RUT 2 - Oshikwanyama Bible (OKYB)

Rut ta pupudulula mepya laBoas ndele ta filwa onghenda kuye

1 Ndele Naomi okwa li e nomukwao omulumenhu, oshipuna womepata laElimelek, edina laye la li Boas. 2 Ndele Rut, Omumoabi ta ti kuNaomi: “Ame nda hala, ndi ye mepya ndi ka pupudulule, ndi shikule ou ta file nge onghenda.” Opo nee ye te mu nyamukula ta ti: “Inda ko, omumwange!” 3 Opo nee ye a ya, ndele a pupudulula mepya mokushikula ovatei. Nelao le mu twala mepya laBoas, omukwanepata laElimelek.Osho Rut okwa pupudulula mepya mokulandula ovatei. 4 Ndele Boas okwe uya mo, ta di muBetlehem, nokwa popifa ovatei ta ti: “Omwene na kale nanye!” Ndele vo ove mu nyamukula: “Omwene ne ku nangeke noupuna!” 5 Opo nee Boas a pula omupiya waye, omupashukili wovatei: “Omukainhu winya omunyasha olyelye?” 6 Nomupiya, omupashukili wovatei, a nyamukula ndele ta ti: “Ye omukainhu Omumoabi, ou e uya pamwe naNaomi, a dja kepumbu laMoab. 7 Nokwa pula ta ti: ‘Ame ohandi itavelelwa tuu okupupudulula nokwoongela nda shikula ovatei?’ Opo nee e uya mo okudja kokusha kwetango fiyo opaife, ina fya ounye, ndelenee ina tulumukwa efimbo lile meumbo.” 8 Opo nee Boas a popifa Rut ndele ta ti: “Pwilikina, mumwange. Ino ya kepya limwe, u ka pupudulule mo; ino dja po apa; kala povapiya vange ovakainhu. 9 Va shikulifa omesho oye keshe apa tava ka teya mepya. Ovapiya vange onde va lombwela vehe ku kume. Ndele ngeenge owa fya enota, inda ko u ka nwe moiyuma, ovapiya vange ve a tekela mo.” 10 Opo nee ye e linyongamena poshi oshipala shaye ndele ta ti kuye: “Omolwashike ame nda filwa onghenda momesho oye, ndele wa tala nge nande ame omunailongo?” 11 Ndele Boas okwa nyamukula ndele ta ti kuye: “Ame nda hepaululilwa naanaa ashishe osho wa ningila nyokomweno, omulumenhu woye eshi a fya, ndele ove wa fiya ko xo nanyoko noshilongo shoudalwa woye ndele we uya koshiwana ino shi shiiva shito. 12 Omwene ne ku alulile oshilonga shoye nondjabi yoye nai ninge inene shili to ke i pewa kOmwene Kalunga kaIsrael, eshi we uya okukonga eameno koshi yomavava aye.” 13 Opo nee ye ta ti: “Omwene wange, ame onda filwa onghenda momesho oye! Osheshi ove owa hekeleka nge, ndele wa lombwela nge, omupiya woye, eendjovo dokomutima, nande ame ondimuxupi, ndi dulike kovapiya voye ovakainhu.” 14 Ndele pefimbo lokulya Boas okwe mu lombwela: “Ila oku u lye momingome, u velele momunghoka okapambu koye.” Opo nee ye a ya a ka kale omutumba povatei, nokwe mu pa oilya ya kangwa, ndele ta li ndele ta kuta nokwa xupifa po. 15 Ye eshi a penduka vali a ka pupudulule, Boas okwa lombwela ovapiya vaye ta ti: “Na pupudulule yo mokati koipandi, ndele inamu mu kelela. 16 Ndele oilya imwe i pweyeni mo moipandi, nye mu i mu fiile po, e i pupudulule po, ndele inamu mu hanyena.”

17 Ndele ye okwa pupudulula fiyo onguloshi. Ndele ye eshi a xwa oyo e i pupudulula, yo ya li i fike peekilograma omulongo. 18 Ndele okwe i kufa po. Ye eshi e uya koshilando, inamweno yaye a mona oyo e i pupudulula. Nokwa eta yo eendja odo a xupifa po, eshi a lya nokwa kuta, ndele te di mu pe. 19 Opo nee inamweno yaye e mu pula ta ti: “Openi wa pupudulula nena? Nopeni wa longa? Ou e ku fila onghenda na nangekwe noupuna!” Okwa hepaululila inamweno apa a longa, ndele ta ti: “Edina lomulumenhu ou puye nda longa nena, oBoas.” 20 Ndele Naomi ta ti koshitenya shaye: “Ye na nangekwe noupuna kOmwene, ou iha kufa po onghenda yaye povanamwenyo nopovafi”. Naomi ta ti vali kuye: “Omulumenhu winya, ye omukwetu; ye omupambele wetu.” 21 Opo nee Rut, Omumoabi ta ti: “Ye okwa lombwela nge vali ta ti: ‘U nokukala povapiya vange fiyo va mana okuteya oilya aishe yange.’ ” 22 Opo nee Naomi okwa nyamukula oshitenya shaye Rut: “Omumwange, osha wapala, eshi to i ko pamwe novapiya vaye ovakainhu, uha monifwe oixuna, ngeenge to i mepya limwe.” 23 Osho ngaha hano e litula povapiya ovakainhu vaBoas a ka pupudulule fiyo va mana okuteya oilya aishe. Ndele a kala puinamweno yaye.