyuki waye ndele ta longo owii, opo nee omauyuki aye aeshe itaa ka dimbulukiwa vali, ndelenee molwowii, ye te u longo, ye ota ka fya. 14 Ndele Ame ngeenge handi lombwele omuhenakalunga: ove u nokufya shili, ndele ye ote lialuluka komatimba aye ndele ta longo ouyuki naashi sha wapala, 15 ye, omuhenakalunga, ta shunifa ombabyona, ta futu oinima e i nyeka, ta ende paenghedimhango domwenyo, ita longo owii, oshili, ye ota ka kala e nomwenyo. 16 Omatimba aye aeshe e a ninga itae ke mu valulilwa vali. Ye okwa longa ouyuki naashi sha wapala, oshili, ye ota ka kala e nomwenyo.

17 “Ndelenee ovana vomoshiwana shoye hava ti: Ondjila yOmwene inai yuka, nande ondjila yavo vene inai yuka. 18 Omuyuki ngeenge ta kanduka mouyuki waye ndele ta longo owii, opo nee ye e noku u fila. 19 Ndele omuhenakalunga ngeenge te lialuluka mouhenakalunga waye ndele ta longo ouyuki naashi sha wapala, opo nee ye ote ke u kalela, e nomwenyo. 20 Ndelenee nye otamu ti: Ondjila yOmwene inai yuka. Ame ohandi ke mu tokola, keshe umwe, paendjila daye, akutu nye, eumbo laIsrael.”

Oshilando sha teka

21 Ndele momudo omutimulongo nambali woupika wetu, mohani onhimulongo mefiku etitano lohani, umwe ou a dja onhapo kuJerusalem e uya kwaame neendjovo edi: Oshilando osha teka! 22 Ndele eke lOmwene la kala kombada yange onguloshi fimbo omwiinhapo ine uya. Ndele Ye okwa makulifa okanya kange mongula pefimbo Ye e uya kwaame. Osho ngaha okanya kange ka makulwa, naame inandi fita vali ondaka.

23 Opo nee ondjovo yOmwene ye uya kwaame ndele tai ti: 24 “Kaana komunhu, oonakukala momakulukuma enya omoshilongo shaIsrael ohava popi tava ti: ‘Abraham okwa li omulumenhu omunawike ndele ye a pewa edu eli ngaashi laye mwene. Ndelenee fye otu vahapu, fye twa pewa oshilongo eshi, tu kale tu shi na shetu ovene.’ 25 Onghee hano tya kuvo: Omwene Kalunga ta ti ngaha: nye otamu li ombelela i nohonde ndele omesho eni tamu a yelulile oikalunga yeni, ndele tamu tileshi ohonde, ndele nye ngeno mu pewe nee oshilongo eshi shi ninge sheni? 26 Nye otamu lineekele eongamukonda leni, nye otamu longo oixuna ndele tamu nyateke keshe umwe, omukainhu womukwao, nye ngeno mu pewe nee oshilongo shi ninge sheni vene? 27 Ove u noku va lombwela ngaha: Omwene Kalunga ta ti ngaha: oshili, ngaashi ndi nomwenyo, ava hava kala momakulukuma, oshilielela, vo otava ka fya keongamukonda. Naau a hangika moluhaela Ame ohandi mu yandje koilyani, a liwe po. Ndele ava ve li meehotengulu nomomahondameno otava ka fya koudu u nolutapo. 28 Ndele oshilongo Ame ohandi ke shi ninga omuulu nohandi shi tokeke. Nelinenepekopangelo laye otali ka xula po. Neemhunda daIsrael tadi ka kala ngaho paha kale nande umwe ta ende ko. 29 Opo nee vo otava ka shiiva nokutya, Aame Omwene, oshilongo ngeenge handi shi ningi omuulu nohandi shi tokeke molwoixuna aishe vo ve i ninga.

30 “Ndele oove, kaana komunhu, ovana vomoshiwana shoye otave ku popi peengulu nopeenhu domaumbo, vo ohava lombwelafana, keshe umwe namumwaina, ndele tava ti: ‘Tu yeni, tu ka pwilikine ondjovo tai di kOmwene.’ 31 Ndele vo otave uya kwoove ngaashi ovanhu tava ongala ndele tava kala omutumba moipafi yoye ngaashi ovanhu vange, ndele tava udu eendjovo doye, ndelenee ihave di wanifa. Osheshi vo ohava holola ohole yavo nokanya kavo, ndelenee omitima davo tadi shikula okulikola kwavo kwoulunde. 32 Ndele tala, ove u li kuvo ngaashi eimbilo lohole, la imbwa nawa nola shikwa nawa nokaxumbafeta. Vo ohava udu eendjovo doye, ndelenee ihave di wanifa. 33 Ndelenee ngeenge tadi ka wanifwa, osheshi tadi ka wanifwa, opo nee otava ka shiiva nokutya, omuxunganeki a kala mokati kavo.”